(५) पच्चुप्पन्नानागतवारो

(क) अनुलोमपुग्गलो

८०. (क) यस्स रूपक्खन्धो उप्पज्जति तस्स वेदनाक्खन्धो उप्पज्जिस्सतीति?

पच्छिमभविकानं पञ्चवोकारं उपपज्जन्तानं तेसं रूपक्खन्धो उप्पज्जति, नो च तेसं वेदनाक्खन्धो उप्पज्जिस्सति. इतरेसं पञ्चवोकारं उपपज्जन्तानं असञ्ञसत्तं उपपज्जन्तानं तेसं रूपक्खन्धो च उप्पज्जति वेदनाक्खन्धो च उप्पज्जिस्सति.

(ख) यस्स वा पन वेदनाक्खन्धो उप्पज्जिस्सति तस्स रूपक्खन्धो उप्पज्जतीति?

सब्बेसं चवन्तानं अरूपं उपपज्जन्तानं तेसं वेदनाक्खन्धो उप्पज्जिस्सति, नो च तेसं रूपक्खन्धो उप्पज्जति. पञ्चवोकारं उपपज्जन्तानं असञ्ञसत्तं उपपज्जन्तानं तेसं वेदनाक्खन्धो च उप्पज्जिस्सति रूपक्खन्धो च उप्पज्जति.

८१. (क) यस्स वेदनाक्खन्धो उप्पज्जति तस्स सञ्ञाक्खन्धो उप्पज्जिस्सतीति?

पच्छिमभविकानं उपपज्जन्तानं तेसं वेदनाक्खन्धो उप्पज्जति, नो च तेसं सञ्ञाक्खन्धो उप्पज्जिस्सति. इतरेसं चतुवोकारं पञ्चवोकारं उपपज्जन्तानं तेसं वेदनाक्खन्धो च उप्पज्जति सञ्ञाक्खन्धो च उप्पज्जिस्सति.

(ख) यस्स वा पन सञ्ञाक्खन्धो उप्पज्जिस्सति तस्स वेदनाक्खन्धो उप्पज्जतीति?

सब्बेसं चवन्तानं असञ्ञसत्तं उपपज्जन्तानं तेसं सञ्ञाक्खन्धो उप्पज्जिस्सति, नो च तेसं वेदनाक्खन्धो उप्पज्जति. चतुवोकारं पञ्चवोकारं उपपज्जन्तानं तेसं सञ्ञाक्खन्धो च उप्पज्जिस्सति वेदनाक्खन्धो च उप्पज्जति.

(ख) अनुलोमओकासो

८२. (क) यत्थ रूपक्खन्धो उप्पज्जति तत्थ वेदनाक्खन्धो उप्पज्जिस्सतीति?

असञ्ञसत्ते तत्थ रूपक्खन्धो उप्पज्जति, नो च तत्थ वेदनाक्खन्धो उप्पज्जिस्सति. पञ्चवोकारे तत्थ रूपक्खन्धो च उप्पज्जति वेदनाक्खन्धो च उप्पज्जिस्सति.

(ख) यत्थ वा पन वेदनाक्खन्धो उप्पज्जिस्सति तत्थ रूपक्खन्धो उप्पज्जतीति?

अरूपे तत्थ वेदनाक्खन्धो उप्पज्जिस्सति, नो च तत्थ रूपक्खन्धो उप्पज्जति. पञ्चवोकारे तत्थ वेदनाक्खन्धो च उप्पज्जिस्सति रूपक्खन्धो च उप्पज्जति.

८३. (क) यत्थ वेदनाक्खन्धो उप्पज्जति तत्थ सञ्ञाक्खन्धो उप्पज्जिस्सतीति? आमन्ता.

(ख) यत्थ वा पन सञ्ञाक्खन्धो उप्पज्जिस्सति तत्थ वेदनाक्खन्धो उप्पज्जतीति? आमन्ता.

(ग) अनुलोमपुग्गलोकासा

८४. (क) यस्स यत्थ रूपक्खन्धो उप्पज्जति तस्स तत्थ वेदनाक्खन्धो उप्पज्जिस्सतीति?

