२. अकुसला धम्मा (१) मूलनयो

६२. (क) ये केचि अकुसला धम्मा, सब्बे ते अकुसलमूलाति?

तीणेव अकुसलमूलानि. अवसेसा अकुसला धम्मा न अकुसलमूला.

(ख) ये वा पन अकुसलमूला, सब्बे ते धम्मा अकुसलाति? आमन्ता.

६३. (क) ये केचि अकुसला धम्मा, सब्बे ते अकुसलमूलेन एकमूलाति?

अहेतुकं अकुसलं अकुसलमूलेन न एकमूलं. सहेतुकं अकुसलं अकुसलमूलेन एकमूलं.

(ख) ये वा पन अकुसलमूलेन एकमूला, सब्बे ते धम्मा अकुसलाति?

अकुसलसमुट्ठानं रूपं अकुसलमूलेन एकमूलं, न अकुसलं. अकुसलं अकुसलमूलेन एकमूलञ्चेव अकुसलञ्च.

६४. (क) ये केचि अकुसलमूलेन एकमूला धम्मा, सब्बे ते अकुसलमूलेन अञ्ञमञ्ञमूलाति?

मूलानि यानि एकतो उप्पज्जन्ति अकुसलमूलानि एकमूलानि चेव अञ्ञमञ्ञमूलानि च. अवसेसा अकुसलमूलसहजाता धम्मा अकुसलमूलेन एकमूला, न च अञ्ञमञ्ञमूला.

(ख) ये वा पन अकुसलमूलेन अञ्ञमञ्ञमूला, सब्बे ते धम्मा अकुसलाति? आमन्ता.

(२) मूलमूलनयो

६५. (क) ये केचि अकुसला धम्मा, सब्बे ते अकुसलमूलमूलाति?

तीणेव अकुसलमूलमूलानि. अवसेसा अकुसला धम्मा न अकुसलमूलमूला.

(ख) ये वा पन अकुसलमूलमूला, सब्बे ते धम्मा अकुसलाति? आमन्ता.

६६. (क) ये केचि अकुसला धम्मा, सब्बे ते अकुसलमूलेन एकमूलमूलाति?

अहेतुकं अकुसलं अकुसलमूलेन न एकमूलमूलं. सहेतुकं अकुसलं अकुसलमूलेन एकमूलमूलं.

(ख) ये वा पन अकुसलमूलेन एकमूलमूला, सब्बे ते धम्मा अकुसलाति?

अकुसलसमुट्ठानं रूपं अकुसलमूलेन एकमूलमूलं, न अकुसलं. अकुसलं अकुसलमूलेन एकमूलमूलञ्चेव अकुसलञ्च.

६७. (क) ये केचि अकुसलमूलेन एकमूलमूला धम्मा, सब्बे ते अकुसलमूलेन अञ्ञमञ्ञमूलमूलाति?

मूलानि यानि एकतो उप्पज्जन्ति अकुसलमूलानि एकमूलमूलानि चेव अञ्ञमञ्ञमूलमूलानि च. अवसेसा अकुसलमूलसहजाता धम्मा अकुसलमूलेन एकमूलमूला, न च अञ्ञमञ्ञमूलमूला.

(ख) ये वा पन अकुसलमूलेन अञ्ञमञ्ञमूलमूला, सब्बे ते धम्मा अकुसलाति? आमन्ता.

(३) मूलकनयो

६८. (क) ये केचि अकुसला धम्मा, सब्बे ते अकुसलमूलकाति?

अहेतुकं अकुसलं न अकुसलमूलकं. सहेतुकं अकुसलं अकुसलमूलकं.

(ख) ये वा पन अकुसलमूलका, सब्बे ते धम्मा अकुसलाति?

अकुसलसमुट्ठानं रूपं अकुसलमूलकं न अकुसलं. अकुसलं अकुसलमूलकञ्चेव अकुसलञ्च.

६९. (क) ये केचि अकुसला धम्मा, सब्बे ते अकुसलमूलेन एकमूलकाति?

अहेतुकं अकुसलं अकुसलमूलेन न एकमूलकं. सहेतुकं अकुसलं अकुसलमूलेन एकमूलकं.

(ख) ये वा पन अकुसलमूलेन एकमूलका, सब्बे ते धम्मा अकुसलाति?

अकुसलसमुट्ठानं रूपं अकुसलमूलेन एकमूलकं, न अकुसलं. अकुसलं अकुसलमूलेन एकमूलकञ्चेव अकुसलञ्च.

७०. (क) ये केचि अकुसलमूलेन एकमूलका धम्मा, सब्बे ते अकुसलमूलेन अञ्ञमञ्ञमूलकाति?

मूलानि यानि एकतो उप्पज्जन्ति अकुसलमूलानि एकमूलकानि चेव अञ्ञमञ्ञमूलकानि च. अवसेसा अकुसलमूलसहजाता धम्मा अकुसलमूलेन एकमूलका न च अञ्ञमञ्ञमूलका.

(ख) ये वा पन अकुसलमूलेन अञ्ञमञ्ञमूलका, सब्बे ते धम्मा अकुसलाति? आमन्ता.

(४) मूलमूलकनयो

७१. (क) ये केचि अकुसला धम्मा, सब्बे ते अकुसलमूलमूलकाति?

अहेतुकं अकुसलं न अकुसलमूलमूलकं. सहेतुकं अकुसलं अकुसलमूलमूलकं.

(ख) ये वा पन अकुसलमूलमूलका, सब्बे ते धम्मा अकुसलाति?

अकुसलसमुट्ठानं रूपं अकुसलमूलमूलकं न अकुसलं. अकुसलं अकुसलमूलमूलकञ्चेव अकुसलञ्च.

७२. (क) ये केचि अकुसला धम्मा, सब्बे ते अकुसलमूलेन एकमूलमूलकाति?

अहेतुकं अकुसलं अकुसलमूलेन न एकमूलमूलकं. सहेतुकं अकुसलं अकुसलमूलेन एकमूलमूलकं.

(ख) ये वा पन अकुसलमूलेन एकमूलमूलका, सब्बे ते धम्मा अकुसलाति?

अकुसलसमुट्ठानं रूपं अकुसलमूलेन एकमूलमूलकं, न अकुसलं. अकुसलं अकुसलमूलेन एकमूलमूलकञ्चेव अकुसलञ्च.

७३. (क) ये केचि अकुसलमूलेन एकमूलमूलका धम्मा, सब्बे ते अकुसलमूलेन अञ्ञमञ्ञमूलमूलकाति?

मूलानि यानि एकतो उप्पज्जन्ति अकुसलमूलानि एकमूलमूलकानि चेव अञ्ञमञ्ञमूलमूलकानि च. अवसेसा अकुसलमूलसहजाता धम्मा अकुसलमूलेन एकमूलमूलका, न च अञ्ञमञ्ञमूलमूलका.

(ख) ये वा पन अकुसलमूलेन अञ्ञमञ्ञमूलमूलका, सब्बे ते धम्मा अकुसलाति? आमन्ता.