(६) अतीतानागतवारो

(क) अनुलोमपुग्गलो

९२. (क) यस्स रूपक्खन्धो उप्पज्जित्थ तस्स वेदनाक्खन्धो उप्पज्जिस्सतीति?

पच्छिमभविकानं तेसं रूपक्खन्धो उप्पज्जित्थ, नो च तेसं वेदनाक्खन्धो उप्पज्जिस्सति. इतरेसं तेसं रूपक्खन्धो च उप्पज्जित्थ वेदनाक्खन्धो च उप्पज्जिस्सति.

(ख) यस्स वा पन वेदनाक्खन्धो उप्पज्जिस्सति तस्स रूपक्खन्धो उप्पज्जित्थाति? आमन्ता.

९३. (क) यस्स वेदनाक्खन्धो उप्पज्जित्थ तस्स सञ्ञाक्खन्धो उप्पज्जिस्सतीति?

पच्छिमभविकानं तेसं वेदनाक्खन्धो उप्पज्जित्थ, नो च तेसं सञ्ञाक्खन्धो उप्पज्जिस्सति. इतरेसं तेसं वेदनाक्खन्धो च उप्पज्जित्थ सञ्ञाक्खन्धो च उप्पज्जिस्सति.

(ख) यस्स वा पन सञ्ञाक्खन्धो उप्पज्जिस्सति तस्स वेदनाक्खन्धो उप्पज्जित्थाति? आमन्ता.

(ख) अनुलोमओकासो

९४. (क) यत्थ रूपक्खन्धो उप्पज्जित्थ तत्थ वेदनाक्खन्धो उप्पज्जिस्सतीति?

असञ्ञसत्ते तत्थ रूपक्खन्धो उप्पज्जित्थ, नो च तत्थ वेदनाक्खन्धो उप्पज्जिस्सति. पञ्चवोकारे तत्थ रूपक्खन्धो च उप्पज्जित्थ वेदनाक्खन्धो च उप्पज्जिस्सति.

(ख) यत्थ वा पन वेदनाक्खन्धो उप्पज्जिस्सति तत्थ रूपक्खन्धो उप्पज्जित्थाति?

अरूपे तत्थ वेदनाक्खन्धो उप्पज्जिस्सति, नो च तत्थ रूपक्खन्धो उप्पज्जित्थ. पञ्चवोकारे तत्थ वेदनाक्खन्धो च उप्पज्जिस्सति रूपक्खन्धो च उप्पज्जित्थ.

९५. (क) यत्थ वेदनाक्खन्धो उप्पज्जित्थ तत्थ सञ्ञाक्खन्धो उप्पज्जिस्सतीति? आमन्ता.

(ख) यत्थ वा पन सञ्ञाक्खन्धो उप्पज्जिस्सति तत्थ वेदनाक्खन्धो उप्पज्जित्थाति? आमन्ता.

(ग) अनुलोमपुग्गलोकासा

९६. (क) यस्स यत्थ रूपक्खन्धो उप्पज्जित्थ तस्स तत्थ वेदनाक्खन्धो उप्पज्जिस्सतीति?

पञ्चवोकारे पच्छिमभविकानं असञ्ञसत्तानं तेसं तत्थ रूपक्खन्धो उप्पज्जित्थ, नो च तेसं तत्थ वेदनाक्खन्धो उप्पज्जिस्सति. इतरेसं पञ्चवोकारानं तेसं तत्थ रूपक्खन्धो च उप्पज्जित्थ वेदनाक्खन्धो च उप्पज्जिस्सति.

(ख) यस्स वा पन यत्थ वेदनाक्खन्धो उप्पज्जिस्सति तस्स तत्थ रूपक्खन्धो उप्पज्जित्थाति?

अरूपानं तेसं तत्थ वेदनाक्खन्धो उप्पज्जिस्सति, नो च तेसं तत्थ रूपक्खन्धो उप्पज्जित्थ. पञ्चवोकारानं तेसं तत्थ वेदनाक्खन्धो च उप्पज्जिस्सति रूपक्खन्धो च उप्पज्जित्थ.

९७. (क) यस्स यत्थ वेदनाक्खन्धो उप्पज्जित्थ तस्स तत्थ सञ्ञाक्खन्धो उप्पज्जिस्सतीति?

