(४) मूलमूलकनयो

९५. (क) ये केचि नामा धम्मा, सब्बे ते नाममूलमूलकाति?

अहेतुकं नामं न नाममूलमूलकं. सहेतुकं नामं नाममूलमूलकं.

(ख) ये वा पन नाममूलमूलका, सब्बे ते धम्मा नामाति?

नामसमुट्ठानं रूपं नाममूलमूलकं, न नामं. नामं नाममूलमूलकञ्चेव नामञ्च.

९६. (क) ये केचि नामा धम्मा, सब्बे ते नाममूलेन एकमूलमूलकाति?

अहेतुकं नामं नाममूलेन न एकमूलमूलकं. सहेतुकं नामं नाममूलेन एकमूलमूलकं.

(ख) ये वा पन नाममूलेन एकमूलमूलका, सब्बे ते धम्मा नामाति?

नामसमुट्ठानं रूपं नाममूलेन एकमूलमूलकं, न नामं. नामं नाममूलेन एकमूलमूलकञ्चेव नामञ्च.

९७. (क) ये केचि नाममूलेन एकमूलमूलका धम्मा, सब्बे ते नाममूलेन अञ्ञमञ्ञमूलमूलकाति?

मूलानि यानि एकतो उप्पज्जन्ति नाममूलानि एकमूलमूलकानि चेव अञ्ञमञ्ञमूलमूलकानि च. अवसेसा नाममूलसहजाता धम्मा नाममूलेन एकमूलमूलका, न च अञ्ञमञ्ञमूलमूलका.

(ख) ये वा पन नाममूलेन अञ्ञमञ्ञमूलमूलका, सब्बे ते धम्मा नामाति?

आमन्ता.

मूलवारनिद्देसो.