३. सञ्ञाक्खन्धो

६२. तत्थ कतमो सञ्ञाक्खन्धो? एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि सहेतुको, अत्थि अहेतुको.

तिविधेन सञ्ञाक्खन्धो – अत्थि कुसलो, अत्थि अकुसलो, अत्थि अब्याकतो.

चतुब्बिधेन सञ्ञाक्खन्धो – अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो.

पञ्चविधेन सञ्ञाक्खन्धो – अत्थि सुखिन्द्रियसम्पयुत्तो, अत्थि दुक्खिन्द्रियसम्पयुत्तो, अत्थि सोमनस्सिन्द्रियसम्पयुत्तो, अत्थि दोमनस्सिन्द्रियसम्पयुत्तो, अत्थि उपेक्खिन्द्रियसम्पयुत्तो. एवं पञ्चविधेन सञ्ञाक्खन्धो.

छब्बिधेन सञ्ञाक्खन्धो – चक्खुसम्फस्सजा सञ्ञा, सोतसम्फस्सजा सञ्ञा, घानसम्फस्सजा सञ्ञा, जिव्हासम्फस्सजा सञ्ञा, कायसम्फस्सजा सञ्ञा, मनोसम्फस्सजा सञ्ञा. एवं छब्बिधेन सञ्ञाक्खन्धो.

सत्तविधेन सञ्ञाक्खन्धो – चक्खुसम्फस्सजा सञ्ञा, सोतसम्फस्सजा सञ्ञा, घानसम्फस्सजा सञ्ञा, जिव्हासम्फस्सजा सञ्ञा, कायसम्फस्सजा सञ्ञा, मनोधातुसम्फस्सजा सञ्ञा, मनोविञ्ञाणधातुसम्फस्सजा सञ्ञा. एवं सत्तविधेन सञ्ञाक्खन्धो.

अट्ठविधेन सञ्ञाक्खन्धो – चक्खुसम्फस्सजा सञ्ञा…पे… कायसम्फस्सजा सञ्ञा अत्थि सुखसहगता, अत्थि दुक्खसहगता, मनोधातुसम्फस्सजा सञ्ञा, मनोविञ्ञाणधातुसम्फस्सजा सञ्ञा. एवं अट्ठविधेन सञ्ञाक्खन्धो.

नवविधेन सञ्ञाक्खन्धो – चक्खुसम्फस्सजा सञ्ञा…पे… कायसम्फस्सजा सञ्ञा, मनोधातुसम्फस्सजा सञ्ञा, मनोविञ्ञाणधातुसम्फस्सजा सञ्ञा अत्थि कुसला, अत्थि अकुसला, अत्थि अब्याकता. एवं नवविधेन सञ्ञाक्खन्धो.

दसविधेन सञ्ञाक्खन्धो – चक्खुसम्फस्सजा सञ्ञा…पे… कायसम्फस्सजा सञ्ञा अत्थि सुखसहगता, अत्थि दुक्खसहगता, मनोधातुसम्फस्सजा सञ्ञा, मनोविञ्ञाणधातुसम्फस्सजा सञ्ञा अत्थि कुसला, अत्थि अकुसला, अत्थि अब्याकता. एवं दसविधेन सञ्ञाक्खन्धो.

६३. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि सहेतुको, अत्थि अहेतुको.

तिविधेन सञ्ञाक्खन्धो – अत्थि सुखाय वेदनाय सम्पयुत्तो, अत्थि दुक्खाय वेदनाय सम्पयुत्तो, अत्थि अदुक्खमसुखाय वेदनाय सम्पयुत्तो…पे…. एवं दसविधेन सञ्ञाक्खन्धो.

६४. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि सहेतुको, अत्थि अहेतुको.

