(४) पच्चुप्पन्नातीतवारो

(क) अनुलोमपुग्गलो

६८. (क) यस्स रूपक्खन्धो उप्पज्जति तस्स वेदनाक्खन्धो उप्पज्जित्थाति? आमन्ता.

(ख) यस्स वा पन वेदनाक्खन्धो उप्पज्जित्थ तस्स रूपक्खन्धो उप्पज्जतीति?

सब्बेसं चवन्तानं अरूपं उपपज्जन्तानं तेसं वेदनाक्खन्धो उप्पज्जित्थ, नो च तेसं रूपक्खन्धो उप्पज्जति. पञ्चवोकारं उपपज्जन्तानं असञ्ञसत्तं उपपज्जन्तानं तेसं वेदनाक्खन्धो च उप्पज्जित्थ रूपक्खन्धो च उप्पज्जति.

६९. (क) यस्स वेदनाक्खन्धो उप्पज्जति तस्स सञ्ञाक्खन्धो उप्पज्जित्थाति? आमन्ता.

(ख) यस्स वा पन सञ्ञाक्खन्धो उप्पज्जित्थ तस्स वेदनाक्खन्धो उप्पज्जतीति?

सब्बेसं चवन्तानं असञ्ञसत्तं उपपज्जन्तानं तेसं सञ्ञाक्खन्धो उप्पज्जित्थ, नो च तेसं वेदनाक्खन्धो उप्पज्जति. चतुवोकारं पञ्चवोकारं उपपज्जन्तानं तेसं सञ्ञाक्खन्धो च उप्पज्जित्थ वेदनाक्खन्धो च उप्पज्जति.

(ख) अनुलोमओकासो

७०. (क) यत्थ रूपक्खन्धो उप्पज्जति तत्थ वेदनाक्खन्धो उप्पज्जित्थाति?

असञ्ञसत्ते तत्थ रूपक्खन्धो उप्पज्जति, नो च तत्थ वेदनाक्खन्धो उप्पज्जित्थ. पञ्चवोकारे तत्थ रूपक्खन्धो च उप्पज्जति वेदनाक्खन्धो च उप्पज्जित्थ.

(ख) यत्थ वा पन वेदनाक्खन्धो उप्पज्जित्थ तत्थ रूपक्खन्धो उप्पज्जतीति?

अरूपे तत्थ वेदनाक्खन्धो उप्पज्जित्थ, नो च तत्थ रूपक्खन्धो उप्पज्जति. पञ्चवोकारे तत्थ वेदनाक्खन्धो च उप्पज्जित्थ रूपक्खन्धो च उप्पज्जति.

७१. (क) यत्थ वेदनाक्खन्धो उप्पज्जति तत्थ सञ्ञाक्खन्धो उप्पज्जित्थाति? आमन्ता.

(ख) यत्थ वा पन सञ्ञाक्खन्धो उप्पज्जित्थ तत्थ वेदनाक्खन्धो उप्पज्जतीति? आमन्ता.

(ग) अनुलोमपुग्गलोकासा

७२. (क) यस्स यत्थ रूपक्खन्धो उप्पज्जति तस्स तत्थ वेदनाक्खन्धो उप्पज्जित्थाति?

सुद्धावासं उपपज्जन्तानं असञ्ञसत्तं उपपज्जन्तानं तेसं तत्थ रूपक्खन्धो उप्पज्जति, नो च तेसं तत्थ वेदनाक्खन्धो उप्पज्जित्थ. इतरेसं पञ्चवोकारं उपपज्जन्तानं तेसं तत्थ रूपक्खन्धो च उप्पज्जति वेदनाक्खन्धो च उप्पज्जित्थ.

(ख) यस्स वा पन यत्थ वेदनाक्खन्धो उप्पज्जित्थ तस्स तत्थ रूपक्खन्धो उप्पज्जतीति?

पञ्चवोकारा चवन्तानं अरूपानं तेसं तत्थ वेदनाक्खन्धो उप्पज्जित्थ, नो च तेसं तत्थ रूपक्खन्धो उप्पज्जति. पञ्चवोकारं उपपज्जन्तानं तेसं तत्थ वेदनाक्खन्धो च उप्पज्जित्थ रूपक्खन्धो च उप्पज्जति.

७३. (क) यस्स यत्थ वेदनाक्खन्धो उप्पज्जति तस्स तत्थ सञ्ञाक्खन्धो उप्पज्जित्थाति?

सुद्धावासं उपपज्जन्तानं तेसं तत्थ वेदनाक्खन्धो उप्पज्जति, नो च तेसं तत्थ सञ्ञाक्खन्धो उप्पज्जित्थ. इतरेसं चतुवोकारं पञ्चवोकारं उपपज्जन्तानं तेसं तत्थ वेदनाक्खन्धो च उप्पज्जति सञ्ञाक्खन्धो च उप्पज्जित्थ.

