१. सुत्तन्तभाजनीयं

४६६. सत्त बोज्झङ्गा – सतिसम्बोज्झङ्गो, धम्मविचयसम्बोज्झङ्गो, वीरियसम्बोज्झङ्गो, पीतिसम्बोज्झङ्गो, पस्सद्धिसम्बोज्झङ्गो, समाधिसम्बोज्झङ्गो, उपेक्खासम्बोज्झङ्गो.

४६७. तत्थ कतमो सतिसम्बोज्झङ्गो? इध भिक्खु सतिमा होति परमेन सतिनेपक्केन समन्नागतो, चिरकतम्पि चिरभासितम्पि सरिता होति अनुस्सरिता – अयं वुच्चति ‘‘सतिसम्बोज्झङ्गो’’.

सो तथा सतो विहरन्तो तं धम्मं पञ्ञाय पविचिनति पविचरति परिवीमंसमापज्जति – अयं वुच्चति ‘‘धम्मविचयसम्बोज्झङ्गो’’.

तस्स तं धम्मं पञ्ञाय पविचिनतो पविचरतो परिवीमंसमापज्जतो आरद्धं होति वीरियं असल्लीनं – अयं वुच्चति ‘‘वीरियसम्बोज्झङ्गो’’.

आरद्धवीरियस्स उप्पज्जति पीति निरामिसा – अयं वुच्चति ‘‘पीतिसम्बोज्झङ्गो’’.

पीतिमनस्स कायोपि पस्सम्भति, चित्तम्पि पस्सम्भति – अयं वुच्चति ‘‘पस्सद्धिसम्बोज्झङ्गो’’.

पस्सद्धकायस्स सुखिनो चित्तं समाधियति – अयं वुच्चति ‘‘समाधिसम्बोज्झङ्गो’’.

सो तथा समाहितं चित्तं साधुकं अज्झुपेक्खिता होति – अयं वुच्चति ‘‘उपेक्खासम्बोज्झङ्गो’’.

४६८. सत्त बोज्झङ्गा – सतिसम्बोज्झङ्गो, धम्मविचयसम्बोज्झङ्गो, वीरियसम्बोज्झङ्गो, पीतिसम्बोज्झङ्गो, पस्सद्धिसम्बोज्झङ्गो, समाधिसम्बोज्झङ्गो, उपेक्खासम्बोज्झङ्गो.

४६९. तत्थ कतमो सतिसम्बोज्झङ्गो? अत्थि अज्झत्तं धम्मेसु सति, अत्थि बहिद्धा धम्मेसु सति. यदपि अज्झत्तं धम्मेसु सति तदपि सतिसम्बोज्झङ्गो अभिञ्ञाय सम्बोधाय निब्बानाय संवत्तति. यदपि बहिद्धा धम्मेसु सति तदपि सतिसम्बोज्झङ्गो अभिञ्ञाय सम्बोधाय निब्बानाय संवत्तति.

तत्थ कतमो धम्मविचयसम्बोज्झङ्गो? अत्थि अज्झत्तं धम्मेसु पविचयो, अत्थि बहिद्धा धम्मेसु पविचयो. यदपि अज्झत्तं धम्मेसु पविचयो तदपि धम्मविचयसम्बोज्झङ्गो अभिञ्ञाय सम्बोधाय निब्बानाय संवत्तति. यदपि बहिद्धा धम्मेसु पविचयो तदपि धम्मविचयसम्बोज्झङ्गो अभिञ्ञाय सम्बोधाय निब्बानाय संवत्तति.

तत्थ कतमो वीरियसम्बोज्झङ्गो? अत्थि कायिकं वीरियं, अत्थि चेतसिकं वीरियं. यदपि कायिकं वीरियं तदपि वीरियसम्बोज्झङ्गो अभिञ्ञाय सम्बोधाय निब्बानाय संवत्तति. यदपि चेतसिकं वीरियं तदपि वीरियसम्बोज्झङ्गो अभिञ्ञाय सम्बोधाय निब्बानाय संवत्तति.

तत्थ कतमो पीतिसम्बोज्झङ्गो? अत्थि सवितक्कसविचारा पीति, अत्थि अवितक्कअविचारा पीति. यदपि सवितक्कसविचारा पीति तदपि पीतिसम्बोज्झङ्गो अभिञ्ञाय सम्बोधाय निब्बानाय संवत्तति. यदपि अवितक्कअविचारा पीति तदपि पीतिसम्बोज्झङ्गो अभिञ्ञाय सम्बोधाय निब्बानाय संवत्तति.

तत्थ कतमो पस्सद्धिसम्बोज्झङ्गो? अत्थि कायपस्सद्धि [कायप्पस्सद्धि (स्या. क.)], अत्थि चित्तपस्सद्धि [चित्तप्पस्सद्धि (स्या. क.)]. यदपि कायपस्सद्धि तदपि पस्सद्धिसम्बोज्झङ्गो अभिञ्ञाय सम्बोधाय निब्बानाय संवत्तति. यदपि चित्तपस्सद्धि तदपि पस्सद्धिसम्बोज्झङ्गो अभिञ्ञाय सम्बोधाय निब्बानाय संवत्तति.

तत्थ कतमो समाधिसम्बोज्झङ्गो? अत्थि सवितक्को सविचारो समाधि, अत्थि अवितक्को अविचारो समाधि. यदपि सवितक्को सविचारो समाधि तदपि समाधिसम्बोज्झङ्गो अभिञ्ञाय सम्बोधाय निब्बानाय संवत्तति. यदपि अवितक्को अविचारो समाधि तदपि समाधिसम्बोज्झङ्गो अभिञ्ञाय सम्बोधाय निब्बानाय संवत्तति.

तत्थ कतमो उपेक्खासम्बोज्झङ्गो? अत्थि अज्झत्तं धम्मेसु उपेक्खा, अत्थि बहिद्धा धम्मेसु उपेक्खा. यदपि अज्झत्तं धम्मेसु उपेक्खा तदपि उपेक्खासम्बोज्झङ्गो अभिञ्ञाय सम्बोधाय निब्बानाय संवत्तति. यदपि बहिद्धा धम्मेसु उपेक्खा तदपि उपेक्खासम्बोज्झङ्गो अभिञ्ञाय सम्बोधाय निब्बानाय संवत्तति.

४७०. सत्त बोज्झङ्गा – सतिसम्बोज्झङ्गो, धम्मविचयसम्बोज्झङ्गो, वीरियसम्बोज्झङ्गो, पीतिसम्बोज्झङ्गो, पस्सद्धिसम्बोज्झङ्गो, समाधिसम्बोज्झङ्गो, उपेक्खासम्बोज्झङ्गो.

४७१. तत्थ कतमो सतिसम्बोज्झङ्गो? इध भिक्खु सतिसम्बोज्झङ्गं भावेति विवेकनिस्सितं विरागनिस्सितं निरोधनिस्सितं वोस्सग्गपरिणामिं, धम्मविचयसम्बोज्झङ्गं भावेति…पे… वीरियसम्बोज्झङ्गं भावेति… पीतिसम्बोज्झङ्गं भावेति… पस्सद्धिसम्बोज्झङ्गं भावेति… समाधिसम्बोज्झङ्गं भावेति… उपेक्खासम्बोज्झङ्गं भावेति विवेकनिस्सितं विरागनिस्सितं निरोधनिस्सितं वोस्सग्गपरिणामिं.

सुत्तन्तभाजनीयं.