तिविधेन सञ्ञाक्खन्धो – अत्थि विपाको, अत्थि विपाकधम्मधम्मो, अत्थि नेवविपाकनविपाकधम्मधम्मो. अत्थि उपादिन्नुपादानियो, अत्थि अनुपादिन्नुपादानियो, अत्थि अनुपादिन्नअनुपादानियो. अत्थि संकिलिट्ठसंकिलेसिको, अत्थि असंकिलिट्ठसंकिलेसिको, अत्थि असंकिलिट्ठअसंकिलेसिको. अत्थि सवितक्कसविचारो, अत्थि अवितक्कविचारमत्तो, अत्थि अवितक्कअविचारो. अत्थि पीतिसहगतो, अत्थि सुखसहगतो, अत्थि उपेक्खासहगतो. अत्थि दस्सनेन पहातब्बो, अत्थि भावनाय पहातब्बो, अत्थि नेव दस्सनेन न भावनाय पहातब्बो. अत्थि दस्सनेन पहातब्बहेतुको, अत्थि भावनाय पहातब्बहेतुको, अत्थि नेव दस्सनेन न भावनाय पहातब्बहेतुको. अत्थि आचयगामी, अत्थि अपचयगामी, अत्थि नेवाचयगामिनापचयगामी. अत्थि सेक्खो, अत्थि असेक्खो, अत्थि नेवसेक्खनासेक्खो. अत्थि परित्तो, अत्थि महग्गतो, अत्थि अप्पमाणो. अत्थि परित्तारम्मणो, अत्थि महग्गतारम्मणो, अत्थि अप्पमाणारम्मणो. अत्थि हीनो, अत्थि मज्झिमो, अत्थि पणीतो. अत्थि मिच्छत्तनियतो, अत्थि सम्मत्तनियतो, अत्थि अनियतो. अत्थि मग्गारम्मणो, अत्थि मग्गहेतुको, अत्थि मग्गाधिपति. अत्थि उप्पन्नो, अत्थि अनुप्पन्नो, अत्थि उप्पादी. अत्थि अतीतो, अत्थि अनागतो, अत्थि पच्चुप्पन्नो. अत्थि अतीतारम्मणो, अत्थि अनागतारम्मणो, अत्थि पच्चुप्पन्नारम्मणो. अत्थि अज्झत्तो, अत्थि बहिद्धो, अत्थि अज्झत्तबहिद्धो. अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो…पे… एवं दसविधेन सञ्ञाक्खन्धो.

