(४) पच्चुप्पन्नातीतवारो

(क) अनुलोमपुग्गलो

१२२. (क) यस्स रूपक्खन्धो निरुज्झति तस्स वेदनाक्खन्धो निरुज्झित्थाति? आमन्ता.

(ख) यस्स वा पन वेदनाक्खन्धो निरुज्झित्थ तस्स रूपक्खन्धो निरुज्झतीति?

सब्बेसं उपपज्जन्तानं अरूपा चवन्तानं तेसं वेदनाक्खन्धो निरुज्झित्थ, नो च तेसं रूपक्खन्धो निरुज्झति. पञ्चवोकारा चवन्तानं असञ्ञसत्ता चवन्तानं तेसं वेदनाक्खन्धो च निरुज्झित्थ रूपक्खन्धो च निरुज्झति.

१२३. (क) यस्स वेदनाक्खन्धो निरुज्झति तस्स सञ्ञाक्खन्धो निरुज्झित्थाति? आमन्ता.

(ख) यस्स वा पन सञ्ञाक्खन्धो निरुज्झित्थ तस्स वेदनाक्खन्धो निरुज्झतीति?

सब्बेसं उपपज्जन्तानं असञ्ञसत्ता चवन्तानं तेसं सञ्ञाक्खन्धो निरुज्झित्थ, नो च तेसं वेदनाक्खन्धो निरुज्झति. चतुवोकारा पञ्चवोकारा चवन्तानं तेसं सञ्ञाक्खन्धो च निरुज्झित्थ वेदनाक्खन्धो च निरुज्झति.

(ख) अनुलोमओकासो

१२४. (क) यत्थ रूपक्खन्धो निरुज्झति तत्थ वेदनाक्खन्धो निरुज्झित्थाति?

असञ्ञसत्ते तत्थ रूपक्खन्धो निरुज्झति, नो च तत्थ वेदनाक्खन्धो निरुज्झित्थ. पञ्चवोकारे तत्थ रूपक्खन्धो च निरुज्झति वेदनाक्खन्धो च निरुज्झित्थ.

(ख) यत्थ वा पन वेदनाक्खन्धो निरुज्झित्थ तत्थ रूपक्खन्धो निरुज्झतीति?

अरूपे तत्थ वेदनाक्खन्धो निरुज्झित्थ, नो च तत्थ रूपक्खन्धो निरुज्झति. पञ्चवोकारे तत्थ वेदनाक्खन्धो च निरुज्झित्थ रूपक्खन्धो च निरुज्झति.

१२५. (क) यत्थ वेदनाक्खन्धो निरुज्झति तत्थ सञ्ञाक्खन्धो निरुज्झित्थाति? आमन्ता.

(ख) यत्थ वा पन सञ्ञाक्खन्धो निरुज्झित्थ तत्थ वेदनाक्खन्धो निरुज्झतीति? आमन्ता.

(ग) अनुलोमपुग्गलोकासा

१२६. (क) यस्स यत्थ रूपक्खन्धो निरुज्झति तस्स तत्थ वेदनाक्खन्धो निरुज्झित्थाति?

सुद्धावासे परिनिब्बन्तानं असञ्ञसत्ता चवन्तानं तेसं तत्थ रूपक्खन्धो निरुज्झति, नो च तेसं तत्थ वेदनाक्खन्धो निरुज्झित्थ. इतरेसं पञ्चवोकारा चवन्तानं तेसं तत्थ रूपक्खन्धो च निरुज्झति वेदनाक्खन्धो च निरुज्झित्थ.

(ख) यस्स वा पन यत्थ वेदनाक्खन्धो निरुज्झित्थ तस्स तत्थ रूपक्खन्धो निरुज्झतीति?

पञ्चवोकारं उपपज्जन्तानं अरूपानं तेसं तत्थ वेदनाक्खन्धो निरुज्झित्थ, नो च तेसं तत्थ रूपक्खन्धो निरुज्झति. पञ्चवोकारा चवन्तानं तेसं तत्थ वेदनाक्खन्धो च निरुज्झित्थ रूपक्खन्धो च निरुज्झति.

१२७. (क) यस्स यत्थ वेदनाक्खन्धो निरुज्झति तस्स तत्थ सञ्ञाक्खन्धो निरुज्झित्थाति?

