३. पञ्हापुच्छकं

१५०. पञ्चक्खन्धा – रूपक्खन्धो, वेदनाक्खन्धो, सञ्ञाक्खन्धो, सङ्खारक्खन्धो, विञ्ञाणक्खन्धो.

१५१. पञ्चन्नं खन्धानं कति कुसला, कति अकुसला, कति अब्याकता…पे… कति सरणा, कति अरणा?

१. तिकं

१५२. रूपक्खन्धो अब्याकतो. चत्तारो खन्धा सिया कुसला, सिया अकुसला, सिया अब्याकता. द्वे खन्धा न वत्तब्बा – ‘‘सुखाय वेदनाय सम्पयुत्ता’’तिपि, ‘‘दुक्खाय वेदनाय सम्पयुत्ता’’तिपि, ‘‘अदुक्खमसुखाय वेदनाय सम्पयुत्ता’’तिपि. तयो खन्धा सिया सुखाय वेदनाय सम्पयुत्ता, सिया दुक्खाय वेदनाय सम्पयुत्ता, सिया अदुक्खमसुखाय वेदनाय सम्पयुत्ता. रूपक्खन्धो नेवविपाकनविपाकधम्मधम्मो. चत्तारो खन्धा सिया विपाका, सिया विपाकधम्मधम्मा, सिया नेवविपाकनविपाकधम्मधम्मा. रूपक्खन्धो सिया उपादिन्नुपादानियो, सिया अनुपादिन्नुपादानियो. चत्तारो खन्धा सिया उपादिन्नुपादानिया, सिया अनुपादिन्नुपादानिया, सिया अनुपादिन्नअनुपादानिया.

रूपक्खन्धो असंकिलिट्ठसंकिलेसिको. चत्तारो खन्धा सिया संकिलिट्ठसंकिलेसिका, सिया असंकिलिट्ठसंकिलेसिका, सिया असंकिलिट्ठअसंकिलेसिका. रूपक्खन्धो अवितक्कअविचारो. तयो खन्धा सिया सवितक्कसविचारा, सिया अवितक्कविचारमत्ता, सिया अवितक्कअविचारा. सङ्खारक्खन्धो सिया सवितक्कसविचारो, सिया अवितक्कविचारमत्तो, सिया अवितक्कअविचारो, सिया न वत्तब्बो – ‘‘सवितक्कसविचारो’’तिपि, ‘‘अवितक्कविचारमत्तो’’तिपि, ‘‘अवितक्कअविचारो’’तिपि. रूपक्खन्धो न वत्तब्बो – ‘‘पीतिसहगतो’’तिपि, ‘‘सुखसहगतो’’तिपि, ‘‘उपेक्खासहगतो’’तिपि. वेदनाक्खन्धो सिया पीतिसहगतो न सुखसहगतो न उपेक्खासहगतो, सिया न वत्तब्बो – ‘‘पीतिसहगतो’’ति. तयो खन्धा सिया पीतिसहगता, सिया सुखसहगता, सिया उपेक्खासहगता, सिया न वत्तब्बा – ‘‘पीतिसहगता’’तिपि, ‘‘सुखसहगता’’तिपि, ‘‘उपेक्खासहगता’’तिपि.