(ख) यस्स वा पन यत्थ सञ्ञाक्खन्धो उप्पज्जित्थ तस्स तत्थ वेदनाक्खन्धो उप्पज्जतीति?

चतुवोकारा पञ्चवोकारा चवन्तानं तेसं तत्थ सञ्ञाक्खन्धो उप्पज्जित्थ, नो च तेसं तत्थ वेदनाक्खन्धो उप्पज्जति. चतुवोकारं पञ्चवोकारं उपपज्जन्तानं तेसं तत्थ सञ्ञाक्खन्धो च उप्पज्जित्थ वेदनाक्खन्धो च उप्पज्जति.

(घ) पच्चनीकपुग्गलो

७४. (क) यस्स रूपक्खन्धो नुप्पज्जति तस्स वेदनाक्खन्धो नुप्पज्जित्थाति? उप्पज्जित्थ.

(ख) यस्स वा पन वेदनाक्खन्धो नुप्पज्जित्थ तस्स रूपक्खन्धो नुप्पज्जतीति? नत्थि.

७५. (क) यस्स वेदनाक्खन्धो नुप्पज्जति तस्स सञ्ञाक्खन्धो नुप्पज्जित्थाति? उप्पज्जित्थ.

(ख) यस्स वा पन सञ्ञाक्खन्धो नुप्पज्जित्थ तस्स वेदनाक्खन्धो नुप्पज्जतीति? नत्थि.

(ङ) पच्चनीकओकासो

७६. (क) यत्थ रूपक्खन्धो नुप्पज्जति तत्थ वेदनाक्खन्धो नुप्पज्जित्थाति? उप्पज्जित्थ.

(ख) यत्थ वा पन वेदनाक्खन्धो नुप्पज्जित्थ तत्थ रूपक्खन्धो नुप्पज्जतीति? उप्पज्जति.

७७. (क) यत्थ वेदनाक्खन्धो नुप्पज्जति तत्थ सञ्ञाक्खन्धो नुप्पज्जित्थाति? आमन्ता.

(ख) यत्थ वा पन सञ्ञाक्खन्धो नुप्पज्जित्थ तत्थ वेदनाक्खन्धो नुप्पज्जतीति? आमन्ता.

(च) पच्चनीकपुग्गलोकासा

७८. (क) यस्स यत्थ रूपक्खन्धो नुप्पज्जति तस्स तत्थ वेदनाक्खन्धो नुप्पज्जित्थाति?

पञ्चवोकारा चवन्तानं अरूपानं तेसं तत्थ रूपक्खन्धो नुप्पज्जति, नो च तेसं तत्थ वेदनाक्खन्धो नुप्पज्जित्थ. सुद्धावासे परिनिब्बन्तानं असञ्ञसत्ता चवन्तानं तेसं तत्थ रूपक्खन्धो च नुप्पज्जति वेदनाक्खन्धो च नुप्पज्जित्थ.

(ख) यस्स वा पन यत्थ वेदनाक्खन्धो नुप्पज्जित्थ तस्स तत्थ रूपक्खन्धो नुप्पज्जतीति?

सुद्धावासं उपपज्जन्तानं असञ्ञसत्तं उपपज्जन्तानं तेसं तत्थ वेदनाक्खन्धो नुप्पज्जित्थ, नो च तेसं तत्थ रूपक्खन्धो नुप्पज्जति. सुद्धावासे परिनिब्बन्तानं असञ्ञसत्ता चवन्तानं तेसं तत्थ वेदनाक्खन्धो च नुप्पज्जित्थ रूपक्खन्धो च नुप्पज्जति.

७९. (क) यस्स यत्थ वेदनाक्खन्धो नुप्पज्जति तस्स तत्थ सञ्ञाक्खन्धो नुप्पज्जित्थाति?

चतुवोकारा पञ्चवोकारा चवन्तानं तेसं तत्थ वेदनाक्खन्धो नुप्पज्जति, नो च तेसं तत्थ सञ्ञाक्खन्धो नुप्पज्जित्थ. सुद्धावासे परिनिब्बन्तानं असञ्ञसत्तानं तेसं तत्थ वेदनाक्खन्धो च नुप्पज्जति सञ्ञाक्खन्धो च नुप्पज्जित्थ.

(ख) यस्स वा पन यत्थ सञ्ञाक्खन्धो नुप्पज्जित्थ तस्स तत्थ वेदनाक्खन्धो नुप्पज्जतीति?

सुद्धावासं उपपज्जन्तानं तेसं तत्थ सञ्ञाक्खन्धो नुप्पज्जित्थ, नो च तेसं तत्थ वेदनाक्खन्धो नुप्पज्जति. सुद्धावासे परिनिब्बन्तानं असञ्ञसत्तानं तेसं तत्थ सञ्ञाक्खन्धो च नुप्पज्जित्थ वेदनाक्खन्धो च नुप्पज्जति.