(३) अनागतवारो

(क) अनुलोमपुग्गलो

११६. (क) यस्स रूपक्खन्धो निरुज्झिस्सति तस्स वेदनाक्खन्धो निरुज्झिस्सतीति? आमन्ता.

(ख) यस्स वा पन वेदनाक्खन्धो निरुज्झिस्सति तस्स रूपक्खन्धो निरुज्झिस्सतीति?

पच्छिमभविकानं अरूपं उपपज्जन्तानं ये च अरूपं उपपज्जित्वा परिनिब्बायिस्सन्ति तेसं चवन्तानं तेसं वेदनाक्खन्धो निरुज्झिस्सति, नो च तेसं रूपक्खन्धो निरुज्झिस्सति. इतरेसं तेसं वेदनाक्खन्धो च निरुज्झिस्सति रूपक्खन्धो च निरुज्झिस्सति.

(ख) अनुलोमओकासो

११७. (क) यत्थ रूपक्खन्धो निरुज्झिस्सति तत्थ वेदनाक्खन्धो निरुज्झिस्सतीति?

असञ्ञसत्ते तत्थ रूपक्खन्धो निरुज्झिस्सति, नो च तत्थ वेदनाक्खन्धो निरुज्झिस्सति. पञ्चवोकारे तत्थ रूपक्खन्धो च निरुज्झिस्सति वेदनाक्खन्धो च निरुज्झिस्सति.

(ख) यत्थ वा पन वेदनाक्खन्धो निरुज्झिस्सति तत्थ रूपक्खन्धो निरुज्झिस्सतीति?

अरूपे तत्थ वेदनाक्खन्धो निरुज्झिस्सति, नो च तत्थ रूपक्खन्धो निरुज्झिस्सति. पञ्चवोकारे तत्थ वेदनाक्खन्धो च निरुज्झिस्सति रूपक्खन्धो च निरुज्झिस्सति.

(ग) अनुलोमपुग्गलोकासा

११८. (क) यस्स यत्थ रूपक्खन्धो निरुज्झिस्सति तस्स तत्थ वेदनाक्खन्धो निरुज्झिस्सतीति?

असञ्ञसत्तानं तेसं तत्थ रूपक्खन्धो निरुज्झिस्सति, नो च तेसं तत्थ वेदनाक्खन्धो निरुज्झिस्सति. पञ्चवोकारानं तेसं तत्थ रूपक्खन्धो च निरुज्झिस्सति वेदनाक्खन्धो च निरुज्झिस्सति.

(ख) यस्स वा पन यत्थ वेदनाक्खन्धो निरुज्झिस्सति तस्स तत्थ रूपक्खन्धो निरुज्झिस्सतीति?

अरूपानं तेसं तत्थ वेदनाक्खन्धो निरुज्झिस्सति, नो च तेसं तत्थ रूपक्खन्धो निरुज्झिस्सति. पञ्चवोकारानं तेसं तत्थ वेदनाक्खन्धो च निरुज्झिस्सति रूपक्खन्धो च निरुज्झिस्सति.

(घ) पच्चनीकपुग्गलो

११९. (क) यस्स रूपक्खन्धो न निरुज्झिस्सति तस्स वेदनाक्खन्धो न निरुज्झिस्सतीति?

पच्छिमभविकानं अरूपं उपपज्जन्तानं ये च अरूपं उपपज्जित्वा परिनिब्बायिस्सन्ति तेसं चवन्तानं तेसं रूपक्खन्धो न निरुज्झिस्सति, नो च तेसं वेदनाक्खन्धो न निरुज्झिस्सति. परिनिब्बन्तानं तेसं रूपक्खन्धो च न निरुज्झिस्सति वेदनाक्खन्धो च न निरुज्झिस्सति.

(ख) यस्स वा पन वेदनाक्खन्धो न निरुज्झिस्सति तस्स रूपक्खन्धो न निरुज्झिस्सतीति? आमन्ता.

(ङ) पच्चनीकओकासो

१२०. (क) यत्थ रूपक्खन्धो न निरुज्झिस्सति तत्थ वेदनाक्खन्धो न निरुज्झिस्सतीति? निरुज्झिस्सति.

(ख) यत्थ वा पन वेदनाक्खन्धो न निरुज्झिस्सति तत्थ रूपक्खन्धो न निरुज्झिस्सतीति? निरुज्झिस्सति.

(च) पच्चनीकपुग्गलोकासा

१२१. (क) यस्स यत्थ रूपक्खन्धो न निरुज्झिस्सति तस्स तत्थ वेदनाक्खन्धो न निरुज्झिस्सतीति?

अरूपानं तेसं तत्थ रूपक्खन्धो न निरुज्झिस्सति, नो च तेसं तत्थ वेदनाक्खन्धो न निरुज्झिस्सति. परिनिब्बन्तानं तेसं तत्थ रूपक्खन्धो च न निरुज्झिस्सति वेदनाक्खन्धो च न निरुज्झिस्सति.

(ख) यस्स वा पन यत्थ वेदनाक्खन्धो न निरुज्झिस्सति तस्स तत्थ रूपक्खन्धो न निरुज्झिस्सतीति?

असञ्ञसत्तानं तेसं तत्थ वेदनाक्खन्धो न निरुज्झिस्सति, नो च तेसं तत्थ रूपक्खन्धो न निरुज्झिस्सति. परिनिब्बन्तानं तेसं तत्थ वेदनाक्खन्धो च न निरुज्झिस्सति रूपक्खन्धो च न निरुज्झिस्सति.