२. अभिधम्मभाजनीयं

३२. पञ्चक्खन्धा – रूपक्खन्धो, वेदनाक्खन्धो, सञ्ञाक्खन्धो, सङ्खारक्खन्धो, विञ्ञाणक्खन्धो.

१. रूपक्खन्धो

३३. तत्थ कतमो रूपक्खन्धो? एकविधेन रूपक्खन्धो – सब्बं रूपं न हेतु, अहेतुकं, हेतुविप्पयुत्तं, सप्पच्चयं, सङ्खतं, रूपं, लोकियं, सासवं, संयोजनियं, गन्थनियं, ओघनियं, योगनियं, नीवरणियं, परामट्ठं, उपादानियं, संकिलेसिकं, अब्याकतं, अनारम्मणं, अचेतसिकं, चित्तविप्पयुत्तं, नेवविपाकनविपाकधम्मधम्मं, असंकिलिट्ठसंकिलेसिकं, न सवितक्कसविचारं, न अवितक्कविचारमत्तं, अवितक्कअविचारं, न पीतिसहगतं, न सुखसहगतं, न उपेक्खासहगतं, नेव दस्सनेन न भावनाय पहातब्बं, नेव दस्सनेन न भावनाय पहातब्बहेतुकं, नेवाचयगामिनापचयगामी, नेवसेक्खनासेक्खं, परित्तं, कामावचरं, न रूपावचरं, न अरूपावचरं, परियापन्नं, नो अपरियापन्नं, अनियतं, अनिय्यानिकं, उप्पन्नं, छहि विञ्ञाणेहि विञ्ञेय्यं, अनिच्चं, जराभिभूतं. एवं एकविधेन रूपक्खन्धो.

दुविधेन रूपक्खन्धो – अत्थि रूपं उपादा, अत्थि रूपं नो उपादा [नुपादा (सी. क.)]. अत्थि रूपं उपादिन्नं, अत्थि रूपं अनुपादिन्नं. अत्थि रूपं उपादिन्नुपादानियं, अत्थि रूपं अनुपादिन्नुपादानियं. अत्थि रूपं सनिदस्सनं, अत्थि रूपं अनिदस्सनं. अत्थि रूपं सप्पटिघं, अत्थि रूपं अप्पटिघं. अत्थि रूपं इन्द्रियं, अत्थि रूपं न इन्द्रियं. अत्थि रूपं महाभूतं, अत्थि रूपं न महाभूतं. अत्थि रूपं विञ्ञत्ति, अत्थि रूपं न विञ्ञत्ति. अत्थि रूपं चित्तसमुट्ठानं, अत्थि रूपं न चित्तसमुट्ठानं. अत्थि रूपं चित्तसहभु, अत्थि रूपं न चित्तसहभु. अत्थि रूपं चित्तानुपरिवत्ति, अत्थि रूपं न चित्तानुपरिवत्ति. अत्थि रूपं अज्झत्तिकं, अत्थि रूपं बाहिरं. अत्थि रूपं ओळारिकं, अत्थि रूपं सुखुमं. अत्थि रूपं दूरे, अत्थि रूपं सन्तिके…पे… अत्थि रूपं कबळीकारो आहारो, अत्थि रूपं न कबळीकारो आहारो. एवं दुविधेन रूपक्खन्धो.

(यथा रूपकण्डे विभत्तं, तथा इध विभजितब्बं.)

तिविधेन रूपक्खन्धो – यं तं रूपं अज्झत्तिकं तं उपादा, यं तं रूपं बाहिरं तं अत्थि उपादा, अत्थि नो उपादा. यं तं रूपं अज्झत्तिकं तं उपादिन्नं, यं तं रूपं बाहिरं तं अत्थि उपादिन्नं, अत्थि अनुपादिन्नं. यं तं रूपं अज्झत्तिकं तं उपादिन्नुपादानियं, यं तं रूपं बाहिरं तं अत्थि उपादिन्नुपादानियं, अत्थि अनुपादिन्नुपादानियं…पे… यं तं रूपं अज्झत्तिकं तं न कबळीकारो आहारो, यं तं रूपं बाहिरं तं अत्थि कबळीकारो आहारो, अत्थि न कबळीकारो आहारो. एवं तिविधेन रूपक्खन्धो.

चतुब्बिधेन रूपक्खन्धो – यं तं रूपं उपादा तं अत्थि उपादिन्नं, अत्थि अनुपादिन्नं; यं तं रूपं नो उपादा तं अत्थि उपादिन्नं, अत्थि अनुपादिन्नं. यं तं रूपं उपादा तं अत्थि उपादिन्नुपादानियं, अत्थि अनुपादिन्नुपादानियं; यं तं रूपं नो उपादा तं अत्थि उपादिन्नुपादानियं, अत्थि अनुपादिन्नुपादानियं. यं तं रूपं उपादा तं अत्थि सप्पटिघं, अत्थि अप्पटिघं; यं तं रूपं नो उपादा तं अत्थि सप्पटिघं, अत्थि अप्पटिघं. यं तं रूपं उपादा तं अत्थि ओळारिकं, अत्थि सुखुमं; यं तं रूपं नो उपादा तं अत्थि ओळारिकं, अत्थि सुखुमं. यं तं रूपं उपादा तं अत्थि दूरे, अत्थि सन्तिके; यं तं रूपं नो उपादा तं अत्थि दूरे, अत्थि सन्तिके…पे… दिट्ठं, सुतं, मुतं, विञ्ञातं रूपं. एवं चतुब्बिधेन रूपक्खन्धो.

पञ्चविधेन रूपक्खन्धो – पथवीधातु, आपोधातु, तेजोधातु, वायोधातु, यञ्च रूपं उपादा. एवं पञ्चविधेन रूपक्खन्धो.

छब्बिधेन रूपक्खन्धो – चक्खुविञ्ञेय्यं रूपं, सोतविञ्ञेय्यं रूपं, घानविञ्ञेय्यं रूपं, जिव्हाविञ्ञेय्यं रूपं, कायविञ्ञेय्यं रूपं, मनोविञ्ञेय्यं रूपं. एवं छब्बिधेन रूपक्खन्धो.

