(३) अनागतवारो

(क) अनुलोमपुग्गलो

६२. (क) यस्स रूपक्खन्धो उप्पज्जिस्सति तस्स वेदनाक्खन्धो उप्पज्जिस्सतीति? आमन्ता.

(ख) यस्स वा पन वेदनाक्खन्धो उप्पज्जिस्सति तस्स रूपक्खन्धो उप्पज्जिस्सतीति?

ये अरूपं उपपज्जित्वा परिनिब्बायिस्सन्ति तेसं वेदनाक्खन्धो उप्पज्जिस्सति, नो च तेसं रूपक्खन्धो उप्पज्जिस्सति. इतरेसं तेसं वेदनाक्खन्धो च उप्पज्जिस्सति रूपक्खन्धो च उप्पज्जिस्सति.

(ख) अनुलोमओकासो

६३. (क) यत्थ रूपक्खन्धो उप्पज्जिस्सति तत्थ वेदनाक्खन्धो उप्पज्जिस्सतीति?

असञ्ञसत्ते तत्थ रूपक्खन्धो उप्पज्जिस्सति, नो च तत्थ वेदनाक्खन्धो उप्पज्जिस्सति. पञ्चवोकारे तत्थ रूपक्खन्धो च उप्पज्जिस्सति वेदनाक्खन्धो च उप्पज्जिस्सति.

(ख) यत्थ वा पन वेदनाक्खन्धो उप्पज्जिस्सति तत्थ रूपक्खन्धो उप्पज्जिस्सतीति?

अरूपे तत्थ वेदनाक्खन्धो उप्पज्जिस्सति, नो च तत्थ रूपक्खन्धो उप्पज्जिस्सति. पञ्चवोकारे तत्थ वेदनाक्खन्धो च उप्पज्जिस्सति रूपक्खन्धो च उप्पज्जिस्सति.

(ग) अनुलोमपुग्गलोकासा

६४. (क) यस्स यत्थ रूपक्खन्धो उप्पज्जिस्सति तस्स तत्थ वेदनाक्खन्धो उप्पज्जिस्सतीति?

असञ्ञसत्तानं तेसं तत्थ रूपक्खन्धो उप्पज्जिस्सति, नो च तेसं तत्थ वेदनाक्खन्धो उप्पज्जिस्सति. पञ्चवोकारानं तेसं तत्थ रूपक्खन्धो च उप्पज्जिस्सति वेदनाक्खन्धो च उप्पज्जिस्सति.

(ख) यस्स वा पन यत्थ वेदनाक्खन्धो उप्पज्जिस्सति तस्स तत्थ रूपक्खन्धो उप्पज्जिस्सतीति?

अरूपानं तेसं तत्थ वेदनाक्खन्धो उप्पज्जिस्सति, नो च तेसं तत्थ रूपक्खन्धो उप्पज्जिस्सति. पञ्चवोकारानं तेसं तत्थ वेदनाक्खन्धो च उप्पज्जिस्सति रूपक्खन्धो च उप्पज्जिस्सति.

(घ) पच्चनीकपुग्गलो

६५. (क) यस्स रूपक्खन्धो नुप्पज्जिस्सति तस्स वेदनाक्खन्धो नुप्पज्जिस्सतीति?

ये अरूपं उपपज्जित्वा परिनिब्बायिस्सन्ति तेसं रूपक्खन्धो नुप्पज्जिस्सति, नो च तेसं वेदनाक्खन्धो नुप्पज्जिस्सति. पच्छिमभविकानं तेसं रूपक्खन्धो च नुप्पज्जिस्सति वेदनाक्खन्धो च नुप्पज्जिस्सति.

(ख) यस्स वा पन वेदनाक्खन्धो नुप्पज्जिस्सति तस्स रूपक्खन्धो नुप्पज्जिस्सतीति? आमन्ता.

(ङ) पच्चनीकओकासो

६६. (क) यत्थ रूपक्खन्धो नुप्पज्जिस्सति तत्थ वेदनाक्खन्धो नुप्पज्जिस्सतीति? उप्पज्जिस्सति.

(ख) यत्थ वा पन वेदनाक्खन्धो नुप्पज्जिस्सति तत्थ रूपक्खन्धो नुप्पज्जिस्सतीति? उप्पज्जिस्सति.

(च) पच्चनीकपुग्गलोकासा

६७. (क) यस्स यत्थ रूपक्खन्धो नुप्पज्जिस्सति तस्स तत्थ वेदनाक्खन्धो नुप्पज्जिस्सतीति?

अरूपानं तेसं तत्थ रूपक्खन्धो नुप्पज्जिस्सति, नो च तेसं तत्थ वेदनाक्खन्धो नुप्पज्जिस्सति. पच्छिमभविकानं तेसं तत्थ रूपक्खन्धो च नुप्पज्जिस्सति वेदनाक्खन्धो च नुप्पज्जिस्सति.

(ख) यस्स वा पन यत्थ वेदनाक्खन्धो नुप्पज्जिस्सति तस्स तत्थ रूपक्खन्धो नुप्पज्जिस्सतीति?

असञ्ञसत्तानं तेसं तत्थ वेदनाक्खन्धो नुप्पज्जिस्सति, नो च तेसं तत्थ रूपक्खन्धो नुप्पज्जिस्सति. पच्छिमभविकानं तेसं तत्थ वेदनाक्खन्धो च नुप्पज्जिस्सति रूपक्खन्धो च नुप्पज्जिस्सति.