६५. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि हेतुसम्पयुत्तो, अत्थि हेतुविप्पयुत्तो. अत्थि न हेतुसहेतुको, अत्थि न हेतुअहेतुको. अत्थि लोकियो, अत्थि लोकुत्तरो. अत्थि केनचि विञ्ञेय्यो, अत्थि केनचि न विञ्ञेय्यो. अत्थि सासवो, अत्थि अनासवो. अत्थि आसवसम्पयुत्तो, अत्थि आसवविप्पयुत्तो. अत्थि आसवविप्पयुत्तसासवो, अत्थि आसवविप्पयुत्तअनासवो. अत्थि संयोजनियो, अत्थि असंयोजनियो. अत्थि संयोजनसम्पयुत्तो, अत्थि संयोजनविप्पयुत्तो. अत्थि संयोजनविप्पयुत्तसंयोजनियो, अत्थि संयोजनविप्पयुत्तअसंयोजनियो. अत्थि गन्थनियो, अत्थि अगन्थनियो. अत्थि गन्थसम्पयुत्तो, अत्थि गन्थविप्पयुत्तो. अत्थि गन्थविप्पयुत्तगन्थनियो, अत्थि गन्थविप्पयुत्तअगन्थनियो. अत्थि ओघनियो, अत्थि अनोघनियो. अत्थि ओघसम्पयुत्तो, अत्थि ओघविप्पयुत्तो. अत्थि ओघविप्पयुत्तओघनियो, अत्थि ओघविप्पयुत्तअनोघनियो. अत्थि योगनियो, अत्थि अयोगनियो. अत्थि योगसम्पयुत्तो, अत्थि योगविप्पयुत्तो. अत्थि योगविप्पयुत्तयोगनियो, अत्थि योगविप्पयुत्तअयोगनियो. अत्थि नीवरणियो, अत्थि अनीवरणियो. अत्थि नीवरणसम्पयुत्तो, अत्थि नीवरणविप्पयुत्तो. अत्थि नीवरणविप्पयुत्तनीवरणियो, अत्थि नीवरणविप्पयुत्तअनीवरणियो. अत्थि परामट्ठो, अत्थि अपरामट्ठो. अत्थि परामाससम्पयुत्तो, अत्थि परामासविप्पयुत्तो. अत्थि परामासविप्पयुत्तपरामट्ठो, अत्थि परामासविप्पयुत्तअपरामट्ठो. अत्थि उपादिन्नो, अत्थि अनुपादिन्नो. अत्थि उपादानियो, अत्थि अनुपादानियो. अत्थि उपादानसम्पयुत्तो, अत्थि उपादानविप्पयुत्तो. अत्थि उपादानविप्पयुत्तउपादानियो, अत्थि उपादानविप्पयुत्तअनुपादानियो. अत्थि संकिलेसिको, अत्थि असंकिलेसिको. अत्थि संकिलिट्ठो, अत्थि असंकिलिट्ठो. अत्थि किलेससम्पयुत्तो, अत्थि किलेसविप्पयुत्तो. अत्थि किलेसविप्पयुत्तसंकिलेसिको, अत्थि किलेसविप्पयुत्तअसंकिलेसिको. अत्थि दस्सनेन पहातब्बो, अत्थि न दस्सनेन पहातब्बो. अत्थि भावनाय पहातब्बो, अत्थि न भावनाय पहातब्बो. अत्थि दस्सनेन पहातब्बहेतुको, अत्थि न दस्सनेन पहातब्बहेतुको. अत्थि भावनाय पहातब्बहेतुको, अत्थि न भावनाय पहातब्बहेतुको. अत्थि सवितक्को, अत्थि अवितक्को. अत्थि सविचारो, अत्थि अविचारो. अत्थि सप्पीतिको, अत्थि अप्पीतिको. अत्थि पीतिसहगतो, अत्थि न पीतिसहगतो. अत्थि सुखसहगतो, अत्थि न सुखसहगतो. अत्थि उपेक्खासहगतो, अत्थि न उपेक्खासहगतो. अत्थि कामावचरो, अत्थि न कामावचरो. अत्थि रूपावचरो, अत्थि न रूपावचरो. अत्थि अरूपावचरो, अत्थि न अरूपावचरो. अत्थि परियापन्नो, अत्थि अपरियापन्नो. अत्थि निय्यानिको, अत्थि अनिय्यानिको. अत्थि नियतो, अत्थि अनियतो. अत्थि सउत्तरो, अत्थि अनुत्तरो. अत्थि सरणो, अत्थि अरणो.

तिविधेन सञ्ञाक्खन्धो – अत्थि कुसलो, अत्थि अकुसलो, अत्थि अब्याकतो…पे…. एवं दसविधेन सञ्ञाक्खन्धो.

६६. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि सरणो, अत्थि अरणो.

तिविधेन सञ्ञाक्खन्धो – अत्थि सुखाय वेदनाय सम्पयुत्तो, अत्थि दुक्खाय वेदनाय सम्पयुत्तो, अत्थि अदुक्खमसुखाय वेदनाय सम्पयुत्तो. अत्थि विपाको…पे… अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो…पे…. एवं दसविधेन सञ्ञाक्खन्धो.

(यथा कुसलत्तिके वित्थारो, एवं सब्बेपि तिका वित्थारेतब्बा.)

दुकमूलकं.

६७. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि सहेतुको, अत्थि अहेतुको.

६८. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि हेतुसम्पयुत्तो, अत्थि हेतुविप्पयुत्तो…पे… अत्थि सरणो, अत्थि अरणो.

६९. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि सहेतुको, अत्थि अहेतुको.

७०. एकविधेन सञ्ञाक्खन्धो – फस्ससम्पयुत्तो.