रूपक्खन्धो नेव दस्सनेन न भावनाय पहातब्बो. चत्तारो खन्धा सिया दस्सनेन पहातब्बा, सिया भावनाय पहातब्बा, सिया नेव दस्सनेन न भावनाय पहातब्बा. रूपक्खन्धो नेव दस्सनेन न भावनाय पहातब्बहेतुको. चत्तारो खन्धा सिया दस्सनेन पहातब्बहेतुका, सिया भावनाय पहातब्बहेतुका, सिया नेव दस्सनेन न भावनाय पहातब्बहेतुका. रूपक्खन्धो नेवाचयगामिनापचयगामी. चत्तारो खन्धा सिया आचयगामिनो, सिया अपचयगामिनो, सिया नेवाचयगामिनापचयगामिनो. रूपक्खन्धो नेवसेक्खनासेक्खो. चत्तारो खन्धा सिया सेक्खा, सिया असेक्खा, सिया नेवसेक्खनासेक्खा. रूपक्खन्धो परित्तो. चत्तारो खन्धा सिया परित्ता, सिया महग्गता, सिया अप्पमाणा. रूपक्खन्धो अनारम्मणो. चत्तारो खन्धा सिया परित्तारम्मणा, सिया महग्गतारम्मणा, सिया अप्पमाणारम्मणा, सिया न वत्तब्बा – ‘‘परित्तारम्मणा’’तिपि, ‘‘महग्गतारम्मणा’’तिपि, ‘‘अप्पमाणारम्मणा’’तिपि. रूपक्खन्धो मज्झिमो. चत्तारो खन्धा सिया हीना, सिया मज्झिमा, सिया पणीता. रूपक्खन्धो अनियतो. चत्तारो खन्धा सिया मिच्छत्तनियता, सिया सम्मत्तनियता, सिया अनियता.

रूपक्खन्धो अनारम्मणो. चत्तारो खन्धा सिया मग्गारम्मणा, सिया मग्गहेतुका, सिया मग्गाधिपतिनो, सिया न वत्तब्बा – ‘‘मग्गारम्मणा’’तिपि, ‘‘मग्गहेतुका’’तिपि, ‘‘मग्गाधिपतिनो’’तिपि; सिया उप्पन्ना, सिया अनुप्पन्ना, सिया उप्पादिनो; सिया अतीता, सिया अनागता, सिया पच्चुप्पन्ना. रूपक्खन्धो अनारम्मणो. चत्तारो खन्धा सिया अतीतारम्मणा, सिया अनागतारम्मणा, सिया पच्चुप्पन्नारम्मणा, सिया न वत्तब्बा – ‘‘अतीतारम्मणा’’तिपि, ‘‘अनागतारम्मणा’’तिपि, ‘‘पच्चुप्पन्नारम्मणा’’तिपि; सिया अज्झत्ता, सिया बहिद्धा, सिया अज्झत्तबहिद्धा. रूपक्खन्धो अनारम्मणो. चत्तारो खन्धा सिया अज्झत्तारम्मणा, सिया बहिद्धारम्मणा, सिया अज्झत्तबहिद्धारम्मणा, सिया न वत्तब्बा – ‘‘अज्झत्तारम्मणा’’तिपि, ‘‘बहिद्धारम्मणा’’तिपि, ‘‘अज्झत्तबहिद्धारम्मणा’’तिपि. चत्तारो खन्धा अनिदस्सनअप्पटिघा. रूपक्खन्धो सिया सनिदस्सनसप्पटिघो, सिया अनिदस्सनसप्पटिघो, सिया अनिदस्सनअप्पटिघो.

