(१) पच्चुप्पन्नवारो

(क) अनुलोमपुग्गलो

१०४. (क) यस्स रूपक्खन्धो निरुज्झति तस्स वेदनाक्खन्धो निरुज्झतीति?

असञ्ञसत्ता चवन्तानं तेसं रूपक्खन्धो निरुज्झति, नो च तेसं वेदनाक्खन्धो निरुज्झति. पञ्चवोकारा चवन्तानं तेसं रूपक्खन्धो च निरुज्झति वेदनाक्खन्धो च निरुज्झति.

(ख) यस्स वा पन वेदनाक्खन्धो निरुज्झति तस्स रूपक्खन्धो निरुज्झतीति?

अरूपा चवन्तानं तेसं वेदनाक्खन्धो निरुज्झति, नो च तेसं रूपक्खन्धो निरुज्झति. पञ्चवोकारा चवन्तानं तेसं वेदनाक्खन्धो च निरुज्झति रूपक्खन्धो च निरुज्झति.

(ख) अनुलोमओकासो

१०५. (क) यत्थ रूपक्खन्धो निरुज्झति तत्थ वेदनाक्खन्धो निरुज्झतीति?

असञ्ञसत्ते तत्थ रूपक्खन्धो निरुज्झति, नो च तत्थ वेदनाक्खन्धो निरुज्झति. पञ्चवोकारे तत्थ रूपक्खन्धो च निरुज्झति वेदनाक्खन्धो च निरुज्झति.

(ख) यत्थ वा पन वेदनाक्खन्धो निरुज्झति तत्थ रूपक्खन्धो निरुज्झतीति?

अरूपे तत्थ वेदनाक्खन्धो निरुज्झति, नो च तत्थ रूपक्खन्धो निरुज्झति. पञ्चवोकारे तत्थ वेदनाक्खन्धो च निरुज्झति रूपक्खन्धो च निरुज्झति.

(ग) अनुलोमपुग्गलोकासा

१०६. (क) यस्स यत्थ रूपक्खन्धो निरुज्झति तस्स तत्थ वेदनाक्खन्धो निरुज्झतीति?

असञ्ञसत्ता चवन्तानं तेसं तत्थ रूपक्खन्धो निरुज्झति, नो च तेसं तत्थ वेदनाक्खन्धो निरुज्झति. पञ्चवोकारा चवन्तानं तेसं तत्थ रूपक्खन्धो च निरुज्झति वेदनाक्खन्धो च निरुज्झति.

(ख) यस्स वा पन यत्थ वेदनाक्खन्धो निरुज्झति तस्स तत्थ रूपक्खन्धो निरुज्झतीति?

अरूपा चवन्तानं तेसं तत्थ वेदनाक्खन्धो निरुज्झति, नो च तेसं तत्थ रूपक्खन्धो निरुज्झति. पञ्चवोकारा चवन्तानं तेसं तत्थ वेदनाक्खन्धो च निरुज्झति रूपक्खन्धो च निरुज्झति.

(घ) पच्चनीकपुग्गलो

१०७. (क) यस्स रूपक्खन्धो न निरुज्झति तस्स वेदनाक्खन्धो न निरुज्झतीति?

अरूपा चवन्तानं तेसं रूपक्खन्धो न निरुज्झति, नो च तेसं वेदनाक्खन्धो न निरुज्झति. सब्बेसं उपपज्जन्तानं तेसं रूपक्खन्धो च न निरुज्झति वेदनाक्खन्धो च न निरुज्झति.

(ख) यस्स वा पन वेदनाक्खन्धो न निरुज्झति तस्स रूपक्खन्धो न निरुज्झतीति?

असञ्ञसत्ता चवन्तानं तेसं वेदनाक्खन्धो न निरुज्झति, नो च तेसं रूपक्खन्धो न निरुज्झति. सब्बेसं उपपज्जन्तानं तेसं वेदनाक्खन्धो च न निरुज्झति रूपक्खन्धो च न निरुज्झति.

(ङ) पच्चनीकओकासो

१०८. (क) यत्थ रूपक्खन्धो न निरुज्झति तत्थ वेदनाक्खन्धो न निरुज्झतीति? निरुज्झति.

(ख) यत्थ वा पन वेदनाक्खन्धो न निरुज्झति तत्थ रूपक्खन्धो न निरुज्झतीति? निरुज्झति.

(च) पच्चनीकपुग्गलोकासा

१०९. (क) यस्स यत्थ रूपक्खन्धो न निरुज्झति तस्स तत्थ वेदनाक्खन्धो न निरुज्झतीति?

अरूपा चवन्तानं तेसं तत्थ रूपक्खन्धो न निरुज्झति, नो च तेसं तत्थ वेदनाक्खन्धो न निरुज्झति. सब्बेसं उपपज्जन्तानं तेसं तत्थ रूपक्खन्धो च न निरुज्झति वेदनाक्खन्धो च न निरुज्झति.

(ख) यस्स वा पन यत्थ वेदनाक्खन्धो न निरुज्झति तस्स तत्थ रूपक्खन्धो न निरुज्झतीति?

असञ्ञसत्ता चवन्तानं तेसं तत्थ वेदनाक्खन्धो न निरुज्झति, नो च तेसं तत्थ रूपक्खन्धो न निरुज्झति. सब्बेसं उपपज्जन्तानं तेसं तत्थ वेदनाक्खन्धो च न निरुज्झति रूपक्खन्धो च न निरुज्झति.