सत्तविधेन रूपक्खन्धो – चक्खुविञ्ञेय्यं रूपं, सोतविञ्ञेय्यं रूपं, घानविञ्ञेय्यं रूपं, जिव्हाविञ्ञेय्यं रूपं, कायविञ्ञेय्यं रूपं, मनोधातुविञ्ञेय्यं रूपं, मनोविञ्ञाणधातुविञ्ञेय्यं रूपं. एवं सत्तविधेन रूपक्खन्धो.

अट्ठविधेन रूपक्खन्धो – चक्खुविञ्ञेय्यं रूपं, सोतविञ्ञेय्यं रूपं, घानविञ्ञेय्यं रूपं, जिव्हाविञ्ञेय्यं रूपं, कायविञ्ञेय्यं रूपं अत्थि सुखसम्फस्सं, अत्थि दुक्खसम्फस्सं, मनोधातुविञ्ञेय्यं रूपं, मनोविञ्ञाणधातुविञ्ञेय्यं रूपं. एवं अट्ठविधेन रूपक्खन्धो.

नवविधेन रूपक्खन्धो – चक्खुन्द्रियं, सोतिन्द्रियं, घानिन्द्रियं, जिव्हिन्द्रियं, कायिन्द्रियं, इत्थिन्द्रियं, पुरिसिन्द्रियं, जीवितिन्द्रियं, यञ्च रूपं न इन्द्रियं. एवं नवविधेन रूपक्खन्धो.

दसविधेन रूपक्खन्धो – चक्खुन्द्रियं, सोतिन्द्रियं, घानिन्द्रियं, जिव्हिन्द्रियं, कायिन्द्रियं, इत्थिन्द्रियं, पुरिसिन्द्रियं, जीवितिन्द्रियं, न इन्द्रियं रूपं अत्थि सप्पटिघं, अत्थि अप्पटिघं. एवं दसविधेन रूपक्खन्धो.

एकादसविधेन रूपक्खन्धो – चक्खायतनं, सोतायतनं, घानायतनं, जिव्हायतनं, कायायतनं, रूपायतनं, सद्दायतनं, गन्धायतनं, रसायतनं, फोट्ठब्बायतनं, यञ्च रूपं अनिदस्सनअप्पटिघं धम्मायतनपरियापन्नं. एवं एकादसविधेन रूपक्खन्धो.

अयं वुच्चति रूपक्खन्धो.

२. वेदनाक्खन्धो

३४. तत्थ कतमो वेदनाक्खन्धो? एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि सहेतुको, अत्थि अहेतुको.

तिविधेन वेदनाक्खन्धो – अत्थि कुसलो, अत्थि अकुसलो, अत्थि अब्याकतो.

चतुब्बिधेन वेदनाक्खन्धो – अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो.

पञ्चविधेन वेदनाक्खन्धो – अत्थि सुखिन्द्रियं, अत्थि दुक्खिन्द्रियं, अत्थि सोमनस्सिन्द्रियं, अत्थि दोमनस्सिन्द्रियं, अत्थि उपेक्खिन्द्रियं. एवं पञ्चविधेन वेदनाक्खन्धो.

छब्बिधेन वेदनाक्खन्धो – चक्खुसम्फस्सजा वेदना, सोतसम्फस्सजा वेदना, घानसम्फस्सजा वेदना, जिव्हासम्फस्सजा वेदना, कायसम्फस्सजा वेदना, मनोसम्फस्सजा वेदना. एवं छब्बिधेन वेदनाक्खन्धो.

सत्तविधेन वेदनाक्खन्धो – चक्खुसम्फस्सजा वेदना, सोतसम्फस्सजा वेदना, घानसम्फस्सजा वेदना, जिव्हासम्फस्सजा वेदना, कायसम्फस्सजा वेदना, मनोधातुसम्फस्सजा वेदना, मनोविञ्ञाणधातुसम्फस्सजा वेदना. एवं सत्तविधेन वेदनाक्खन्धो.

अट्ठविधेन वेदनाक्खन्धो – चक्खुसम्फस्सजा वेदना, सोतसम्फस्सजा वेदना, घानसम्फस्सजा वेदना, जिव्हासम्फस्सजा वेदना, कायसम्फस्सजा वेदना अत्थि सुखा, अत्थि दुक्खा, मनोधातुसम्फस्सजा वेदना, मनोविञ्ञाणधातुसम्फस्सजा वेदना. एवं अट्ठविधेन वेदनाक्खन्धो.

नवविधेन वेदनाक्खन्धो – चक्खुसम्फस्सजा वेदना, सोतसम्फस्सजा वेदना, घानसम्फस्सजा वेदना, जिव्हासम्फस्सजा वेदना, कायसम्फस्सजा वेदना, मनोधातुसम्फस्सजा वेदना, मनोविञ्ञाणधातुसम्फस्सजा वेदना अत्थि कुसला, अत्थि अकुसला, अत्थि अब्याकता. एवं नवविधेन वेदनाक्खन्धो.

दसविधेन वेदनाक्खन्धो – चक्खुसम्फस्सजा वेदना, सोतसम्फस्सजा वेदना, घानसम्फस्सजा वेदना, जिव्हासम्फस्सजा वेदना, कायसम्फस्सजा वेदना अत्थि सुखा, अत्थि दुक्खा, मनोधातुसम्फस्सजा वेदना, मनोविञ्ञाणधातुसम्फस्सजा वेदना अत्थि कुसला, अत्थि अकुसला, अत्थि अब्याकता. एवं दसविधेन वेदनाक्खन्धो.

३५. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि सहेतुको, अत्थि अहेतुको.

