(१) पच्चुप्पन्नवारो

(क) अनुलोमपुग्गलो

५०. (क) यस्स रूपक्खन्धो उप्पज्जति तस्स वेदनाक्खन्धो उप्पज्जतीति?

असञ्ञसत्तं उपपज्जन्तानं तेसं रूपक्खन्धो उप्पज्जति, नो च तेसं वेदनाक्खन्धो उप्पज्जति. पञ्चवोकारं उपपज्जन्तानं तेसं रूपक्खन्धो च उप्पज्जति वेदनाक्खन्धो च उप्पज्जति.

(ख) यस्स वा पन वेदनाक्खन्धो उप्पज्जति तस्स रूपक्खन्धो उप्पज्जतीति?

अरूपं उपपज्जन्तानं तेसं वेदनाक्खन्धो उप्पज्जति, नो च तेसं रूपक्खन्धो उप्पज्जति. पञ्चवोकारं उपपज्जन्तानं तेसं वेदनाक्खन्धो च उप्पज्जति रूपक्खन्धो च उप्पज्जति.

(ख) अनुलोमओकासो

५१. (क) यत्थ रूपक्खन्धो उप्पज्जति तत्थ वेदनाक्खन्धो उप्पज्जतीति?

असञ्ञसत्ते तत्थ रूपक्खन्धो उप्पज्जति, नो च तत्थ वेदनाक्खन्धो उप्पज्जति. पञ्चवोकारे तत्थ रूपक्खन्धो च उप्पज्जति वेदनाक्खन्धो च उप्पज्जति.

(ख) यत्थ वा पन वेदनाक्खन्धो उप्पज्जति तत्थ रूपक्खन्धो उप्पज्जतीति?

अरूपे तत्थ वेदनाक्खन्धो उप्पज्जति, नो च तत्थ रूपक्खन्धो उप्पज्जति. पञ्चवोकारे तत्थ वेदनाक्खन्धो च उप्पज्जति रूपक्खन्धो च उप्पज्जति.

(ग) अनुलोमपुग्गलोकासा

५२. (क) यस्स यत्थ रूपक्खन्धो उप्पज्जति तस्स तत्थ वेदनाक्खन्धो उप्पज्जतीति?

असञ्ञसत्तं उपपज्जन्तानं तेसं तत्थ रूपक्खन्धो उप्पज्जति, नो च तेसं तत्थ वेदनाक्खन्धो उप्पज्जति. पञ्चवोकारं उपपज्जन्तानं तेसं तत्थ रूपक्खन्धो च उप्पज्जति वेदनाक्खन्धो च उप्पज्जति.

(ख) यस्स वा पन यत्थ वेदनाक्खन्धो उप्पज्जति तस्स तत्थ रूपक्खन्धो उप्पज्जतीति?

अरूपं उपपज्जन्तानं तेसं तत्थ वेदनाक्खन्धो उप्पज्जति, नो च तेसं तत्थ रूपक्खन्धो उप्पज्जति. पञ्चवोकारं उपपज्जन्तानं तेसं तत्थ वेदनाक्खन्धो च उप्पज्जति रूपक्खन्धो च उप्पज्जति.

(घ) पच्चनीकपुग्गलो

५३. (क) यस्स रूपक्खन्धो नुप्पज्जति तस्स वेदनाक्खन्धो नुप्पज्जतीति?

अरूपं उपपज्जन्तानं तेसं रूपक्खन्धो नुप्पज्जति, नो च तेसं वेदनाक्खन्धो नुप्पज्जति. सब्बेसं चवन्तानं तेसं रूपक्खन्धो च नुप्पज्जति वेदनाक्खन्धो च नुप्पज्जति.

(ख) यस्स वा पन वेदनाक्खन्धो नुप्पज्जति तस्स रूपक्खन्धो नुप्पज्जतीति?

असञ्ञसत्तं उपपज्जन्तानं तेसं वेदनाक्खन्धो नुप्पज्जति, नो च तेसं रूपक्खन्धो नुप्पज्जति. सब्बेसं चवन्तानं तेसं वेदनाक्खन्धो च नुप्पज्जति रूपक्खन्धो च नुप्पज्जति.

(ङ) पच्चनीकओकासो

५४. (क) यत्थ रूपक्खन्धो नुप्पज्जति तत्थ वेदनाक्खन्धो नुप्पज्जतीति? उप्पज्जति.

(ख) यत्थ वा पन वेदनाक्खन्धो नुप्पज्जति तत्थ रूपक्खन्धो नुप्पज्जतीति? उप्पज्जति.

(च) पच्चनीकपुग्गलोकासा

५५. (क) यस्स यत्थ रूपक्खन्धो नुप्पज्जति तस्स तत्थ वेदनाक्खन्धो नुप्पज्जतीति?

अरूपं उपपज्जन्तानं तेसं तत्थ रूपक्खन्धो नुप्पज्जति, नो च तेसं तत्थ वेदनाक्खन्धो नुप्पज्जति. सब्बेसं चवन्तानं तेसं तत्थ रूपक्खन्धो च नुप्पज्जति वेदनाक्खन्धो च नुप्पज्जति.

(ख) यस्स वा पन यत्थ वेदनाक्खन्धो नुप्पज्जति तस्स तत्थ रूपक्खन्धो नुप्पज्जतीति?

असञ्ञसत्तं उपपज्जन्तानं तेसं तत्थ वेदनाक्खन्धो नुप्पज्जति, नो च तेसं तत्थ रूपक्खन्धो नुप्पज्जति. सब्बेसं चवन्तानं तेसं तत्थ वेदनाक्खन्धो च नुप्पज्जति रूपक्खन्धो च नुप्पज्जति.