२. दुकं

१५३. चत्तारो खन्धा न हेतू. सङ्खारक्खन्धो सिया हेतु, सिया न हेतु. रूपक्खन्धो अहेतुको. चत्तारो खन्धा सिया सहेतुका, सिया अहेतुका. रूपक्खन्धो हेतुविप्पयुत्तो. चत्तारो खन्धा सिया हेतुसम्पयुत्ता, सिया हेतुविप्पयुत्ता. रूपक्खन्धो न वत्तब्बो – ‘‘हेतु चेव सहेतुको चा’’तिपि, ‘‘सहेतुको चेव न च हेतू’’तिपि. तयो खन्धा न वत्तब्बा – ‘‘हेतू चेव सहेतुका चा’’ति, सिया सहेतुका चेव न च हेतू, सिया न वत्तब्बा – ‘‘सहेतुका चेव न च हेतू’’ति. सङ्खारक्खन्धो सिया हेतु चेव सहेतुको च, सिया सहेतुको चेव न च हेतु, सिया न वत्तब्बो – ‘‘हेतु चेव सहेतुको चा’’तिपि, ‘‘सहेतुको चेव न च हेतू’’तिपि. रूपक्खन्धो न वत्तब्बो – ‘‘हेतु चेव हेतुसम्पयुत्तो चा’’तिपि, ‘‘हेतुसम्पयुत्तो चेव न च हेतू’’तिपि. तयो खन्धा न वत्तब्बा – ‘‘हेतू चेव हेतुसम्पयुत्ता चा’’ति, सिया हेतुसम्पयुत्ता चेव न च हेतू, सिया न वत्तब्बा – ‘‘हेतुसम्पयुत्ता चेव न च हेतू’’ति. सङ्खारक्खन्धो सिया हेतु चेव हेतुसम्पयुत्तो च, सिया हेतुसम्पयुत्तो चेव न च हेतु, सिया न वत्तब्बो – ‘‘हेतु चेव हेतुसम्पयुत्तो चा’’तिपि, ‘‘हेतुसम्पयुत्तो चेव न च हेतू’’तिपि. रूपक्खन्धो न हेतु अहेतुको. तयो खन्धा सिया न हेतू सहेतुका, सिया न हेतू अहेतुका. सङ्खारक्खन्धो सिया न हेतु सहेतुको, सिया न हेतु अहेतुको, सिया न वत्तब्बो – ‘‘न हेतु सहेतुको’’तिपि, ‘‘न हेतु अहेतुको’’तिपि.

सप्पच्चया, सङ्खता.

चत्तारो खन्धा अनिदस्सना. रूपक्खन्धो सिया सनिदस्सनो, सिया अनिदस्सनो. चत्तारो खन्धा अप्पटिघा. रूपक्खन्धो सिया सप्पटिघो, सिया अप्पटिघो. रूपक्खन्धो रूपं. चत्तारो खन्धा अरूपा. रूपक्खन्धो लोकियो. चत्तारो खन्धा सिया लोकिया, सिया लोकुत्तरा; केनचि विञ्ञेय्या, केनचि न विञ्ञेय्या.

चत्तारो खन्धा नो आसवा. सङ्खारक्खन्धो सिया आसवो, सिया नो आसवो. रूपक्खन्धो सासवो. चत्तारो खन्धा सिया सासवा, सिया अनासवा. रूपक्खन्धो आसवविप्पयुत्तो. चत्तारो खन्धा सिया आसवसम्पयुत्ता, सिया आसवविप्पयुत्ता. रूपक्खन्धो न वत्तब्बो – ‘‘आसवो चेव सासवो चा’’ति, सासवो चेव नो च आसवो. तयो खन्धा न वत्तब्बा – ‘‘आसवा चेव सासवा चा’’ति, सिया सासवा चेव नो च आसवा, सिया न वत्तब्बा – ‘‘सासवा चेव नो च आसवा’’ति. सङ्खारक्खन्धो सिया आसवो चेव सासवो च, सिया सासवो चेव नो च आसवो, सिया न वत्तब्बो – ‘‘आसवो चेव सासवो चा’’तिपि, ‘‘सासवो चेव नो च आसवो’’तिपि. रूपक्खन्धो न वत्तब्बो – ‘‘आसवो चेव आसवसम्पयुत्तो चा’’तिपि, ‘‘आसवसम्पयुत्तो चेव नो च आसवो’’तिपि. तयो खन्धा न वत्तब्बा – ‘‘आसवा चेव आसवसम्पयुत्ता चा’’ति, सिया आसवसम्पयुत्ता चेव नो च आसवा, सिया न वत्तब्बा – ‘‘आसवसम्पयुत्ता चेव नो च आसवा’’ति. सङ्खारक्खन्धो सिया आसवो चेव आसवसम्पयुत्तो च, सिया आसवसम्पयुत्तो चेव नो च आसवो, सिया न वत्तब्बो – ‘‘आसवो चेव आसवसम्पयुत्तो चा’’तिपि, ‘‘आसवसम्पयुत्तो चेव नो च आसवो’’तिपि. रूपक्खन्धो आसवविप्पयुत्तसासवो. चत्तारो खन्धा सिया आसवविप्पयुत्तसासवा, सिया आसवविप्पयुत्तअनासवा, सिया न वत्तब्बा – ‘‘आसवविप्पयुत्तसासवा’’तिपि, ‘‘आसवविप्पयुत्तअनासवा’’तिपि.