तिविधेन सञ्ञाक्खन्धो…पे… अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो…पे…. एवं दसविधेन सञ्ञाक्खन्धो.

तिकमूलकं.

७१. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि सहेतुको, अत्थि अहेतुको.

७२. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि हेतुसम्पयुत्तो, अत्थि हेतुविप्पयुत्तो.

७३. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि न हेतु सहेतुको, अत्थि न हेतु अहेतुको.

तिविधेन सञ्ञाक्खन्धो – अत्थि विपाको, अत्थि विपाकधम्मधम्मो, अत्थि नेवविपाकनविपाकधम्मधम्मो…पे…. एवं दसविधेन सञ्ञाक्खन्धो.

७४. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि लोकियो, अत्थि लोकुत्तरो.

तिविधेन सञ्ञाक्खन्धो – अत्थि उपादिन्नुपादानियो, अत्थि अनुपादिन्नुपादानियो, अत्थि अनुपादिन्नअनुपादानियो…पे…. एवं दसविधेन सञ्ञाक्खन्धो.

७५. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि केनचि विञ्ञेय्यो, अत्थि केनचि न विञ्ञेय्यो.

तिविधेन सञ्ञाक्खन्धो – अत्थि संकिलिट्ठसंकिलेसिको, अत्थि असंकिलिट्ठसंकिलेसिको, अत्थि असंकिलिट्ठअसंकिलेसिको…पे…. एवं दसविधेन सञ्ञाक्खन्धो.

७६. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि सासवो, अत्थि अनासवो.

तिविधेन सञ्ञाक्खन्धो – अत्थि सवितक्कसविचारो, अत्थि अवितक्कविचारमत्तो, अत्थि अवितक्कअविचारो…पे…. एवं दसविधेन सञ्ञाक्खन्धो.

७७. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि आसवसम्पयुत्तो, अत्थि आसवविप्पयुत्तो.

तिविधेन सञ्ञाक्खन्धो – अत्थि पीतिसहगतो, अत्थि सुखसहगतो, अत्थि उपेक्खासहगतो…पे…. एवं दसविधेन सञ्ञाक्खन्धो.

७८. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि आसवविप्पयुत्तसासवो, अत्थि आसवविप्पयुत्तअनासवो.

तिविधेन सञ्ञाक्खन्धो – अत्थि दस्सनेन पहातब्बो, अत्थि भावनाय पहातब्बो, अत्थि नेव दस्सनेन न भावनाय पहातब्बो…पे…. एवं दसविधेन सञ्ञाक्खन्धो.

७९. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि संयोजनियो, अत्थि असंयोजनियो.

तिविधेन सञ्ञाक्खन्धो – अत्थि दस्सनेन पहातब्बहेतुको, अत्थि भावनाय पहातब्बहेतुको, अत्थि नेव दस्सनेन न भावनाय पहातब्बहेतुको…पे…. एवं दसविधेन सञ्ञाक्खन्धो.

८०. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि संयोजनसम्पयुत्तो, अत्थि संयोजनविप्पयुत्तो.

तिविधेन सञ्ञाक्खन्धो – अत्थि आचयगामी, अत्थि अपचयगामी, अत्थि नेवाचयगामिनापचयगामी…पे…. एवं दसविधेन सञ्ञाक्खन्धो.

८१. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि संयोजनविप्पयुत्तसंयोजनियो, अत्थि संयोजनविप्पयुत्तअसंयोजनियो.

तिविधेन सञ्ञाक्खन्धो – अत्थि सेक्खो, अत्थि असेक्खो, अत्थि नेवसेक्खनासेक्खो…पे…. एवं दसविधेन सञ्ञाक्खन्धो.

८२. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि गन्थनियो, अत्थि अगन्थनियो.

तिविधेन सञ्ञाक्खन्धो – अत्थि परित्तो, अत्थि महग्गतो, अत्थि अप्पमाणो…पे…. एवं दसविधेन सञ्ञाक्खन्धो.

