२. अभिधम्मभाजनीयं

४७२. सत्त बोज्झङ्गा – सतिसम्बोज्झङ्गो, धम्मविचयसम्बोज्झङ्गो, वीरियसम्बोज्झङ्गो, पीतिसम्बोज्झङ्गो, पस्सद्धिसम्बोज्झङ्गो, समाधिसम्बोज्झङ्गो, उपेक्खासम्बोज्झङ्गो.

४७३. तत्थ कतमे सत्त बोज्झङ्गा? इध भिक्खु यस्मिं समये लोकुत्तरं झानं भावेति निय्यानिकं अपचयगामिं दिट्ठिगतानं पहानाय पठमाय भूमिया पत्तिया विविच्चेव कामेहि…पे… पठमं झानं उपसम्पज्ज विहरति दुक्खपटिपदं दन्धाभिञ्ञं, तस्मिं समये सत्त बोज्झङ्गा होन्ति – सतिसम्बोज्झङ्गो…पे… उपेक्खासम्बोज्झङ्गो.

४७४. तत्थ कतमो सतिसम्बोज्झङ्गो? या सति अनुस्सति…पे… सम्मासति सतिसम्बोज्झङ्गो मग्गङ्गं मग्गपरियापन्नं – अयं वुच्चति ‘‘सतिसम्बोज्झङ्गो’’.

तत्थ कतमो धम्मविचयसम्बोज्झङ्गो? या पञ्ञा पजानना…पे… अमोहो धम्मविचयो सम्मादिट्ठि धम्मविचयसम्बोज्झङ्गो मग्गङ्गं मग्गपरियापन्नं – अयं वुच्चति ‘‘धम्मविचयसम्बोज्झङ्गो’’.

तत्थ कतमो वीरियसम्बोज्झङ्गो? यो चेतसिको वीरियारम्भो…पे… सम्मावायामो वीरियसम्बोज्झङ्गो मग्गङ्गं मग्गपरियापन्नं – अयं वुच्चति ‘‘वीरियसम्बोज्झङ्गो’’.

तत्थ कतमो पीतिसम्बोज्झङ्गो? या पीति पामोज्जं आमोदना पमोदना हासो पहासो वित्ति ओदग्यं [ओदग्गं (सी.) ध. स. ९] अत्तमनता चित्तस्स पीतिसम्बोज्झङ्गो – अयं वुच्चति ‘‘पीतिसम्बोज्झङ्गो’’.

तत्थ कतमो पस्सद्धिसम्बोज्झङ्गो? या वेदनाक्खन्धस्स सञ्ञाक्खन्धस्स सङ्खारक्खन्धस्स विञ्ञाणक्खन्धस्स पस्सद्धि पटिप्पस्सद्धि पस्सम्भना पटिप्पस्सम्भना पटिप्पस्सम्भितत्तं पस्सद्धिसम्बोज्झङ्गो – अयं वुच्चति ‘‘पस्सद्धिसम्बोज्झङ्गो’’.

तत्थ कतमो समाधिसम्बोज्झङ्गो? या चित्तस्स ठिति…पे… सम्मासमाधि समाधिसम्बोज्झङ्गो मग्गङ्गं मग्गपरियापन्नं – अयं वुच्चति ‘‘समाधिसम्बोज्झङ्गो’’.

तत्थ कतमो उपेक्खासम्बोज्झङ्गो? या उपेक्खा उपेक्खना अज्झुपेक्खना मज्झत्तता चित्तस्स उपेक्खासम्बोज्झङ्गो – अयं वुच्चति ‘‘उपेक्खासम्बोज्झङ्गो’’. इमे वुच्चन्ति सत्त बोज्झङ्गा. अवसेसा धम्मा सत्तहि बोज्झङ्गेहि सम्पयुत्ता.

४७५. सत्त बोज्झङ्गा – सतिसम्बोज्झङ्गो…पे… उपेक्खासम्बोज्झङ्गो.

४७६. तत्थ कतमो सतिसम्बोज्झङ्गो? इध भिक्खु यस्मिं समये लोकुत्तरं झानं भावेति निय्यानिकं अपचयगामिं दिट्ठिगतानं पहानाय पठमाय भूमिया पत्तिया विविच्चेव कामेहि…पे… पठमं झानं उपसम्पज्ज विहरति दुक्खपटिपदं दन्धाभिञ्ञं, या तस्मिं समये सति अनुस्सति सम्मासति सतिसम्बोज्झङ्गो मग्गङ्गं मग्गपरियापन्नं – अयं वुच्चति ‘‘सतिसम्बोज्झङ्गो’’. अवसेसा धम्मा सतिसम्बोज्झङ्गसम्पयुत्ता…पे… अवसेसा धम्मा धम्मविचयसम्बोज्झङ्गसम्पयुत्ता…पे… अवसेसा धम्मा वीरियसम्बोज्झङ्गसम्पयुत्ता…पे… अवसेसा धम्मा पीतिसम्बोज्झङ्गसम्पयुत्ता…पे… अवसेसा धम्मा पस्सद्धिसम्बोज्झङ्गसम्पयुत्ता…पे… अवसेसा धम्मा समाधिसम्बोज्झङ्गसम्पयुत्ता.