पच्छिमभविकानं तेसं तत्थ वेदनाक्खन्धो उप्पज्जित्थ, नो च तेसं तत्थ सञ्ञाक्खन्धो उप्पज्जिस्सति. इतरेसं चतुवोकारानं पञ्चवोकारानं तेसं तत्थ वेदनाक्खन्धो च उप्पज्जित्थ सञ्ञाक्खन्धो च उप्पज्जिस्सति.

(ख) यस्स वा पन यत्थ सञ्ञाक्खन्धो उप्पज्जिस्सति तस्स तत्थ वेदनाक्खन्धो उप्पज्जित्थाति? आमन्ता.

(घ) पच्चनीकपुग्गलो

९८. (क) यस्स रूपक्खन्धो नुप्पज्जित्थ तस्स वेदनाक्खन्धो नुप्पज्जिस्सतीति? नत्थि.

(ख) यस्स वा पन वेदनाक्खन्धो नुप्पज्जिस्सति तस्स रूपक्खन्धो नुप्पज्जित्थाति? उप्पज्जित्थ.

९९. (क) यस्स वेदनाक्खन्धो नुप्पज्जित्थ तस्स सञ्ञाक्खन्धो नुप्पज्जिस्सतीति? नत्थि.

(ख) यस्स वा पन सञ्ञाक्खन्धो नुप्पज्जिस्सति तस्स वेदनाक्खन्धो नुप्पज्जित्थाति? उप्पज्जित्थ.

(ङ) पच्चनीकओकासो

१००. (क) यत्थ रूपक्खन्धो नुप्पज्जित्थ तत्थ वेदनाक्खन्धो नुप्पज्जिस्सतीति? उप्पज्जिस्सति.

(ख) यत्थ वा पन वेदनाक्खन्धो नुप्पज्जिस्सति तत्थ रूपक्खन्धो नुप्पज्जित्थाति? उप्पज्जित्थ.

१०१. (क) यत्थ वेदनाक्खन्धो नुप्पज्जित्थ तत्थ सञ्ञाक्खन्धो नुप्पज्जिस्सतीति? आमन्ता.

(ख) यत्थ वा पन सञ्ञाक्खन्धो नुप्पज्जिस्सति तत्थ वेदनाक्खन्धो नुप्पज्जित्थाति? आमन्ता.

(च) पच्चनीकपुग्गलोकासा

१०२. (क) यस्स यत्थ रूपक्खन्धो नुप्पज्जित्थ तस्स तत्थ वेदनाक्खन्धो नुप्पज्जिस्सतीति?

अरूपानं तेसं तत्थ रूपक्खन्धो नुप्पज्जित्थ, नो च तेसं तत्थ वेदनाक्खन्धो नुप्पज्जिस्सति. सुद्धावासानं अरूपे पच्छिमभविकानं तेसं तत्थ रूपक्खन्धो च नुप्पज्जित्थ वेदनाक्खन्धो च नुप्पज्जिस्सति.

(ख) यस्स वा पन यत्थ वेदनाक्खन्धो नुप्पज्जिस्सति तस्स तत्थ रूपक्खन्धो नुप्पज्जित्थाति?

पञ्चवोकारे पच्छिमभविकानं असञ्ञसत्तानं तेसं तत्थ वेदनाक्खन्धो नुप्पज्जिस्सति, नो च तेसं तत्थ रूपक्खन्धो नुप्पज्जित्थ. सुद्धावासानं अरूपे पच्छिमभविकानं तेसं तत्थ वेदनाक्खन्धो च नुप्पज्जिस्सति रूपक्खन्धो च नुप्पज्जित्थ.

१०३. (क) यस्स यत्थ वेदनाक्खन्धो नुप्पज्जित्थ तस्स तत्थ सञ्ञाक्खन्धो नुप्पज्जिस्सतीति? आमन्ता.

(ख) यस्स वा पन यत्थ सञ्ञाक्खन्धो नुप्पज्जिस्सति तस्स तत्थ वेदनाक्खन्धो नुप्पज्जित्थाति?

पच्छिमभविकानं तेसं तत्थ सञ्ञाक्खन्धो नुप्पज्जिस्सति, नो च तेसं तत्थ वेदनाक्खन्धो नुप्पज्जित्थ. सुद्धावासानं असञ्ञसत्तानं तेसं तत्थ सञ्ञाक्खन्धो च नुप्पज्जिस्सति वेदनाक्खन्धो च नुप्पज्जित्थ.

उप्पादवारो निट्ठितो.