१. कुसलत्तिकं

१०३८. पञ्चन्नं खन्धानं कति कुसला, कति अकुसला, कति अब्याकता…पे… सत्तन्नं चित्तानं कति कुसला, कति अकुसला, कति अब्याकता?

रूपक्खन्धो अब्याकतो. चत्तारो खन्धा सिया कुसला, सिया अकुसला, सिया अब्याकता. दसायतना अब्याकता. द्वायतना सिया कुसला, सिया अकुसला, सिया अब्याकता. सोळस धातुयो अब्याकता. द्वे धातुयो सिया कुसला, सिया अकुसला, सिया अब्याकता. समुदयसच्चं अकुसलं. मग्गसच्चं कुसलं. निरोधसच्चं अब्याकतं. दुक्खसच्चं सिया कुसलं, सिया अकुसलं, सिया अब्याकतं.

दसिन्द्रिया अब्याकता. दोमनस्सिन्द्रियं अकुसलं. अनञ्ञातञ्ञस्सामीतिन्द्रियं कुसलं. चत्तारिन्द्रिया सिया कुसला, सिया अब्याकता. छ इन्द्रिया सिया कुसला, सिया अकुसला, सिया अब्याकता.

तयो कुसलहेतू कुसला. तयो अकुसलहेतू अकुसला. तयो अब्याकतहेतू अब्याकता. कबळीकारो आहारो अब्याकतो. तयो आहारा सिया कुसला, सिया अकुसला, सिया अब्याकता. छ फस्सा अब्याकता. मनोविञ्ञाणधातुसम्फस्सो सिया कुसलो, सिया अकुसलो, सिया अब्याकतो. छ वेदना… छ सञ्ञा… छ चेतना… छ चित्ता अब्याकता. मनोविञ्ञाणधातु सिया कुसला, सिया अकुसला, सिया अब्याकता.