तत्थ कतमो उपेक्खासम्बोज्झङ्गो? इध भिक्खु यस्मिं समये लोकुत्तरं झानं भावेति निय्यानिकं अपचयगामिं दिट्ठिगतानं पहानाय पठमाय भूमिया पत्तिया विविच्चेव कामेहि…पे… पठमं झानं उपसम्पज्ज विहरति दुक्खपटिपदं दन्धाभिञ्ञं, या तस्मिं समये उपेक्खा उपेक्खना अज्झुपेक्खना मज्झत्तता चित्तस्स उपेक्खासम्बोज्झङ्गो – अयं वुच्चति ‘‘उपेक्खासम्बोज्झङ्गो’’. अवसेसा धम्मा उपेक्खासम्बोज्झङ्गसम्पयुत्ता.

४७७. सत्त बोज्झङ्गा – सतिसम्बोज्झङ्गो…पे… उपेक्खासम्बोज्झङ्गो.

४७८. तत्थ कतमे सत्त बोज्झङ्गा? इध भिक्खु यस्मिं समये लोकुत्तरं झानं भावेति निय्यानिकं अपचयगामिं दिट्ठिगतानं पहानाय पठमाय भूमिया पत्तिया विविच्चेव कामेहि …पे… पठमं झानं उपसम्पज्ज विहरति दुक्खपटिपदं दन्धाभिञ्ञं, यो तस्मिं समये फस्सो होति…पे… अविक्खेपो होति – इमे धम्मा कुसला. तस्सेव लोकुत्तरस्स कुसलस्स झानस्स कतत्ता भावितत्ता विपाकं विविच्चेव कामेहि…पे… पठमं झानं उपसम्पज्ज विहरति दुक्खपटिपदं दन्धाभिञ्ञं सुञ्ञतं, तस्मिं समये सत्त बोज्झङ्गा होन्ति – सतिसम्बोज्झङ्गो…पे… उपेक्खासम्बोज्झङ्गो.

४७९. तत्थ कतमो सतिसम्बोज्झङ्गो? या सति अनुस्सति…पे… सम्मासति सतिसम्बोज्झङ्गो मग्गङ्गं मग्गपरियापन्नं – अयं वुच्चति ‘‘सतिसम्बोज्झङ्गो’’…पे….

तत्थ कतमो उपेक्खासम्बोज्झङ्गो? या उपेक्खा उपेक्खना अज्झुपेक्खना मज्झत्तता चित्तस्स उपेक्खासम्बोज्झङ्गो – अयं वुच्चति ‘‘उपेक्खासम्बोज्झङ्गो’’. इमे वुच्चन्ति ‘‘सत्त बोज्झङ्गा’’. अवसेसा धम्मा सत्तहि बोज्झङ्गेहि सम्पयुत्ता.

४८०. सत्त बोज्झङ्गा – सतिसम्बोज्झङ्गो…पे… उपेक्खासम्बोज्झङ्गो.

४८१. तत्थ कतमो सतिसम्बोज्झङ्गो? इध भिक्खु यस्मिं समये लोकुत्तरं झानं भावेति निय्यानिकं अपचयगामिं दिट्ठिगतानं पहानाय पठमाय भूमिया पत्तिया विविच्चेव कामेहि…पे… पठमं झानं उपसम्पज्ज विहरति दुक्खपटिपदं दन्धाभिञ्ञं, तस्मिं समये फस्सो होति…पे… अविक्खेपो होति. इमे धम्मा कुसला. तस्सेव लोकुत्तरस्स कुसलस्स झानस्स कतत्ता भावितत्ता विपाकं विविच्चेव कामेहि…पे… पठमं झानं उपसम्पज्ज विहरति दुक्खपटिपदं दन्धाभिञ्ञं, या तस्मिं समये सति अनुस्सति सम्मासति सतिसम्बोज्झङ्गो मग्गङ्गं मग्गपरियापन्नं – अयं वुच्चति ‘‘सतिसम्बोज्झङ्गो’’. अवसेसा धम्मा सतिसम्बोज्झङ्गसम्पयुत्ता…पे… अवसेसा धम्मा धम्मविचयसम्बोज्झङ्गसम्पयुत्ता …पे… अवसेसा धम्मा वीरियसम्बोज्झङ्गसम्पयुत्ता…पे… अवसेसा धम्मा पीतिसम्बोज्झङ्गसम्पयुत्ता…पे… अवसेसा धम्मा पस्सद्धिसम्बोज्झङ्गसम्पयुत्ता…पे… अवसेसा धम्मा समाधिसम्बोज्झङ्गसम्पयुत्ता.

तत्थ कतमो उपेक्खासम्बोज्झङ्गो? इध भिक्खु यस्मिं समये लोकुत्तरं झानं भावेति निय्यानिकं अपचयगामिं दिट्ठिगतानं पहानाय पठमाय भूमिया पत्तिया विविच्चेव कामेहि…पे… पठमं झानं उपसम्पज्ज विहरति दुक्खपटिपदं दन्धाभिञ्ञं, तस्मिं समये फस्सो होति…पे… अविक्खेपो होति. इमे धम्मा कुसला. तस्सेव लोकुत्तरस्स कुसलस्स झानस्स कतत्ता भावितत्ता विपाकं विविच्चेव कामेहि…पे… पठमं झानं उपसम्पज्ज विहरति दुक्खपटिपदं दन्धाभिञ्ञं सुञ्ञतं, या तस्मिं समये उपेक्खा उपेक्खना अज्झुपेक्खना मज्झत्तता चित्तस्स उपेक्खासम्बोज्झङ्गो – अयं वुच्चति ‘‘उपेक्खासम्बोज्झङ्गो’’. अवसेसा धम्मा उपेक्खासम्बोज्झङ्गसम्पयुत्ता.

अभिधम्मभाजनीयं.