चत्तारो खन्धा नो संयोजना. सङ्खारक्खन्धो सिया संयोजनं, सिया नो संयोजनं. रूपक्खन्धो संयोजनियो. चत्तारो खन्धा सिया संयोजनिया, सिया असंयोजनिया. रूपक्खन्धो संयोजनविप्पयुत्तो. चत्तारो खन्धा सिया संयोजनसम्पयुत्ता, सिया संयोजनविप्पयुत्ता. रूपक्खन्धो न वत्तब्बो – ‘‘संयोजनञ्चेव संयोजनियो चा’’ति, ‘‘संयोजनियो चेव नो च संयोजनं’’. तयो खन्धा न वत्तब्बा – ‘‘संयोजना चेव संयोजनिया चा’’ति, सिया संयोजनिया चेव नो च संयोजना, सिया न वत्तब्बा – ‘‘संयोजनिया चेव नो च संयोजना’’ति. सङ्खारक्खन्धो सिया संयोजनञ्चेव संयोजनियो च, सिया संयोजनियो चेव नो च संयोजनं, सिया न वत्तब्बो – ‘‘संयोजनञ्चेव संयोजनियो चा’’तिपि, ‘‘संयोजनियो चेव नो च संयोजन’’न्तिपि. रूपक्खन्धो न वत्तब्बो – ‘‘संयोजनञ्चेव संयोजनसम्पयुत्तो चा’’तिपि, ‘‘संयोजनसम्पयुत्तो चेव नो च संयोजन’’न्तिपि. तयो खन्धा न वत्तब्बा – ‘‘संयोजना चेव संयोजनसम्पयुत्ता चा’’ति, सिया संयोजनसम्पयुत्ता चेव नो च संयोजना, सिया न वत्तब्बा – ‘‘संयोजनसम्पयुत्ता चेव नो च संयोजना’’ति. सङ्खारक्खन्धो सिया संयोजनञ्चेव संयोजनसम्पयुत्तो च, सिया संयोजनसम्पयुत्तो चेव नो च संयोजनं, सिया न वत्तब्बो – ‘‘संयोजनञ्चेव संयोजनसम्पयुत्तो चा’’तिपि, ‘‘संयोजनसम्पयुत्तो चेव नो च संयोजन’’न्तिपि. रूपक्खन्धो संयोजनविप्पयुत्तसंयोजनियो. चत्तारो खन्धा सिया संयोजनविप्पयुत्तसंयोजनिया, सिया संयोजनविप्पयुत्तअसंयोजनिया, सिया न वत्तब्बा – ‘‘संयोजनविप्पयुत्तसंयोजनिया’’तिपि, ‘‘संयोजनविप्पयुत्तअसंयोजनिया’’तिपि.