तिविधेन वेदनाक्खन्धो – अत्थि विपाको, अत्थि विपाकधम्मधम्मो, अत्थि नेवविपाकनविपाकधम्मधम्मो. अत्थि उपादिन्नुपादानियो, अत्थि अनुपादिन्नुपादानियो, अत्थि अनुपादिन्नअनुपादानियो. अत्थि संकिलिट्ठसंकिलेसिको, अत्थि असंकिलिट्ठसंकिलेसिको, अत्थि असंकिलिट्ठअसंकिलेसिको. अत्थि सवितक्कसविचारो, अत्थि अवितक्कविचारमत्तो, अत्थि अवितक्कअविचारो. अत्थि दस्सनेन पहातब्बो, अत्थि भावनाय पहातब्बो, अत्थि नेव दस्सनेन न भावनाय पहातब्बो. अत्थि दस्सनेन पहातब्बहेतुको, अत्थि भावनाय पहातब्बहेतुको, अत्थि नेव दस्सनेन न भावनाय पहातब्बहेतुको. अत्थि आचयगामी, अत्थि अपचयगामी, अत्थि नेवाचयगामिनापचयगामी. अत्थि सेक्खो, अत्थि असेक्खो, अत्थि नेवसेक्खनासेक्खो. अत्थि परित्तो, अत्थि महग्गतो, अत्थि अप्पमाणो. अत्थि परित्तारम्मणो, अत्थि महग्गतारम्मणो, अत्थि अप्पमाणारम्मणो. अत्थि हीनो, अत्थि मज्झिमो, अत्थि पणीतो. अत्थि मिच्छत्तनियतो, अत्थि सम्मत्तनियतो, अत्थि अनियतो. अत्थि मग्गारम्मणो, अत्थि मग्गहेतुको, अत्थि मग्गाधिपति. अत्थि उप्पन्नो, अत्थि अनुप्पन्नो, अत्थि उप्पादी. अत्थि अतीतो, अत्थि अनागतो, अत्थि पच्चुप्पन्नो. अत्थि अतीतारम्मणो, अत्थि अनागतारम्मणो, अत्थि पच्चुप्पन्नारम्मणो. अत्थि अज्झत्तो, अत्थि बहिद्धो, अत्थि अज्झत्तबहिद्धो. अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो…पे…. एवं दसविधेन वेदनाक्खन्धो.

३६. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि हेतुसम्पयुत्तो, अत्थि हेतुविप्पयुत्तो…पे… अत्थि न हेतुसहेतुको, अत्थि न हेतुअहेतुको. अत्थि लोकियो, अत्थि लोकुत्तरो. अत्थि केनचि विञ्ञेय्यो, अत्थि केनचि न विञ्ञेय्यो. अत्थि सासवो, अत्थि अनासवो. अत्थि आसवसम्पयुत्तो, अत्थि आसवविप्पयुत्तो. अत्थि आसवविप्पयुत्तसासवो, अत्थि आसवविप्पयुत्तअनासवो. अत्थि संयोजनियो, अत्थि असंयोजनियो. अत्थि संयोजनसम्पयुत्तो, अत्थि संयोजनविप्पयुत्तो. अत्थि संयोजनविप्पयुत्तसंयोजनियो, अत्थि संयोजनविप्पयुत्तअसंयोजनियो. अत्थि गन्थनियो, अत्थि अगन्थनियो. अत्थि गन्थसम्पयुत्तो, अत्थि गन्थविप्पयुत्तो. अत्थि गन्थविप्पयुत्तगन्थनियो, अत्थि गन्थविप्पयुत्तअगन्थनियो. अत्थि ओघनियो, अत्थि अनोघनियो. अत्थि ओघसम्पयुत्तो, अत्थि ओघविप्पयुत्तो. अत्थि ओघविप्पयुत्तओघनियो, अत्थि ओघविप्पयुत्तअनोघनियो. अत्थि योगनियो, अत्थि अयोगनियो. अत्थि योगसम्पयुत्तो, अत्थि योगविप्पयुत्तो. अत्थि योगविप्पयुत्तयोगनियो, अत्थि योगविप्पयुत्तअयोगनियो. अत्थि नीवरणियो, अत्थि अनीवरणियो. अत्थि नीवरणसम्पयुत्तो, अत्थि नीवरणविप्पयुत्तो. अत्थि नीवरणविप्पयुत्तनीवरणियो, अत्थि नीवरणविप्पयुत्तअनीवरणियो. अत्थि परामट्ठो, अत्थि अपरामट्ठो. अत्थि परामाससम्पयुत्तो, अत्थि परामासविप्पयुत्तो. अत्थि परामासविप्पयुत्तपरामट्ठो, अत्थि परामासविप्पयुत्तअपरामट्ठो. अत्थि उपादिन्नो, अत्थि अनुपादिन्नो. अत्थि उपादानियो, अत्थि अनुपादानियो. अत्थि उपादानसम्पयुत्तो, अत्थि उपादानविप्पयुत्तो. अत्थि उपादानविप्पयुत्तउपादानियो, अत्थि उपादानविप्पयुत्तअनुपादानियो. अत्थि संकिलेसिको, अत्थि असंकिलेसिको. अत्थि संकिलिट्ठो, अत्थि असंकिलिट्ठो. अत्थि किलेससम्पयुत्तो, अत्थि किलेसविप्पयुत्तो. अत्थि किलेसविप्पयुत्तसंकिलेसिको, अत्थि किलेसविप्पयुत्तअसंकिलेसिको. अत्थि दस्सनेन पहातब्बो, अत्थि न दस्सनेन पहातब्बो. अत्थि भावनाय पहातब्बो, अत्थि न भावनाय पहातब्बो. अत्थि दस्सनेन पहातब्बहेतुको, अत्थि न दस्सनेन पहातब्बहेतुको. अत्थि भावनाय पहातब्बहेतुको, अत्थि न भावनाय पहातब्बहेतुको. अत्थि सवितक्को, अत्थि अवितक्को. अत्थि सविचारो, अत्थि अविचारो. अत्थि सप्पीतिको, अत्थि अप्पीतिको. अत्थि पीतिसहगतो, अत्थि न पीतिसहगतो. अत्थि कामावचरो, अत्थि न कामावचरो. अत्थि रूपावचरो, अत्थि न रूपावचरो. अत्थि अरूपावचरो, अत्थि न अरूपावचरो. अत्थि परियापन्नो, अत्थि अपरियापन्नो. अत्थि निय्यानिको, अत्थि अनिय्यानिको. अत्थि नियतो, अत्थि अनियतो. अत्थि सउत्तरो, अत्थि अनुत्तरो. अत्थि सरणो, अत्थि अरणो.

