(३) मूलकनयो

५६. (क) ये केचि कुसला धम्मा, सब्बे ते कुसलमूलकाति? आमन्ता.

(ख) ये वा पन कुसलमूलका, सब्बे ते धम्मा कुसलाति?

कुसलसमुट्ठानं रूपं कुसलमूलकं न कुसलं. कुसलं कुसलमूलकञ्चेव कुसलञ्च.

५७. (क) ये केचि कुसला धम्मा, सब्बे ते कुसलमूलेन एकमूलकाति? आमन्ता.

(ख) ये वा पन कुसलमूलेन एकमूलका, सब्बे ते धम्मा कुसलाति?

कुसलसमुट्ठानं रूपं कुसलमूलेन एकमूलकं, न कुसलं. कुसलं कुसलमूलेन एकमूलकञ्चेव कुसलञ्च.

५८. (क) ये केचि कुसलमूलेन एकमूलका धम्मा, सब्बे ते कुसलमूलेन अञ्ञमञ्ञमूलकाति?

मूलानि यानि एकतो उप्पज्जन्ति कुसलमूलानि एकमूलकानि चेव अञ्ञमञ्ञमूलकानि च. अवसेसा कुसलमूलसहजाता धम्मा कुसलमूलेन एकमूलका, न च अञ्ञमञ्ञमूलका.

(ख) ये वा पन कुसलमूलेन अञ्ञमञ्ञमूलका, सब्बे ते धम्मा कुसलाति? आमन्ता.