(२) मूलमूलनयो

५३. (क) ये केचि कुसला धम्मा, सब्बे ते कुसलमूलमूलाति? तीणेव कुसलमूलमूलानि. अवसेसा कुसला धम्मा न कुसलमूलमूला.

(ख) ये वा पन कुसलमूलमूला, सब्बे ते धम्मा कुसलाति? आमन्ता.

५४. (क) ये केचि कुसला धम्मा, सब्बे ते कुसलमूलेन एकमूलमूलाति? आमन्ता.

(ख) ये वा पन कुसलमूलेन एकमूलमूला, सब्बे ते धम्मा कुसलाति?

कुसलसमुट्ठानं रूपं कुसलमूलेन एकमूलमूलं, न कुसलं. कुसलं कुसलमूलेन एकमूलमूलञ्चेव कुसलञ्च.

५५. (क) ये केचि कुसलमूलेन एकमूलमूला धम्मा, सब्बे ते कुसलमूलेन अञ्ञमञ्ञमूलमूलाति?

मूलानि यानि एकतो उप्पज्जन्ति कुसलमूलानि एकमूलमूलानि चेव अञ्ञमञ्ञमूलमूलानि च. अवसेसा कुसलमूलसहजाता धम्मा कुसलमूलेन एकमूलमूला, न च अञ्ञमञ्ञमूलमूला.

(ख) ये वा पन कुसलमूलेन अञ्ञमञ्ञमूलमूला, सब्बे ते धम्मा कुसलाति? आमन्ता.