तिविधेन वेदनाक्खन्धो – अत्थि कुसलो, अत्थि अकुसलो, अत्थि अब्याकतो…पे…. एवं दसविधेन वेदनाक्खन्धो.

३७. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि सरणो, अत्थि अरणो.

तिविधेन वेदनाक्खन्धो – अत्थि विपाको, अत्थि विपाकधम्मधम्मो, अत्थि नेवविपाकनविपाकधम्मधम्मो. अत्थि उपादिन्नुपादानियो…पे… अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो…पे…. एवं दसविधेन वेदनाक्खन्धो.

दुकमूलकं.

३८. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि सहेतुको, अत्थि अहेतुको.

तिविधेन वेदनाक्खन्धो – अत्थि कुसलो, अत्थि अकुसलो, अत्थि अब्याकतो…पे…. एवं दसविधेन वेदनाक्खन्धो.

३९. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि हेतुसम्पयुत्तो, अत्थि हेतुविप्पयुत्तो.

तिविधेन वेदनाक्खन्धो – अत्थि कुसलो, अत्थि अकुसलो, अत्थि अब्याकतो…पे…. एवं दसविधेन वेदनाक्खन्धो.

४०. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि न हेतुसहेतुको, अत्थि न हेतुअहेतुको. अत्थि लोकियो, अत्थि लोकुत्तरो. अत्थि केनचि विञ्ञेय्यो, अत्थि केनचि न विञ्ञेय्यो. अत्थि सासवो, अत्थि अनासवो. अत्थि आसवसम्पयुत्तो, अत्थि आसवविप्पयुत्तो. अत्थि आसवविप्पयुत्तसासवो, अत्थि आसवविप्पयुत्तअनासवो…पे… अत्थि सरणो, अत्थि अरणो.

तिविधेन वेदनाक्खन्धो – अत्थि कुसलो, अत्थि अकुसलो, अत्थि अब्याकतो…पे…. एवं दसविधेन वेदनाक्खन्धो.

४१. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि सहेतुको, अत्थि अहेतुको.

तिविधेन वेदनाक्खन्धो – अत्थि विपाको, अत्थि विपाकधम्मधम्मो, अत्थि नेवविपाकनविपाकधम्मधम्मो. अत्थि उपादिन्नुपादानियो, अत्थि अनुपादिन्नुपादानियो, अत्थि अनुपादिन्नअनुपादानियो. अत्थि संकिलिट्ठसंकिलेसिको, अत्थि असंकिलिट्ठसंकिलेसिको, अत्थि असंकिलिट्ठअसंकिलेसिको. अत्थि सवितक्कसविचारो, अत्थि अवितक्कविचारमत्तो, अत्थि अवितक्कअविचारो. अत्थि दस्सनेन पहातब्बो, अत्थि भावनाय पहातब्बो, अत्थि नेव दस्सनेन न भावनाय पहातब्बो. अत्थि दस्सनेन पहातब्बहेतुको, अत्थि भावनाय पहातब्बहेतुको, अत्थि नेव दस्सनेन न भावनाय पहातब्बहेतुको. अत्थि आचयगामी, अत्थि अपचयगामी, अत्थि नेवाचयगामिनापचयगामी. अत्थि सेक्खो, अत्थि असेक्खो, अत्थि नेवसेक्खनासेक्खो. अत्थि परित्तो, अत्थि महग्गतो, अत्थि अप्पमाणो. अत्थि परित्तारम्मणो, अत्थि महग्गतारम्मणो, अत्थि अप्पमाणारम्मणो. अत्थि हीनो, अत्थि मज्झिमो, अत्थि पणीतो. अत्थि मिच्छत्तनियतो, अत्थि सम्मत्तनियतो, अत्थि अनियतो. अत्थि मग्गारम्मणो, अत्थि मग्गहेतुको, अत्थि मग्गाधिपति. अत्थि उप्पन्नो, अत्थि अनुप्पन्नो, अत्थि उप्पादी. अत्थि अतीतो, अत्थि अनागतो, अत्थि पच्चुप्पन्नो. अत्थि अतीतारम्मणो, अत्थि अनागतारम्मणो, अत्थि पच्चुप्पन्नारम्मणो. अत्थि अज्झत्तो, अत्थि बहिद्धो, अत्थि अज्झत्तबहिद्धो. अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो…पे…. एवं दसविधेन वेदनाक्खन्धो.

४२. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि हेतुसम्पयुत्तो, अत्थि हेतुविप्पयुत्तो. अत्थि न हेतुसहेतुको, अत्थि न हेतुअहेतुको. अत्थि लोकियो, अत्थि लोकुत्तरो. अत्थि केनचि विञ्ञेय्यो, अत्थि केनचि न विञ्ञेय्यो. अत्थि सासवो, अत्थि अनासवो. अत्थि आसवसम्पयुत्तो, अत्थि आसवविप्पयुत्तो. अत्थि आसवविप्पयुत्तसासवो, अत्थि आसवविप्पयुत्तअनासवो. अत्थि संयोजनियो, अत्थि असंयोजनियो…पे… अत्थि सरणो, अत्थि अरणो.

तिविधेन वेदनाक्खन्धो – अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो…पे…. एवं दसविधेन वेदनाक्खन्धो.

तिकमूलकं.

४३. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि सहेतुको, अत्थि अहेतुको.

