३. अब्याकता धम्मा (१) मूलनयो

७४. (क) ये केचि अब्याकता धम्मा, सब्बे ते अब्याकतमूलाति?

तीणेव अब्याकतमूलानि. अवसेसा अब्याकता धम्मा न अब्याकतमूला.

(ख) ये वा पन अब्याकतमूला, सब्बे ते धम्मा अब्याकताति? आमन्ता.

७५. (क) ये केचि अब्याकता धम्मा, सब्बे ते अब्याकतमूलेन एकमूलाति?

अहेतुकं अब्याकतं अब्याकतमूलेन न एकमूलं. सहेतुकं अब्याकतं अब्याकतमूलेन एकमूलं.

(ख) ये वा पन अब्याकतमूलेन एकमूला, सब्बे ते धम्मा अब्याकताति? आमन्ता.

७६. (क) ये केचि अब्याकतमूलेन एकमूला धम्मा, सब्बे ते अब्याकतमूलेन अञ्ञमञ्ञमूलाति?

मूलानि यानि एकतो उप्पज्जन्ति अब्याकतमूलानि एकमूलानि चेव अञ्ञमञ्ञमूलानि च. अवसेसा अब्याकतमूलसहजाता धम्मा अब्याकतमूलेन एकमूला, न च अञ्ञमञ्ञमूला.

(ख) ये वा पन अब्याकतमूलेन अञ्ञमञ्ञमूला, सब्बे ते धम्मा अब्याकताति? आमन्ता.

(२) मूलमूलनयो

७७. (क) ये केचि अब्याकता धम्मा, सब्बे ते अब्याकतमूलमूलाति?

तीणेव अब्याकतमूलमूलानि. अवसेसा अब्याकता धम्मा न अब्याकतमूलमूला.

(ख) ये वा पन अब्याकतमूलमूला, सब्बे ते धम्मा अब्याकताति? आमन्ता.

७८. (क) ये केचि अब्याकता धम्मा, सब्बे ते अब्याकतमूलेन एकमूलमूलाति?

अहेतुकं अब्याकतं अब्याकतमूलेन न एकमूलमूलं. सहेतुकं अब्याकतं अब्याकतमूलेन एकमूलमूलं.

(ख) ये वा पन अब्याकतमूलेन एकमूलमूला, सब्बे ते धम्मा अब्याकताति? आमन्ता.

७९. (क) ये केचि अब्याकतमूलेन एकमूलमूला धम्मा, सब्बे ते अब्याकतमूलेन अञ्ञमञ्ञमूलमूलाति?

मूलानि यानि एकतो उप्पज्जन्ति अब्याकतमूलानि एकमूलमूलानि चेव अञ्ञमञ्ञमूलमूलानि च. अवसेसा अब्याकतमूलसहजाता धम्मा अब्याकतमूलेन एकमूलमूला, न च अञ्ञमञ्ञमूलमूला.

(ख) ये वा पन अब्याकतमूलेन अञ्ञमञ्ञमूलमूला, सब्बे ते धम्मा अब्याकताति? आमन्ता.

(३) मूलकनयो

८०. (क) ये केचि अब्याकता धम्मा, सब्बे ते अब्याकतमूलकाति?

अहेतुकं अब्याकतं न अब्याकतमूलकं. सहेतुकं अब्याकतं अब्याकतमूलकं.

(ख) ये वा पन अब्याकतमूलका, सब्बे ते धम्मा अब्याकताति? आमन्ता.

८१. (क) ये केचि अब्याकता धम्मा, सब्बे ते अब्याकतमूलेन एकमूलकाति?

अहेतुकं अब्याकतं अब्याकतमूलेन न एकमूलकं. सहेतुकं अब्याकतं अब्याकतमूलेन एकमूलकं.

(ख) ये वा पन अब्याकतमूलेन एकमूलका, सब्बे ते धम्मा अब्याकताति? आमन्ता.

८२. (क) ये केचि अब्याकतमूलेन एकमूलका धम्मा, सब्बे ते अब्याकतमूलेन अञ्ञमञ्ञमूलकाति?

मूलानि यानि एकतो उप्पज्जन्ति अब्याकतमूलानि एकमूलकानि चेव अञ्ञमञ्ञमूलकानि च. अवसेसा अब्याकतमूलसहजाता धम्मा अब्याकतमूलेन एकमूलका, न च अञ्ञमञ्ञमूलका.

(ख) ये वा पन अब्याकतमूलेन अञ्ञमञ्ञमूलका, सब्बे ते धम्मा अब्याकताति? आमन्ता.

(४) मूलमूलकनयो

८३. (क) ये केचि अब्याकता धम्मा, सब्बे ते अब्याकतमूलमूलकाति?

अहेतुकं अब्याकतं न अब्याकतमूलमूलकं. सहेतुकं अब्याकतं अब्याकतमूलमूलकं.

(ख) ये वा पन अब्याकतमूलमूलका, सब्बे ते धम्मा अब्याकताति? आमन्ता.

८४. (क) ये केचि अब्याकता धम्मा, सब्बे ते अब्याकतमूलेन एकमूलमूलकाति?

अहेतुकं अब्याकतं अब्याकतमूलेन न एकमूलमूलकं. सहेतुकं अब्याकतं अब्याकतमूलेन एकमूलमूलकं.

(ख) ये वा पन अब्याकतमूलेन एकमूलमूलका, सब्बे ते धम्मा अब्याकताति? आमन्ता.

८५. (क) ये केचि अब्याकतमूलेन एकमूलमूलका धम्मा, सब्बे ते अब्याकतमूलेन अञ्ञमञ्ञमूलमूलकाति?

मूलानि यानि एकतो उप्पज्जन्ति अब्याकतमूलानि एकमूलमूलकानि चेव अञ्ञमञ्ञमूलमूलकानि च. अवसेसा अब्याकतमूलसहजाता धम्मा अब्याकतमूलेन एकमूलमूलका, न च अञ्ञमञ्ञमूलमूलका.

(ख) ये वा पन अब्याकतमूलेन अञ्ञमञ्ञमूलमूलका, सब्बे ते धम्मा अब्याकताति? आमन्ता.