९. नवकनिद्देसो

८०८. तत्थ कतमा नवसु अनुपुब्बविहारसमापत्तीसु पञ्ञा? पठमज्झानसमापत्तिया पञ्ञा, दुतियज्झानसमापत्तिया पञ्ञा, ततियज्झानसमापत्तिया पञ्ञा, चतुत्थज्झानसमापत्तिया पञ्ञा, आकासानञ्चायतनसमापत्तिया पञ्ञा, विञ्ञाणञ्चायतनसमापत्तिया पञ्ञा, आकिञ्चञ्ञायतनसमापत्तिया पञ्ञा, नेवसञ्ञानासञ्ञायतनसमापत्तिया पञ्ञा, सञ्ञावेदयितनिरोधसमापत्तिया वुट्ठितस्स पच्चवेक्खणाञाणं – इमा नवसु अनुपुब्बविहारसमापत्तीसु पञ्ञा. एवं नवविधेन ञाणवत्थु.

नवकं.