चत्तारो खन्धा नो गन्था. सङ्खारक्खन्धो सिया गन्थो, सिया नो गन्थो. रूपक्खन्धो गन्थनियो. चत्तारो खन्धा सिया गन्थनिया, सिया अगन्थनिया. रूपक्खन्धो गन्थविप्पयुत्तो. चत्तारो खन्धा सिया गन्थसम्पयुत्ता, सिया गन्थविप्पयुत्ता. रूपक्खन्धो न वत्तब्बो – ‘‘गन्थो चेव गन्थनियो चा’’ति, ‘‘गन्थनियो चेव नो च गन्थो’’. तयो खन्धा न वत्तब्बा – ‘‘गन्था चेव गन्थनिया चा’’ति, सिया गन्थनिया चेव नो च गन्था, सिया न वत्तब्बा – ‘‘गन्थनिया चेव नो च गन्था’’ति. सङ्खारक्खन्धो सिया गन्थो चेव गन्थनियो च, सिया गन्थनियो चेव नो च गन्थो, सिया न वत्तब्बो – ‘‘गन्थो चेव गन्थनियो चा’’तिपि, ‘‘गन्थनियो चेव नो च गन्थो’’तिपि. रूपक्खन्धो न वत्तब्बो – ‘‘गन्थो चेव गन्थसम्पयुत्तो चा’’तिपि, ‘‘गन्थसम्पयुत्तो चेव नो च गन्थो’’तिपि. तयो खन्धा न वत्तब्बा – ‘‘गन्था चेव गन्थसम्पयुत्ता चा’’ति, सिया गन्थसम्पयुत्ता चेव नो च गन्था, सिया न वत्तब्बा – ‘‘गन्थसम्पयुत्ता चेव नो च गन्था’’ति. सङ्खारक्खन्धो सिया गन्थो चेव गन्थसम्पयुत्तो च, सिया गन्थसम्पयुत्तो चेव नो च गन्थो, सिया न वत्तब्बो – ‘‘गन्थो चेव गन्थसम्पयुत्तो चा’’तिपि, ‘‘गन्थसम्पयुत्तो चेव नो च गन्थो’’ति पि. रूपक्खन्धो गन्थविप्पयुत्तगन्थनियो. चत्तारो खन्धा सिया गन्थविप्पयुत्तगन्थनिया, सिया गन्थविप्पयुत्तअगन्थनिया, सिया न वत्तब्बा – ‘‘गन्थविप्पयुत्तगन्थनिया’’तिपि, ‘‘गन्थविप्पयुत्तअगन्थनिया’’तिपि.

चत्तारो खन्धा नो ओघा…पे… नो योगा…पे… नो नीवरणा. सङ्खारक्खन्धो सिया नीवरणं, सिया नो नीवरणं. रूपक्खन्धो नीवरणियो. चत्तारो खन्धा सिया नीवरणिया, सिया अनीवरणिया. रूपक्खन्धो नीवरणविप्पयुत्तो. चत्तारो खन्धा सिया नीवरणसम्पयुत्ता, सिया नीवरणविप्पयुत्ता. रूपक्खन्धो न वत्तब्बो – ‘‘नीवरणञ्चेव नीवरणियो चा’’ति, ‘‘नीवरणियो चेव नो च नीवरणं’’. तयो खन्धा न वत्तब्बा – ‘‘नीवरणा चेव नीवरणिया चा’’ति, सिया नीवरणिया चेव नो च नीवरणा, सिया न वत्तब्बा – ‘‘नीवरणिया चेव नो च नीवरणा’’ति. सङ्खारक्खन्धो सिया नीवरणञ्चेव नीवरणियो च, सिया नीवरणियो चेव नो च नीवरणं, सिया न वत्तब्बो – ‘‘नीवरणञ्चेव नीवरणियो चा’’तिपि, ‘‘नीवरणियो चेव नो च नीवरण’’न्तिपि. रूपक्खन्धो न वत्तब्बो – ‘‘नीवरणञ्चेव नीवरणसम्पयुत्तो चा’’तिपि, ‘‘नीवरणसम्पयुत्तो चेव नो च नीवरण’’न्तिपि. तयो खन्धा न वत्तब्बा – ‘‘नीवरणा चेव नीवरणसम्पयुत्ता चा’’ति, सिया नीवरणसम्पयुत्ता चेव नो च नीवरणा, सिया न वत्तब्बा – ‘‘नीवरणसम्पयुत्ता चेव नो च नीवरणा’’ति. सङ्खारक्खन्धो सिया नीवरणञ्चेव नीवरणसम्पयुत्तो च, सिया नीवरणसम्पयुत्तो चेव नो च नीवरणं, सिया न वत्तब्बो – ‘‘नीवरणञ्चेव नीवरणसम्पयुत्तो चा’’तिपि, ‘‘नीवरणसम्पयुत्तो चेव नो च नीवरण’’न्तिपि. रूपक्खन्धो नीवरणविप्पयुत्तनीवरणियो. चत्तारो खन्धा सिया नीवरणविप्पयुत्तनीवरणिया, सिया नीवरणविप्पयुत्तअनीवरणिया, सिया न वत्तब्बा – ‘‘नीवरणविप्पयुत्तनीवरणिया’’तिपि, ‘‘नीवरणविप्पयुत्तअनीवरणिया’’तिपि.