सुद्धावासे परिनिब्बन्तानं तेसं तत्थ वेदनाक्खन्धो निरुज्झति, नो च तेसं तत्थ सञ्ञाक्खन्धो निरुज्झित्थ. इतरेसं चतुवोकारा पञ्चवोकारा चवन्तानं तेसं तत्थ वेदनाक्खन्धो च निरुज्झति सञ्ञाक्खन्धो च निरुज्झित्थ.

(ख) यस्स वा पन यत्थ सञ्ञाक्खन्धो निरुज्झित्थ तस्स तत्थ वेदनाक्खन्धो निरुज्झतीति?

चतुवोकारं पञ्चवोकारं उपपज्जन्तानं तेसं तत्थ सञ्ञाक्खन्धो निरुज्झित्थ, नो च तेसं तत्थ वेदनाक्खन्धो निरुज्झति. चतुवोकारा पञ्चवोकारा चवन्तानं तेसं तत्थ सञ्ञाक्खन्धो च निरुज्झित्थ वेदनाक्खन्धो च निरुज्झति.

(घ) पच्चनीकपुग्गलो

१२८. (क) यस्स रूपक्खन्धो न निरुज्झति तस्स वेदनाक्खन्धो न निरुज्झित्थाति? निरुज्झित्थ.

(ख) यस्स वा पन वेदनाक्खन्धो न निरुज्झित्थ तस्स रूपक्खन्धो न निरुज्झतीति? नत्थि.

१२९. (क) यस्स वेदनाक्खन्धो न निरुज्झति तस्स सञ्ञाक्खन्धो न निरुज्झित्थाति? निरुज्झित्थ.

(ख) यस्स वा पन सञ्ञाक्खन्धो न निरुज्झित्थ तस्स वेदनाक्खन्धो न निरुज्झतीति? नत्थि.

(ङ) पच्चनीकओकासो

१३०. यत्थ रूपक्खन्धो न निरुज्झति (यत्थकं परिपुण्णं कातब्बं).

(च) पच्चनीकपुग्गलोकासा

१३१. (क) यस्स यत्थ रूपक्खन्धो न निरुज्झति तस्स तत्थ वेदनाक्खन्धो न निरुज्झित्थाति?

पञ्चवोकारं उपपज्जन्तानं अरूपानं तेसं तत्थ रूपक्खन्धो न निरुज्झति, नो च तेसं तत्थ वेदनाक्खन्धो न निरुज्झित्थ. सुद्धावासं उपपज्जन्तानं असञ्ञसत्तं उपपज्जन्तानं तेसं तत्थ रूपक्खन्धो च न निरुज्झति वेदनाक्खन्धो च न निरुज्झित्थ.

(ख) यस्स वा पन यत्थ वेदनाक्खन्धो न निरुज्झित्थ तस्स तत्थ रूपक्खन्धो न निरुज्झतीति?

सुद्धावासे परिनिब्बन्तानं असञ्ञसत्ता चवन्तानं तेसं तत्थ वेदनाक्खन्धो न निरुज्झित्थ, नो च तेसं तत्थ रूपक्खन्धो न निरुज्झति. सुद्धावासं उपपज्जन्तानं असञ्ञसत्तं उपपज्जन्तानं तेसं तत्थ वेदनाक्खन्धो च न निरुज्झित्थ रूपक्खन्धो च न निरुज्झति.

१३२. (क) यस्स यत्थ वेदनाक्खन्धो न निरुज्झति तस्स तत्थ सञ्ञाक्खन्धो न निरुज्झित्थाति?

चतुवोकारं पञ्चवोकारं उपपज्जन्तानं तेसं तत्थ वेदनाक्खन्धो न निरुज्झति, नो च तेसं तत्थ सञ्ञाक्खन्धो न निरुज्झित्थ. सुद्धावासं उपपज्जन्तानं असञ्ञसत्तानं तेसं तत्थ वेदनाक्खन्धो च न निरुज्झति सञ्ञाक्खन्धो च न निरुज्झित्थ.

(ख) यस्स वा पन यत्थ सञ्ञाक्खन्धो न निरुज्झित्थ तस्स तत्थ वेदनाक्खन्धो न निरुज्झतीति?

सुद्धावासे परिनिब्बन्तानं तेसं तत्थ सञ्ञाक्खन्धो न निरुज्झित्थ, नो च तेसं तत्थ वेदनाक्खन्धो न निरुज्झति. सुद्धावासं उपपज्जन्तानं असञ्ञसत्तानं तेसं तत्थ सञ्ञाक्खन्धो च न निरुज्झित्थ वेदनाक्खन्धो च न निरुज्झति.