(३) मूलकनयो

९२. (क) ये केचि नामा धम्मा, सब्बे ते नाममूलकाति?

अहेतुकं नामं न नाममूलकं. सहेतुकं नामं नाममूलकं.

(ख) ये वा पन नाममूलका, सब्बे ते धम्मा नामाति?

नामसमुट्ठानं रूपं नाममूलकं, न नामं. नामं नाममूलकञ्चेव नामञ्च.

९३. (क) ये केचि नामा धम्मा, सब्बे ते नाममूलेन एकमूलकाति?

अहेतुकं नामं नाममूलेन न एकमूलकं. सहेतुकं नामं नाममूलेन एकमूलकं.

(ख) ये वा पन नाममूलेन एकमूलका, सब्बे ते धम्मा नामाति?

नामसमुट्ठानं रूपं नाममूलेन एकमूलकं, न नामं. नामं नाममूलेन एकमूलकञ्चेव नामञ्च.

९४. (क) ये केचि नाममूलेन एकमूलका धम्मा, सब्बे ते नाममूलेन अञ्ञमञ्ञमूलकाति?

मूलानि यानि एकतो उप्पज्जन्ति नाममूलानि एकमूलकानि चेव अञ्ञमञ्ञमूलकानि च. अवसेसा नाममूलसहजाता धम्मा नाममूलेन एकमूलका, न च अञ्ञमञ्ञमूलका.

(ख) ये वा पन नाममूलेन अञ्ञमञ्ञमूलका, सब्बे ते धम्मा नामाति? आमन्ता.