पच्छिमभविकानं पञ्चवोकारं उपपज्जन्तानं असञ्ञसत्तं उपपज्जन्तानं तेसं तत्थ रूपक्खन्धो उप्पज्जति, नो च तेसं तत्थ वेदनाक्खन्धो उप्पज्जिस्सति. इतरेसं पञ्चवोकारं उपपज्जन्तानं तेसं तत्थ रूपक्खन्धो च उप्पज्जति वेदनाक्खन्धो च उप्पज्जिस्सति.

(ख) यस्स वा पन यत्थ वेदनाक्खन्धो उप्पज्जिस्सति तस्स तत्थ रूपक्खन्धो उप्पज्जतीति?

पञ्चवोकारा चवन्तानं अरूपानं तेसं तत्थ वेदनाक्खन्धो उप्पज्जिस्सति, नो च तेसं तत्थ रूपक्खन्धो उप्पज्जति. पञ्चवोकारं उपपज्जन्तानं तेसं तत्थ वेदनाक्खन्धो च उप्पज्जिस्सति रूपक्खन्धो च उप्पज्जति.

८५. (क) यस्स यत्थ वेदनाक्खन्धो उप्पज्जति तस्स तत्थ सञ्ञाक्खन्धो उप्पज्जिस्सतीति?

पच्छिमभविकानं उपपज्जन्तानं तेसं तत्थ वेदनाक्खन्धो उप्पज्जति, नो च तेसं तत्थ सञ्ञाक्खन्धो उप्पज्जिस्सति. इतरेसं चतुवोकारं पञ्चवोकारं उपपज्जन्तानं तेसं तत्थ वेदनाक्खन्धो च उप्पज्जति सञ्ञाक्खन्धो च उप्पज्जिस्सति.

(ख) यस्स वा पन यत्थ सञ्ञाक्खन्धो उप्पज्जिस्सति तस्स तत्थ वेदनाक्खन्धो उप्पज्जतीति?

चतुवोकारा पञ्चवोकारा चवन्तानं तेसं तत्थ सञ्ञाक्खन्धो उप्पज्जिस्सति, नो च तेसं तत्थ वेदनाक्खन्धो उप्पज्जति. चतुवोकारं पञ्चवोकारं उपपज्जन्तानं तेसं तत्थ सञ्ञाक्खन्धो च उप्पज्जिस्सति वेदनाक्खन्धो च उप्पज्जति.

(घ) पच्चनीकपुग्गलो

८६. (क) यस्स रूपक्खन्धो नुप्पज्जति तस्स वेदनाक्खन्धो नुप्पज्जिस्सतीति?

सब्बेसं चवन्तानं अरूपं उपपज्जन्तानं तेसं रूपक्खन्धो नुप्पज्जति, नो च तेसं वेदनाक्खन्धो नुप्पज्जिस्सति. पञ्चवोकारे परिनिब्बन्तानं अरूपे पच्छिमभविकानं तेसं रूपक्खन्धो च नुप्पज्जति वेदनाक्खन्धो च नुप्पज्जिस्सति.

(ख) यस्स वा पन वेदनाक्खन्धो नुप्पज्जिस्सति तस्स रूपक्खन्धो नुप्पज्जतीति?

पच्छिमभविकानं पञ्चवोकारं उपपज्जन्तानं तेसं वेदनाक्खन्धो नुप्पज्जिस्सति, नो च तेसं रूपक्खन्धो नुप्पज्जति. पञ्चवोकारे परिनिब्बन्तानं अरूपे पच्छिमभविकानं तेसं वेदनाक्खन्धो च नुप्पज्जिस्सति रूपक्खन्धो च नुप्पज्जति.

८७. (क) यस्स वेदनाक्खन्धो नुप्पज्जति तस्स सञ्ञाक्खन्धो नुप्पज्जिस्सतीति?

सब्बेसं चवन्तानं असञ्ञसत्तं उपपज्जन्तानं तेसं वेदनाक्खन्धो नुप्पज्जति, नो च तेसं सञ्ञाक्खन्धो नुप्पज्जिस्सति. परिनिब्बन्तानं तेसं वेदनाक्खन्धो च नुप्पज्जति सञ्ञाक्खन्धो च नुप्पज्जिस्सति.

