(२) लोकियदुकं

१०४४. पञ्चन्नं खन्धानं कति लोकिया, कति लोकुत्तरा? द्वादसन्नं आयतनानं कति लोकिया, कति लोकुत्तरा? अट्ठारसन्नं धातूनं कति लोकिया, कति लोकुत्तरा? चतुन्नं सच्चानं कति लोकिया, कति लोकुत्तरा…पे… सत्तन्नं चित्तानं कति लोकिया, कति लोकुत्तरा?

रूपक्खन्धो लोकियो. चत्तारो खन्धा सिया लोकिया, सिया लोकुत्तरा. दसायतना लोकिया. द्वे आयतना सिया लोकिया, सिया लोकुत्तरा. सोळस धातुयो लोकिया. द्वे धातुयो सिया लोकिया, सिया लोकुत्तरा. द्वे सच्चा लोकिया. द्वे सच्चा लोकुत्तरा.

दसिन्द्रिया लोकिया. तीणिन्द्रिया लोकुत्तरा. नविन्द्रिया सिया लोकिया, सिया लोकुत्तरा. तयो अकुसलहेतू लोकिया. छ हेतू सिया लोकिया, सिया लोकुत्तरा. कबळीकारो आहारो लोकियो. तयो आहारा सिया लोकिया, सिया लोकुत्तरा. छ फस्सा लोकिया. मनोविञ्ञाणधातुसम्फस्सो सिया लोकियो, सिया लोकुत्तरो. छ वेदना लोकिया. मनोविञ्ञाणधातुसम्फस्सजा वेदना सिया लोकिया, सिया लोकुत्तरा. छ सञ्ञा लोकिया. मनोविञ्ञाणधातुसम्फस्सजा सञ्ञा सिया लोकिया, सिया लोकुत्तरा. छ चेतना लोकिया. मनोविञ्ञाणधातुसम्फस्सजा चेतना सिया लोकिया, सिया लोकुत्तरा. छ चित्ता लोकिया. मनोविञ्ञाणधातु सिया लोकिया, सिया लोकुत्तराति.

अभिञ्ञा द्वे सारम्मणा, दिट्ठा कुसलवेदना;

विपाका च उपादिन्ना, वितक्कं रूपलोकियाति.

धम्महदयविभङ्गो निट्ठितो.

विभङ्गपकरणं निट्ठितं.