चत्तारो खन्धा नो परामासा. सङ्खारक्खन्धो सिया परामासो, सिया नो परामासो. रूपक्खन्धो परामट्ठो. चत्तारो खन्धा सिया परामट्ठा, सिया अपरामट्ठा. रूपक्खन्धो परामासविप्पयुत्तो. तयो खन्धा सिया परामाससम्पयुत्ता, सिया परामासविप्पयुत्ता. सङ्खारक्खन्धो सिया परामाससम्पयुत्तो, सिया परामासविप्पयुत्तो, सिया न वत्तब्बो – ‘‘परामाससम्पयुत्तो’’तिपि, ‘‘परामासविप्पयुत्तो’’तिपि. रूपक्खन्धो न वत्तब्बो – ‘‘परामासो चेव परामट्ठो चा’’ति, ‘‘परामट्ठो चेव नो च परामासो’’. तयो खन्धा न वत्तब्बा – ‘‘परामासा चेव परामट्ठा चा’’ति, सिया परामट्ठा चेव नो च परामासा, सिया न वत्तब्बा – ‘‘परामट्ठा चेव नो च परामासा’’ति. सङ्खारक्खन्धो सिया परामासो चेव परामट्ठो च, सिया परामट्ठो चेव नो च परामासो, सिया न वत्तब्बो – ‘‘परामासो चेव परामट्ठो चा’’तिपि, ‘‘परामट्ठो चेव नो च परामासो’’तिपि. रूपक्खन्धो परामासविप्पयुत्तपरामट्ठो. चत्तारो खन्धा सिया परामासविप्पयुत्तपरामट्ठा, सिया परामासविप्पयुत्तअपरामट्ठा, सिया न वत्तब्बा – ‘‘परामासविप्पयुत्तपरामट्ठा’’तिपि, ‘‘परामासविप्पयुत्तअपरामट्ठा’’तिपि.

रूपक्खन्धो अनारम्मणो. चत्तारो खन्धा सारम्मणा. विञ्ञाणक्खन्धो चित्तं. चत्तारो खन्धा नो चित्ता. तयो खन्धा चेतसिका. द्वे खन्धा अचेतसिका. तयो खन्धा चित्तसम्पयुत्ता. रूपक्खन्धो चित्तविप्पयुत्तो. विञ्ञाणक्खन्धो न वत्तब्बो – ‘‘चित्तेन सम्पयुत्तो’’तिपि, ‘‘चित्तेन विप्पयुत्तो’’तिपि. तयो खन्धा चित्तसंसट्ठा. रूपक्खन्धो चित्तविसंसट्ठो. विञ्ञाणक्खन्धो न वत्तब्बो – ‘‘चित्तेन संसट्ठो’’तिपि, ‘‘चित्तेन विसंसट्ठो’’तिपि. तयो खन्धा चित्तसमुट्ठाना. विञ्ञाणक्खन्धो नो चित्तसमुट्ठानो. रूपक्खन्धो सिया चित्तसमुट्ठानो, सिया नो चित्तसमुट्ठानो. तयो खन्धा चित्तसहभुनो. विञ्ञाणक्खन्धो नो चित्तसहभू. रूपक्खन्धो सिया चित्तसहभू, सिया नो चित्तसहभू. तयो खन्धा चित्तानुपरिवत्तिनो. विञ्ञाणक्खन्धो नो चित्तानुपरिवत्ति. रूपक्खन्धो सिया चित्तानुपरिवत्ति, सिया नो चित्तानुपरिवत्ति. तयो खन्धा चित्तसंसट्ठसमुट्ठाना. द्वे खन्धा नो चित्तसंसट्ठसमुट्ठाना. तयो खन्धा चित्तसंसट्ठसमुट्ठानसहभुनो. द्वे खन्धा नो चित्तसंसट्ठसमुट्ठानसहभुनो. तयो खन्धा चित्तसंसट्ठसमुट्ठानानुपरिवत्तिनो. द्वे खन्धा नो चित्तसंसट्ठसमुट्ठानानुपरिवत्तिनो.