तिविधेन वेदनाक्खन्धो – अत्थि कुसलो, अत्थि अकुसलो, अत्थि अब्याकतो…पे…. एवं दसविधेन वेदनाक्खन्धो.

४४. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि हेतुसम्पयुत्तो, अत्थि हेतुविप्पयुत्तो.

तिविधेन वेदनाक्खन्धो – अत्थि विपाको, अत्थि विपाकधम्मधम्मो, अत्थि नेवविपाकनविपाकधम्मधम्मो…पे…. एवं दसविधेन वेदनाक्खन्धो.

४५. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि न हेतुसहेतुको, अत्थि न हेतुअहेतुको.

तिविधेन वेदनाक्खन्धो – अत्थि उपादिन्नुपादानियो, अत्थि अनुपादिन्नुपादानियो, अत्थि अनुपादिन्नअनुपादानियो…पे…. एवं दसविधेन वेदनाक्खन्धो.

४६. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि लोकियो, अत्थि लोकुत्तरो.

तिविधेन वेदनाक्खन्धो – अत्थि संकिलिट्ठसंकिलेसिको, अत्थि असंकिलिट्ठसंकिलेसिको, अत्थि असंकिलिट्ठअसंकिलेसिको…पे…. एवं दसविधेन वेदनाक्खन्धो.

४७. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि केनचि विञ्ञेय्यो, अत्थि केनचि न विञ्ञेय्यो.

तिविधेन वेदनाक्खन्धो – अत्थि सवितक्कसविचारो, अत्थि अवितक्कविचारमत्तो, अत्थि अवितक्कअविचारो…पे…. एवं दसविधेन वेदनाक्खन्धो.

४८. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि सासवो, अत्थि अनासवो.

तिविधेन वेदनाक्खन्धो – अत्थि दस्सनेन पहातब्बो, अत्थि भावनाय पहातब्बो, अत्थि नेव दस्सनेन न भावनाय पहातब्बो…पे…. एवं दसविधेन वेदनाक्खन्धो.

४९. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि आसवसम्पयुत्तो, अत्थि आसवविप्पयुत्तो.

तिविधेन वेदनाक्खन्धो – अत्थि दस्सनेन पहातब्बहेतुको, अत्थि भावनाय पहातब्बहेतुको, अत्थि नेव दस्सनेन न भावनाय पहातब्बहेतुको…पे…. एवं दसविधेन वेदनाक्खन्धो.

५०. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि आसवविप्पयुत्तसासवो, अत्थि आसवविप्पयुत्तअनासवो.

तिविधेन वेदनाक्खन्धो – अत्थि आचयगामी, अत्थि अपचयगामी, अत्थि नेवाचयगामिनापचयगामी…पे…. एवं दसविधेन वेदनाक्खन्धो.

५१. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि संयोजनियो, अत्थि असंयोजनियो.

तिविधेन वेदनाक्खन्धो – अत्थि सेक्खो, अत्थि असेक्खो, अत्थि नेवसेक्खनासेक्खो…पे…. एवं दसविधेन वेदनाक्खन्धो.

५२. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि संयोजनसम्पयुत्तो, अत्थि संयोजनविप्पयुत्तो.

तिविधेन वेदनाक्खन्धो – अत्थि परित्तो, अत्थि महग्गतो, अत्थि अप्पमाणो…पे…. एवं दसविधेन वेदनाक्खन्धो.

५३. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि संयोजनविप्पयुत्तसंयोजनियो, अत्थि संयोजनविप्पयुत्तअसंयोजनियो.

तिविधेन वेदनाक्खन्धो – अत्थि परित्तारम्मणो, अत्थि महग्गतारम्मणो, अत्थि अप्पमाणारम्मणो…पे…. एवं दसविधेन वेदनाक्खन्धो.

५४. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि गन्थनियो, अत्थि अगन्थनियो.

तिविधेन वेदनाक्खन्धो – अत्थि हीनो, अत्थि मज्झिमो, अत्थि पणीतो…पे…. एवं दसविधेन वेदनाक्खन्धो.

५५. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि गन्थसम्पयुत्तो, अत्थि गन्थविप्पयुत्तो.

तिविधेन वेदनाक्खन्धो – अत्थि मिच्छत्तनियतो, अत्थि सम्मत्तनियतो, अत्थि अनियतो…पे…. एवं दसविधेन वेदनाक्खन्धो.

५६. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि गन्थविप्पयुत्तगन्थनियो, अत्थि गन्थविप्पयुत्तअगन्थनियो.

तिविधेन वेदनाक्खन्धो – अत्थि मग्गारम्मणो, अत्थि मग्गहेतुको, अत्थि मग्गाधिपति…पे…. एवं दसविधेन वेदनाक्खन्धो.

५७. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि ओघनियो, अत्थि अनोघनियो.

तिविधेन वेदनाक्खन्धो – अत्थि उप्पन्नो, अत्थि अनुप्पन्नो, अत्थि उप्पादी…पे…. एवं दसविधेन वेदनाक्खन्धो.

५८. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि ओघसम्पयुत्तो, अत्थि ओघविप्पयुत्तो.

तिविधेन वेदनाक्खन्धो – अत्थि अतीतो, अत्थि अनागतो, अत्थि पच्चुप्पन्नो…पे…. एवं दसविधेन वेदनाक्खन्धो.

५९. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि ओघविप्पयुत्तओघनियो, अत्थि ओघविप्पयुत्तअनोघनियो.

तिविधेन वेदनाक्खन्धो – अत्थि अतीतारम्मणो, अत्थि अनागतारम्मणो, अत्थि पच्चुप्पन्नारम्मणो…पे…. एवं दसविधेन वेदनाक्खन्धो.

६०. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि योगनियो, अत्थि अयोगनियो.

तिविधेन वेदनाक्खन्धो – अत्थि अज्झत्तो, अत्थि बहिद्धो, अत्थि अज्झत्तबहिद्धो…पे…. एवं दसविधेन वेदनाक्खन्धो.

