५. पञ्चकनिद्देसो

८०४. (१) तत्थ कतमो पञ्चङ्गिको सम्मासमाधि? पीतिफरणता, सुखफरणता, चेतोफरणता, आलोकफरणता, पच्चवेक्खणानिमित्तं. द्वीसु झानेसु पञ्ञा पीतिफरणता. तीसु झानेसु पञ्ञा सुखफरणता. परचित्ते ञाणं चेतोफरणता. दिब्बचक्खु आलोकफरणता. तम्हा तम्हा समाधिम्हा वुट्ठितस्स पच्चवेक्खणाञाणं पच्चवेक्खणानिमित्तं. अयं वुच्चति पञ्चङ्गिको सम्मासमाधि.

(२) तत्थ कतमो पञ्चञाणिको सम्मासमाधि? ‘‘अयं समाधि पच्चुप्पन्नसुखो चेव आयतिञ्च सुखविपाको’’ति पच्चत्तञ्ञेव ञाणं उप्पज्जति. ‘‘अयं समाधि अरियो निरामिसो’’ति पच्चत्तञ्ञेव ञाणं उप्पज्जति. ‘‘अयं समाधि अकापुरिससेवितो’’ति पच्चत्तञ्ञेव ञाणं उप्पज्जति. ‘‘अयं समाधि सन्तो पणीतो पटिप्पस्सद्धलद्धो एकोदिभावाधिगतो न ससङ्खारनिग्गय्हवारितगतो’’ति पच्चत्तञ्ञेव ञाणं उप्पज्जति. सो खो पनाहं इमं समाधिं सतो समापज्जामि सतो वुट्ठहामी’’ति पच्चत्तञ्ञेव ञाणं उप्पज्जति. अयं पञ्चञाणिको सम्मासमाधि. एवं पञ्चविधेन ञाणवत्थु.

पञ्चकं.