(२) मूलमूलनयो

८९. (क) ये केचि नामा धम्मा, सब्बे ते नाममूलमूलाति?

नवेव नाममूलमूलानि. अवसेसा नामा धम्मा न नाममूलमूला.

(ख) ये वा पन नाममूलमूला, सब्बे ते धम्मा नामाति? आमन्ता.

९०. (क) ये केचि नामा धम्मा, सब्बे ते नाममूलेन एकमूलमूलाति?

अहेतुकं नामं नाममूलेन न एकमूलमूलं. सहेतुकं नामं नाममूलेन एकमूलमूलं.

(ख) ये वा पन नाममूलेन एकमूलमूला, सब्बे ते धम्मा नामाति?

नामसमुट्ठानं रूपं नाममूलेन एकमूलमूलं, न नामं. नामं नाममूलेन एकमूलमूलञ्चेव नामञ्च.

९१. (क) ये केचि नाममूलेन एकमूलमूला धम्मा, सब्बे ते नाममूलेन अञ्ञमञ्ञमूलमूलाति?

मूलानि यानि एकतो उप्पज्जन्ति नाममूलानि एकमूलमूलानि चेव अञ्ञमञ्ञमूलमूलानि च. अवसेसा नाममूलसहजाता धम्मा नाममूलेन एकमूलमूला, न च अञ्ञमञ्ञमूलमूला.

(ख) ये वा पन नाममूलेन अञ्ञमञ्ञमूलमूला, सब्बे ते धम्मा नामाति? आमन्ता.