(२) अतीतवारो

(क) अनुलोमपुग्गलो

५६. (क) यस्स रूपक्खन्धो उप्पज्जित्थ तस्स वेदनाक्खन्धो उप्पज्जित्थाति? आमन्ता.

(ख) यस्स वा पन वेदनाक्खन्धो उप्पज्जित्थ तस्स रूपक्खन्धो उप्पज्जित्थाति? आमन्ता.

(ख) अनुलोमओकासो

५७. (क) यत्थ रूपक्खन्धो उप्पज्जित्थ तत्थ वेदनाक्खन्धो उप्पज्जित्थाति?

असञ्ञसत्ते तत्थ रूपक्खन्धो उप्पज्जित्थ, नो च तत्थ वेदनाक्खन्धो उप्पज्जित्थ. पञ्चवोकारे तत्थ रूपक्खन्धो च उप्पज्जित्थ वेदनाक्खन्धो च उप्पज्जित्थ.

(ख) यत्थ वा पन वेदनाक्खन्धो उप्पज्जित्थ तत्थ रूपक्खन्धो उप्पज्जित्थाति?

अरूपे तत्थ वेदनाक्खन्धो उप्पज्जित्थ, नो च तत्थ रूपक्खन्धो उप्पज्जित्थ. पञ्चवोकारे तत्थ वेदनाक्खन्धो च उप्पज्जित्थ रूपक्खन्धो च उप्पज्जित्थ.

(ग) अनुलोमपुग्गलोकासा

५८. (क) यस्स यत्थ रूपक्खन्धो उप्पज्जित्थ तस्स तत्थ वेदनाक्खन्धो उप्पज्जित्थाति?

असञ्ञसत्तानं तेसं तत्थ रूपक्खन्धो उप्पज्जित्थ, नो च तेसं तत्थ वेदनाक्खन्धो उप्पज्जित्थ. पञ्चवोकारानं तेसं तत्थ रूपक्खन्धो च उप्पज्जित्थ वेदनाक्खन्धो च उप्पज्जित्थ.

(ख) यस्स वा पन यत्थ वेदनाक्खन्धो उप्पज्जित्थ तस्स तत्थ रूपक्खन्धो उप्पज्जित्थाति?

अरूपानं तेसं तत्थ वेदनाक्खन्धो उप्पज्जित्थ, नो च तेसं तत्थ रूपक्खन्धो उप्पज्जित्थ. पञ्चवोकारानं तेसं तत्थ वेदनाक्खन्धो च उप्पज्जित्थ रूपक्खन्धो च उप्पज्जित्थ.

(घ) पच्चनीकपुग्गलो

५९. (क) यस्स रूपक्खन्धो नुप्पज्जित्थ तस्स वेदनाक्खन्धो नुप्पज्जित्थाति? नत्थि.

(ख) यस्स वा पन वेदनाक्खन्धो नुप्पज्जित्थ तस्स रूपक्खन्धो नुप्पज्जित्थाति? नत्थि.

(ङ) पच्चनीकओकासो

६०. (क) यत्थ रूपक्खन्धो नुप्पज्जित्थ तत्थ वेदनाक्खन्धो नुप्पज्जित्थाति? उप्पज्जित्थ.

(ख) यत्थ वा पन वेदनाक्खन्धो नुप्पज्जित्थ तत्थ रूपक्खन्धो नुप्पज्जित्थाति? उप्पज्जित्थ.

(च) पच्चनीकपुग्गलोकासा

६१. (क) यस्स यत्थ रूपक्खन्धो नुप्पज्जित्थ तस्स तत्थ वेदनाक्खन्धो नुप्पज्जित्थाति?

अरूपानं तेसं तत्थ रूपक्खन्धो नुप्पज्जित्थ, नो च तेसं तत्थ वेदनाक्खन्धो नुप्पज्जित्थ. सुद्धावासानं तेसं तत्थ रूपक्खन्धो च नुप्पज्जित्थ वेदनाक्खन्धो च नुप्पज्जित्थ.

(क) यस्स वा पन यत्थ वेदनाक्खन्धो नुप्पज्जित्थ तस्स तत्थ रूपक्खन्धो नुप्पज्जित्थाति?

असञ्ञसत्तानं तेसं तत्थ वेदनाक्खन्धो नुप्पज्जित्थ, नो च तेसं तत्थ रूपक्खन्धो नुप्पज्जित्थ. सुद्धावासानं तेसं तत्थ वेदनाक्खन्धो च नुप्पज्जित्थ रूपक्खन्धो च नुप्पज्जित्थ.