विञ्ञाणक्खन्धो अज्झत्तिको. तयो खन्धा बाहिरा. रूपक्खन्धो सिया अज्झत्तिको, सिया बाहिरो. चत्तारो खन्धा नो उपादा. रूपक्खन्धो सिया उपादा, सिया नो उपादा, सिया उपादिन्ना, सिया अनुपादिन्ना. चत्तारो खन्धा नो उपादाना. सङ्खारक्खन्धो सिया उपादानं, सिया नो उपादानं. रूपक्खन्धो उपादानियो. चत्तारो खन्धा सिया उपादानिया, सिया अनुपादानिया. रूपक्खन्धो उपादानविप्पयुत्तो. चत्तारो खन्धा सिया उपादानसम्पयुत्ता, सिया उपादानविप्पयुत्ता. रूपक्खन्धो न वत्तब्बो – ‘‘उपादानञ्चेव उपादानियो चा’’ति, ‘‘उपादानियो चेव नो च उपादानं’’. तयो खन्धा न वत्तब्बा – ‘‘उपादानञ्चेव उपादानिया चा’’ति, सिया उपादानिया चेव नो च उपादाना, सिया न वत्तब्बा – ‘‘उपादानिया चेव नो च उपादाना’’ति. सङ्खारक्खन्धो सिया उपादानञ्चेव उपादानियो च, सिया उपादानियो चेव नो च उपादानं, सिया न वत्तब्बो – ‘‘उपादानञ्चेव उपादानियो चा’’तिपि, ‘‘उपादानियो चेव नो च उपादान’’न्तिपि. रूपक्खन्धो न वत्तब्बो – ‘‘उपादानञ्चेव उपादानसम्पयुत्तो चा’’तिपि, ‘‘उपादानसम्पयुत्तो चेव नो च उपादान’’न्तिपि. तयो खन्धा न वत्तब्बा – ‘‘उपादाना चेव उपादानसम्पयुत्ता चा’’ति, सिया उपादानसम्पयुत्ता चेव नो च उपादाना, सिया न वत्तब्बा – ‘‘उपादानसम्पयुत्ता चेव नो च उपादाना’’ति. सङ्खारक्खन्धो सिया उपादानञ्चेव उपादानसम्पयुत्तो च, सिया उपादानसम्पयुत्तो चेव नो च उपादानं, सिया न वत्तब्बो – ‘‘उपादानञ्चेव उपादानसम्पयुत्तो चा’’तिपि, ‘‘उपादानसम्पयुत्तो चेव नो च उपादान’’न्तिपि. रूपक्खन्धो उपादानविप्पयुत्तउपादानियो. चत्तारो खन्धा सिया उपादानविप्पयुत्तउपादानिया, सिया उपादानविप्पयुत्तअनुपादानिया, सिया न वत्तब्बा – ‘‘उपादानविप्पयुत्तउपादानिया’’तिपि, ‘‘उपादानविप्पयुत्तअनुपादानिया’’तिपि.