८३. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि गन्थसम्पयुत्तो, अत्थि गन्थविप्पयुत्तो.

तिविधेन सञ्ञाक्खन्धो – अत्थि परित्तारम्मणो, अत्थि महग्गतारम्मणो, अत्थि अप्पमाणारम्मणो…पे…. एवं दसविधेन सञ्ञाक्खन्धो.

८४. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि गन्थविप्पयुत्तगन्थनियो, अत्थि गन्थविप्पयुत्तअगन्थनियो.

तिविधेन सञ्ञाक्खन्धो – अत्थि हीनो, अत्थि मज्झिमो, अत्थि पणीतो…पे…. एवं दसविधेन सञ्ञाक्खन्धो.

८५. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि ओघनियो, अत्थि अनोघनियो.

तिविधेन सञ्ञाक्खन्धो – अत्थि मिच्छत्तनियतो, अत्थि सम्मत्तनियतो, अत्थि अनियतो…पे…. एवं दसविधेन सञ्ञाक्खन्धो.

८६. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि ओघसम्पयुत्तो, अत्थि ओघविप्पयुत्तो.

तिविधेन सञ्ञाक्खन्धो – अत्थि मग्गारम्मणो, अत्थि मग्गहेतुको, अत्थि मग्गाधिपति…पे…. एवं दसविधेन सञ्ञाक्खन्धो.

८७. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि ओघविप्पयुत्तओघनियो, अत्थि ओघविप्पयुत्तअनोघनियो.

तिविधेन सञ्ञाक्खन्धो – अत्थि उप्पन्नो, अत्थि अनुप्पन्नो, अत्थि उप्पादी…पे…. एवं दसविधेन सञ्ञाक्खन्धो.

८८. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि योगनियो, अत्थि अयोगनियो.

तिविधेन सञ्ञाक्खन्धो – अत्थि अतीतो, अत्थि अनागतो, अत्थि पच्चुप्पन्नो…पे…. एवं दसविधेन सञ्ञाक्खन्धो.

८९. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि योगसम्पयुत्तो, अत्थि योगविप्पयुत्तो.

तिविधेन सञ्ञाक्खन्धो – अत्थि अतीतारम्मणो, अत्थि अनागतारम्मणो, अत्थि पच्चुप्पन्नारम्मणो…पे…. एवं दसविधेन सञ्ञाक्खन्धो.

९०. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि योगविप्पयुत्तयोगनियो, अत्थि योगविप्पयुत्तअयोगनियो.

तिविधेन सञ्ञाक्खन्धो – अत्थि अज्झत्तो, अत्थि बहिद्धो, अत्थि अज्झत्तबहिद्धो…पे…. एवं दसविधेन सञ्ञाक्खन्धो.

९१. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि नीवरणियो, अत्थि अनीवरणियो.

तिविधेन सञ्ञाक्खन्धो – अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो…पे…. एवं दसविधेन सञ्ञाक्खन्धो.

उभतोवड्ढकं.

सत्तविधेन सञ्ञाक्खन्धो – अत्थि कुसलो, अत्थि अकुसलो, अत्थि अब्याकतो, अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो. एवं सत्तविधेन सञ्ञाक्खन्धो.

अपरोपि सत्तविधेन सञ्ञाक्खन्धो – अत्थि सुखाय वेदनाय सम्पयुत्तो, अत्थि दुक्खाय वेदनाय सम्पयुत्तो, अत्थि अदुक्खमसुखाय वेदनाय सम्पयुत्तो, अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो…पे… अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो, अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो. एवं सत्तविधेन सञ्ञाक्खन्धो.