६१. एकविधेन वेदनाक्खन्धो – फस्ससम्पयुत्तो.

दुविधेन वेदनाक्खन्धो – अत्थि योगसम्पयुत्तो, अत्थि योगविप्पयुत्तो.

तिविधेन वेदनाक्खन्धो – अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो…पे…. एवं दसविधेन वेदनाक्खन्धो.

उभतोवड्ढकं.

सत्तविधेन वेदनाक्खन्धो – अत्थि कुसलो, अत्थि अकुसलो, अत्थि अब्याकतो, अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो. एवं सत्तविधेन वेदनाक्खन्धो.

अपरोपि सत्तविधेन वेदनाक्खन्धो – अत्थि विपाको…पे… अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो, अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो. एवं सत्तविधेन वेदनाक्खन्धो.

चतुवीसतिविधेन वेदनाक्खन्धो – चक्खुसम्फस्सपच्चया वेदनाक्खन्धो अत्थि कुसलो, अत्थि अकुसलो, अत्थि अब्याकतो; सोतसम्फस्सपच्चया वेदनाक्खन्धो…पे… घानसम्फस्सपच्चया वेदनाक्खन्धो…पे… जिव्हासम्फस्सपच्चया वेदनाक्खन्धो…पे… कायसम्फस्सपच्चया वेदनाक्खन्धो…पे… मनोसम्फस्सपच्चया वेदनाक्खन्धो अत्थि कुसलो, अत्थि अकुसलो, अत्थि अब्याकतो; चक्खुसम्फस्सजा वेदना, सोतसम्फस्सजा वेदना, घानसम्फस्सजा वेदना, जिव्हासम्फस्सजा वेदना, कायसम्फस्सजा वेदना, मनोसम्फस्सजा वेदना. एवं चतुवीसतिविधेन वेदनाक्खन्धो.

अपरोपि चतुवीसतिविधेन वेदनाक्खन्धो – चक्खुसम्फस्सपच्चया वेदनाक्खन्धो अत्थि विपाको…पे… अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो, चक्खुसम्फस्सजा वेदना…पे… मनोसम्फस्सजा वेदना; सोतसम्फस्सपच्चया वेदनाक्खन्धो…पे… घानसम्फस्सपच्चया वेदनाक्खन्धो…पे… जिव्हासम्फस्सपच्चया वेदनाक्खन्धो…पे… कायसम्फस्सपच्चया वेदनाक्खन्धो…पे… मनोसम्फस्सपच्चया वेदनाक्खन्धो अत्थि विपाको…पे… अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो, चक्खुसम्फस्सजा वेदना…पे… मनोसम्फस्सजा वेदना. एवं चतुवीसतिविधेन वेदनाक्खन्धो.

तिंसविधेन वेदनाक्खन्धो – चक्खुसम्फस्सपच्चया वेदनाक्खन्धो अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो; सोतसम्फस्सपच्चया…पे… घानसम्फस्सपच्चया…पे… जिव्हासम्फस्सपच्चया…पे… कायसम्फस्सपच्चया…पे… मनोसम्फस्सपच्चया वेदनाक्खन्धो अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो; चक्खुसम्फस्सजा वेदना, सोतसम्फस्सजा वेदना, घानसम्फस्सजा वेदना, जिव्हासम्फस्सजा वेदना, कायसम्फस्सजा वेदना, मनोसम्फस्सजा वेदना. एवं तिंसविधेन वेदनाक्खन्धो.

बहुविधेन वेदनाक्खन्धो – चक्खुसम्फस्सपच्चया वेदनाक्खन्धो अत्थि कुसलो, अत्थि अकुसलो, अत्थि अब्याकतो, अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो; सोतसम्फस्सपच्चया…पे… घानसम्फस्सपच्चया…पे… जिव्हासम्फस्सपच्चया…पे… कायसम्फस्सपच्चया…पे… मनोसम्फस्सपच्चया वेदनाक्खन्धो अत्थि कुसलो, अत्थि अकुसलो, अत्थि अब्याकतो, अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो; चक्खुसम्फस्सजा वेदना, सोतसम्फस्सजा वेदना, घानसम्फस्सजा वेदना, जिव्हासम्फस्सजा वेदना, कायसम्फस्सजा वेदना, मनोसम्फस्सजा वेदना. एवं बहुविधेन वेदनाक्खन्धो.

अपरोपि बहुविधेन वेदनाक्खन्धो – चक्खुसम्फस्सपच्चया वेदनाक्खन्धो अत्थि विपाको…पे… अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो, अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो; सोतसम्फस्सपच्चया वेदनाक्खन्धो…पे… घानसम्फस्सपच्चया वेदनाक्खन्धो…पे… जिव्हासम्फस्सपच्चया वेदनाक्खन्धो…पे… कायसम्फस्सपच्चया वेदनाक्खन्धो…पे… मनोसम्फस्सपच्चया वेदनाक्खन्धो अत्थि विपाको…पे… अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो, अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो; चक्खुसम्फस्सजा वेदना, सोतसम्फस्सजा वेदना, घानसम्फस्सजा वेदना, जिव्हासम्फस्सजा वेदना, कायसम्फस्सजा वेदना, मनोसम्फस्सजा वेदना. एवं बहुविधेन वेदनाक्खन्धो.

अयं वुच्चति वेदनाक्खन्धो.

३. सञ्ञाक्खन्धो

६२. तत्थ कतमो सञ्ञाक्खन्धो? एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि सहेतुको, अत्थि अहेतुको.

तिविधेन सञ्ञाक्खन्धो – अत्थि कुसलो, अत्थि अकुसलो, अत्थि अब्याकतो.

चतुब्बिधेन सञ्ञाक्खन्धो – अत्थि कामावचरो, अत्थि रूपावचरो, अत्थि अरूपावचरो, अत्थि अपरियापन्नो.