(ख) यस्स वा पन सञ्ञाक्खन्धो नुप्पज्जिस्सति तस्स वेदनाक्खन्धो नुप्पज्जतीति?

पच्छिमभविकानं उपपज्जन्तानं [पच्छिमभविकानं पञ्चवोकारं उपपज्जन्तानं (सी. स्या.)] तेसं सञ्ञाक्खन्धो नुप्पज्जिस्सति, नो च तेसं वेदनाक्खन्धो नुप्पज्जति. परिनिब्बन्तानं तेसं सञ्ञाक्खन्धो च नुप्पज्जिस्सति वेदनाक्खन्धो च नुप्पज्जति.

(ङ) पच्चनीकओकासो

८८. (क) यत्थ रूपक्खन्धो नुप्पज्जति तत्थ वेदनाक्खन्धो नुप्पज्जिस्सतीति? उप्पज्जिस्सति.

(ख) यत्थ वा पन वेदनाक्खन्धो नुप्पज्जिस्सति तत्थ रूपक्खन्धो नुप्पज्जतीति? उप्पज्जति.

८९. (क) यत्थ वेदनाक्खन्धो नुप्पज्जति तत्थ सञ्ञाक्खन्धो नुप्पज्जिस्सतीति? आमन्ता.

(ख) यत्थ वा पन सञ्ञाक्खन्धो नुप्पज्जिस्सति तत्थ वेदनाक्खन्धो नुप्पज्जतीति? आमन्ता.

(च) पच्चनीकपुग्गलोकासा

९०. (क) यस्स यत्थ रूपक्खन्धो नुप्पज्जति तस्स तत्थ वेदनाक्खन्धो नुप्पज्जिस्सतीति?

पञ्चवोकारा चवन्तानं अरूपानं तेसं तत्थ रूपक्खन्धो नुप्पज्जति, नो च तेसं तत्थ वेदनाक्खन्धो नुप्पज्जिस्सति. पञ्चवोकारे परिनिब्बन्तानं अरूपे पच्छिमभविकानं असञ्ञसत्ता चवन्तानं तेसं तत्थ रूपक्खन्धो च नुप्पज्जति वेदनाक्खन्धो च नुप्पज्जिस्सति.

(ख) यस्स वा पन यत्थ वेदनाक्खन्धो नुप्पज्जिस्सति तस्स तत्थ रूपक्खन्धो नुप्पज्जतीति?

पच्छिमभविकानं पञ्चवोकारं उपपज्जन्तानं असञ्ञसत्तं उपपज्जन्तानं तेसं तत्थ वेदनाक्खन्धो नुप्पज्जिस्सति, नो च तेसं तत्थ रूपक्खन्धो नुप्पज्जति. पञ्चवोकारे परिनिब्बन्तानं अरूपे पच्छिमभविकानं असञ्ञसत्ता चवन्तानं तेसं तत्थ वेदनाक्खन्धो च नुप्पज्जिस्सति रूपक्खन्धो च नुप्पज्जति.

९१. (क) यस्स यत्थ वेदनाक्खन्धो नुप्पज्जति तस्स तत्थ सञ्ञाक्खन्धो नुप्पज्जिस्सतीति?

चतुवोकारा पञ्चवोकारा चवन्तानं तेसं तत्थ वेदनाक्खन्धो नुप्पज्जति, नो च तेसं तत्थ सञ्ञाक्खन्धो नुप्पज्जिस्सति. परिनिब्बन्तानं असञ्ञसत्तानं तेसं तत्थ वेदनाक्खन्धो च नुप्पज्जति सञ्ञाक्खन्धो च नुप्पज्जिस्सति.

(ख) यस्स वा पन यत्थ सञ्ञाक्खन्धो नुप्पज्जिस्सति तस्स तत्थ वेदनाक्खन्धो नुप्पज्जतीति?

पच्छिमभविकानं उपपज्जन्तानं तेसं तत्थ सञ्ञाक्खन्धो नुप्पज्जिस्सति, नो च तेसं तत्थ वेदनाक्खन्धो नुप्पज्जति. परिनिब्बन्तानं असञ्ञसत्तानं तेसं तत्थ सञ्ञाक्खन्धो च नुप्पज्जिस्सति वेदनाक्खन्धो च नुप्पज्जति.