चतुवीसतिविधेन सञ्ञाक्खन्धो – चक्खुसम्फस्सपच्चया सञ्ञाक्खन्धो अत्थि कुसलो, अत्थि अकुसलो, अत्थि अब्याकतो; सोतसम्फस्सपच्चया…पे… घानसम्फस्सपच्चया…पे… जिव्हासम्फस्सपच्चया…पे… कायसम्फस्सपच्चया…पे… मनोसम्फस्सपच्चया सञ्ञाक्खन्धो अत्थि कुसलो, अत्थि अकुसलो, अत्थि अब्याकतो; चक्खुसम्फस्सजा सञ्ञा, सोतसम्फस्सजा सञ्ञा, घानसम्फस्सजा सञ्ञा, जिव्हासम्फस्सजा सञ्ञा, कायसम्फस्सजा सञ्ञा, मनोसम्फस्सजा सञ्ञा. एवं चतुवीसतिविधेन सञ्ञाक्खन्धो.

अपरोपि चतुवीसतिविधेन सञ्ञाक्खन्धो – चक्खुसम्फस्सपच्चया सञ्ञाक्खन्धो अत्थि सुखाय वेदनाय सम्पयुत्तो…पे… अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो, चक्खुसम्फस्सजा सञ्ञा…पे… मनोसम्फस्सजा सञ्ञा. सोतसम्फस्सपच्चया…पे… घानसम्फस्सपच्चया…पे… जिव्हासम्फस्सपच्चया…पे… कायसम्फस्सपच्चया…पे… मनोसम्फस्सपच्चया सञ्ञाक्खन्धो अत्थि सुखाय वेदनाय सम्पयुत्तो…पे… अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो; चक्खुसम्फस्सजा सञ्ञा…पे… मनोसम्फस्सजा सञ्ञा. एवं चतुवीसतिविधेन सञ्ञाक्खन्धो.

तिंसतिविधेन सञ्ञाक्खन्धो – चक्खुसम्फस्सपच्चया सञ्ञाक्खन्धो अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो, सोतसम्फस्सपच्चया…पे… घानसम्फस्सपच्चया …पे… जिव्हासम्फस्सपच्चया…पे… कायसम्फस्सपच्चया…पे… मनोसम्फस्सपच्चया सञ्ञाक्खन्धो अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो, चक्खुसम्फस्सजा सञ्ञा…पे… मनोसम्फस्सजा सञ्ञा. एवं तिंसतिविधेन सञ्ञाक्खन्धो.

बहुविधेन सञ्ञाक्खन्धो – चक्खुसम्फस्सपच्चया सञ्ञाक्खन्धो अत्थि कुसलो, अत्थि अकुसलो, अत्थि अब्याकतो, अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो, सोतसम्फस्सपच्चया …पे… घानसम्फस्सपच्चया…पे… जिव्हासम्फस्सपच्चया…पे… कायसम्फस्सपच्चया…पे… मनोसम्फस्सपच्चया सञ्ञाक्खन्धो अत्थि कुसलो, अत्थि अकुसलो, अत्थि अब्याकतो, अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो, चक्खुसम्फस्सजा सञ्ञा…पे… मनोसम्फस्सजा सञ्ञा. एवं बहुविधेन सञ्ञाक्खन्धो.

अपरोपि बहुविधेन सञ्ञाक्खन्धो – चक्खुसम्फस्सपच्चया सञ्ञाक्खन्धो अत्थि सुखाय वेदनाय सम्पयुत्तो…पे… अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो, अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो, सोतसम्फस्सपच्चया…पे… घानसम्फस्सपच्चया…पे… जिव्हासम्फस्सपच्चया…पे… कायसम्फस्सपच्चया…पे… मनोसम्फस्सपच्चया सञ्ञाक्खन्धो अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो, अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो, चक्खुसम्फस्सजा सञ्ञा, सोतसम्फस्सजा सञ्ञा, घानसम्फस्सजा सञ्ञा, जिव्हासम्फस्सजा सञ्ञा, कायसम्फस्सजा सञ्ञा, मनोसम्फस्सजा सञ्ञा. एवं बहुविधेन सञ्ञाक्खन्धो.

अयं वुच्चति सञ्ञाक्खन्धो.