पञ्चविधेन सञ्ञाक्खन्धो – अत्थि सुखिन्द्रियसम्पयुत्तो, अत्थि दुक्खिन्द्रियसम्पयुत्तो, अत्थि सोमनस्सिन्द्रियसम्पयुत्तो, अत्थि दोमनस्सिन्द्रियसम्पयुत्तो, अत्थि उपेक्खिन्द्रियसम्पयुत्तो. एवं पञ्चविधेन सञ्ञाक्खन्धो.

छब्बिधेन सञ्ञाक्खन्धो – चक्खुसम्फस्सजा सञ्ञा, सोतसम्फस्सजा सञ्ञा, घानसम्फस्सजा सञ्ञा, जिव्हासम्फस्सजा सञ्ञा, कायसम्फस्सजा सञ्ञा, मनोसम्फस्सजा सञ्ञा. एवं छब्बिधेन सञ्ञाक्खन्धो.

सत्तविधेन सञ्ञाक्खन्धो – चक्खुसम्फस्सजा सञ्ञा, सोतसम्फस्सजा सञ्ञा, घानसम्फस्सजा सञ्ञा, जिव्हासम्फस्सजा सञ्ञा, कायसम्फस्सजा सञ्ञा, मनोधातुसम्फस्सजा सञ्ञा, मनोविञ्ञाणधातुसम्फस्सजा सञ्ञा. एवं सत्तविधेन सञ्ञाक्खन्धो.

अट्ठविधेन सञ्ञाक्खन्धो – चक्खुसम्फस्सजा सञ्ञा…पे… कायसम्फस्सजा सञ्ञा अत्थि सुखसहगता, अत्थि दुक्खसहगता, मनोधातुसम्फस्सजा सञ्ञा, मनोविञ्ञाणधातुसम्फस्सजा सञ्ञा. एवं अट्ठविधेन सञ्ञाक्खन्धो.

नवविधेन सञ्ञाक्खन्धो – चक्खुसम्फस्सजा सञ्ञा…पे… कायसम्फस्सजा सञ्ञा, मनोधातुसम्फस्सजा सञ्ञा, मनोविञ्ञाणधातुसम्फस्सजा सञ्ञा अत्थि कुसला, अत्थि अकुसला, अत्थि अब्याकता. एवं नवविधेन सञ्ञाक्खन्धो.

दसविधेन सञ्ञाक्खन्धो – चक्खुसम्फस्सजा सञ्ञा…पे… कायसम्फस्सजा सञ्ञा अत्थि सुखसहगता, अत्थि दुक्खसहगता, मनोधातुसम्फस्सजा सञ्ञा, मनोविञ्ञाणधातुसम्फस्सजा सञ्ञा अत्थि कुसला, अत्थि अकुसला, अत्थि अब्याकता. एवं दसविधेन सञ्ञाक्खन्धो.

६३. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि सहेतुको, अत्थि अहेतुको.

तिविधेन सञ्ञाक्खन्धो – अत्थि सुखाय वेदनाय सम्पयुत्तो, अत्थि दुक्खाय वेदनाय सम्पयुत्तो, अत्थि अदुक्खमसुखाय वेदनाय सम्पयुत्तो…पे…. एवं दसविधेन सञ्ञाक्खन्धो.

६४. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि सहेतुको, अत्थि अहेतुको.

तिविधेन सञ्ञाक्खन्धो – अत्थि विपाको, अत्थि विपाकधम्मधम्मो, अत्थि नेवविपाकनविपाकधम्मधम्मो. अत्थि उपादिन्नुपादानियो, अत्थि अनुपादिन्नुपादानियो, अत्थि अनुपादिन्नअनुपादानियो. अत्थि संकिलिट्ठसंकिलेसिको, अत्थि असंकिलिट्ठसंकिलेसिको, अत्थि असंकिलिट्ठअसंकिलेसिको. अत्थि सवितक्कसविचारो, अत्थि अवितक्कविचारमत्तो, अत्थि अवितक्कअविचारो. अत्थि पीतिसहगतो, अत्थि सुखसहगतो, अत्थि उपेक्खासहगतो. अत्थि दस्सनेन पहातब्बो, अत्थि भावनाय पहातब्बो, अत्थि नेव दस्सनेन न भावनाय पहातब्बो. अत्थि दस्सनेन पहातब्बहेतुको, अत्थि भावनाय पहातब्बहेतुको, अत्थि नेव दस्सनेन न भावनाय पहातब्बहेतुको. अत्थि आचयगामी, अत्थि अपचयगामी, अत्थि नेवाचयगामिनापचयगामी. अत्थि सेक्खो, अत्थि असेक्खो, अत्थि नेवसेक्खनासेक्खो. अत्थि परित्तो, अत्थि महग्गतो, अत्थि अप्पमाणो. अत्थि परित्तारम्मणो, अत्थि महग्गतारम्मणो, अत्थि अप्पमाणारम्मणो. अत्थि हीनो, अत्थि मज्झिमो, अत्थि पणीतो. अत्थि मिच्छत्तनियतो, अत्थि सम्मत्तनियतो, अत्थि अनियतो. अत्थि मग्गारम्मणो, अत्थि मग्गहेतुको, अत्थि मग्गाधिपति. अत्थि उप्पन्नो, अत्थि अनुप्पन्नो, अत्थि उप्पादी. अत्थि अतीतो, अत्थि अनागतो, अत्थि पच्चुप्पन्नो. अत्थि अतीतारम्मणो, अत्थि अनागतारम्मणो, अत्थि पच्चुप्पन्नारम्मणो. अत्थि अज्झत्तो, अत्थि बहिद्धो, अत्थि अज्झत्तबहिद्धो. अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो…पे… एवं दसविधेन सञ्ञाक्खन्धो.

६५. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि हेतुसम्पयुत्तो, अत्थि हेतुविप्पयुत्तो. अत्थि न हेतुसहेतुको, अत्थि न हेतुअहेतुको. अत्थि लोकियो, अत्थि लोकुत्तरो. अत्थि केनचि विञ्ञेय्यो, अत्थि केनचि न विञ्ञेय्यो. अत्थि सासवो, अत्थि अनासवो. अत्थि आसवसम्पयुत्तो, अत्थि आसवविप्पयुत्तो. अत्थि आसवविप्पयुत्तसासवो, अत्थि आसवविप्पयुत्तअनासवो. अत्थि संयोजनियो, अत्थि असंयोजनियो. अत्थि संयोजनसम्पयुत्तो, अत्थि संयोजनविप्पयुत्तो. अत्थि संयोजनविप्पयुत्तसंयोजनियो, अत्थि संयोजनविप्पयुत्तअसंयोजनियो. अत्थि गन्थनियो, अत्थि अगन्थनियो. अत्थि गन्थसम्पयुत्तो, अत्थि गन्थविप्पयुत्तो. अत्थि गन्थविप्पयुत्तगन्थनियो, अत्थि गन्थविप्पयुत्तअगन्थनियो. अत्थि ओघनियो, अत्थि अनोघनियो. अत्थि ओघसम्पयुत्तो, अत्थि ओघविप्पयुत्तो. अत्थि ओघविप्पयुत्तओघनियो, अत्थि ओघविप्पयुत्तअनोघनियो. अत्थि योगनियो, अत्थि अयोगनियो. अत्थि योगसम्पयुत्तो, अत्थि योगविप्पयुत्तो. अत्थि योगविप्पयुत्तयोगनियो, अत्थि योगविप्पयुत्तअयोगनियो. अत्थि नीवरणियो, अत्थि अनीवरणियो. अत्थि नीवरणसम्पयुत्तो, अत्थि नीवरणविप्पयुत्तो. अत्थि नीवरणविप्पयुत्तनीवरणियो, अत्थि नीवरणविप्पयुत्तअनीवरणियो. अत्थि परामट्ठो, अत्थि अपरामट्ठो. अत्थि परामाससम्पयुत्तो, अत्थि परामासविप्पयुत्तो. अत्थि परामासविप्पयुत्तपरामट्ठो, अत्थि परामासविप्पयुत्तअपरामट्ठो. अत्थि उपादिन्नो, अत्थि अनुपादिन्नो. अत्थि उपादानियो, अत्थि अनुपादानियो. अत्थि उपादानसम्पयुत्तो, अत्थि उपादानविप्पयुत्तो. अत्थि उपादानविप्पयुत्तउपादानियो, अत्थि उपादानविप्पयुत्तअनुपादानियो. अत्थि संकिलेसिको, अत्थि असंकिलेसिको. अत्थि संकिलिट्ठो, अत्थि असंकिलिट्ठो. अत्थि किलेससम्पयुत्तो, अत्थि किलेसविप्पयुत्तो. अत्थि किलेसविप्पयुत्तसंकिलेसिको, अत्थि किलेसविप्पयुत्तअसंकिलेसिको. अत्थि दस्सनेन पहातब्बो, अत्थि न दस्सनेन पहातब्बो. अत्थि भावनाय पहातब्बो, अत्थि न भावनाय पहातब्बो. अत्थि दस्सनेन पहातब्बहेतुको, अत्थि न दस्सनेन पहातब्बहेतुको. अत्थि भावनाय पहातब्बहेतुको, अत्थि न भावनाय पहातब्बहेतुको. अत्थि सवितक्को, अत्थि अवितक्को. अत्थि सविचारो, अत्थि अविचारो. अत्थि सप्पीतिको, अत्थि अप्पीतिको. अत्थि पीतिसहगतो, अत्थि न पीतिसहगतो. अत्थि सुखसहगतो, अत्थि न सुखसहगतो. अत्थि उपेक्खासहगतो, अत्थि न उपेक्खासहगतो. अत्थि कामावचरो, अत्थि न कामावचरो. अत्थि रूपावचरो, अत्थि न रूपावचरो. अत्थि अरूपावचरो, अत्थि न अरूपावचरो. अत्थि परियापन्नो, अत्थि अपरियापन्नो. अत्थि निय्यानिको, अत्थि अनिय्यानिको. अत्थि नियतो, अत्थि अनियतो. अत्थि सउत्तरो, अत्थि अनुत्तरो. अत्थि सरणो, अत्थि अरणो.

तिविधेन सञ्ञाक्खन्धो – अत्थि कुसलो, अत्थि अकुसलो, अत्थि अब्याकतो…पे…. एवं दसविधेन सञ्ञाक्खन्धो.

६६. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि सरणो, अत्थि अरणो.

तिविधेन सञ्ञाक्खन्धो – अत्थि सुखाय वेदनाय सम्पयुत्तो, अत्थि दुक्खाय वेदनाय सम्पयुत्तो, अत्थि अदुक्खमसुखाय वेदनाय सम्पयुत्तो. अत्थि विपाको…पे… अत्थि अज्झत्तारम्मणो, अत्थि बहिद्धारम्मणो, अत्थि अज्झत्तबहिद्धारम्मणो…पे…. एवं दसविधेन सञ्ञाक्खन्धो.

(यथा कुसलत्तिके वित्थारो, एवं सब्बेपि तिका वित्थारेतब्बा.)

दुकमूलकं.

६७. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि सहेतुको, अत्थि अहेतुको.

तिविधेन सञ्ञाक्खन्धो – अत्थि कुसलो, अत्थि अकुसलो, अत्थि अब्याकतो…पे…. एवं दसविधेन सञ्ञाक्खन्धो.

६८. एकविधेन सञ्ञाक्खन्धो – फस्ससम्पयुत्तो.

दुविधेन सञ्ञाक्खन्धो – अत्थि हेतुसम्पयुत्तो, अत्थि हेतुविप्पयुत्तो…पे… अत्थि सरणो, अत्थि अरणो.

तिविधेन सञ्ञाक्खन्धो – अत्थि कुसलो, अत्थि अकुसलो, अत्थि अब्याकतो…पे…. एवं दसविधेन सञ्ञाक्खन्धो.