चत्तारो खन्धा नो किलेसा. सङ्खारक्खन्धो सिया किलेसो, सिया नो किलेसो. रूपक्खन्धो संकिलेसिको. चत्तारो खन्धा सिया संकिलेसिका, सिया असंकिलेसिका. रूपक्खन्धो असंकिलिट्ठो. चत्तारो खन्धा सिया संकिलिट्ठा, सिया असंकिलिट्ठा. रूपक्खन्धो किलेसविप्पयुत्तो. चत्तारो खन्धा सिया किलेससम्पयुत्ता, सिया किलेसविप्पयुत्ता. रूपक्खन्धो न वत्तब्बो – ‘‘किलेसो चेव संकिलेसिको चा’’ति, ‘‘संकिलेसिको चेव नो च किलेसो’’. तयो खन्धा न वत्तब्बा – ‘‘किलेसा चेव संकिलेसिका चा’’ति, सिया संकिलेसिका चेव नो च किलेसा, सिया न वत्तब्बा – ‘‘संकिलेसिका चेव नो च किलेसा’’ति. सङ्खारक्खन्धो सिया किलेसो चेव संकिलेसिको च, सिया संकिलेसिको चेव नो च किलेसो, सिया न वत्तब्बो – ‘‘किलेसो चेव संकिलेसिको चा’’तिपि, ‘‘संकिलेसिको चेव नो च किलेसो’’तिपि. रूपक्खन्धो न वत्तब्बो – ‘‘किलेसो चेव संकिलिट्ठो चा’’तिपि, ‘‘संकिलिट्ठो चेव नो च किलेसो’’तिपि. तयो खन्धा न वत्तब्बा – ‘‘किलेसो चेव संकिलिट्ठा चा’’ति, सिया संकिलिट्ठा चेव नो च किलेसा, सिया न वत्तब्बा – ‘‘संकिलिट्ठा चेव नो च किलेसा’’ति. सङ्खारक्खन्धो सिया किलेसो चेव संकिलिट्ठो च, सिया संकिलिट्ठो चेव नो च किलेसो, सिया न वत्तब्बो – ‘‘किलेसो चेव संकिलिट्ठो चा’’तिपि, ‘‘संकिलिट्ठो चेव नो च किलेसो’’तिपि.

रूपक्खन्धो न वत्तब्बो – ‘‘किलेसो चेव किलेससम्पयुत्तो चा’’तिपि, ‘‘किलेससम्पयुत्तो चेव नो च किलेसो’’तिपि. तयो खन्धा न वत्तब्बा – ‘‘किलेसा चेव किलेससम्पयुत्ता चा’’ति, सिया किलेससम्पयुत्ता चेव नो च किलेसा, सिया न वत्तब्बा – किलेससम्पयुत्ता चेव नो च किलेसा’’ति. सङ्खारक्खन्धो सिया किलेसो चेव किलेससम्पयुत्तो च, सिया किलेससम्पयुत्तो चेव नो च किलेसो, सिया न वत्तब्बो – ‘‘किलेसो चेव किलेससम्पयुत्तो चा’’तिपि, ‘‘किलेससम्पयुत्तो चेव नो च किलेसो’’तिपि. रूपक्खन्धो किलेसविप्पयुत्तसंकिलेसिको. चत्तारो खन्धा सिया किलेसविप्पयुत्तसंकिलेसिका, सिया किलेसविप्पयुत्तअसंकिलेसिका, सिया न वत्तब्बा – ‘‘किलेसविप्पयुत्तसंकिलेसिका’’तिपि, ‘‘किलेसविप्पयुत्तअसंकिलेसिका’’तिपि.

रूपक्खन्धो न दस्सनेन पहातब्बो. चत्तारो खन्धा सिया दस्सनेन पहातब्बा, सिया न दस्सनेन पहातब्बा. रूपक्खन्धो न भावनाय पहातब्बो. चत्तारो खन्धा सिया भावनाय पहातब्बा, सिया न भावनाय पहातब्बा. रूपक्खन्धो न दस्सनेन पहातब्बहेतुको. चत्तारो खन्धा सिया दस्सनेन पहातब्बहेतुका, सिया न दस्सनेन पहातब्बहेतुका. रूपक्खन्धो न भावनाय पहातब्बहेतुको. चत्तारो खन्धा सिया भावनाय पहातब्बहेतुका, सिया न भावनाय पहातब्बहेतुका. रूपक्खन्धो अवितक्को. चत्तारो खन्धा सिया सवितक्का, सिया अवितक्का. रूपक्खन्धो अविचारो. चत्तारो खन्धा सिया सविचारा, सिया अविचारा. रूपक्खन्धो अप्पीतिको, चत्तारो खन्धा सिया सप्पीतिका, सिया अप्पीतिका. रूपक्खन्धो न पीतिसहगतो. चत्तारो खन्धा सिया पीतिसहगता, सिया न पीतिसहगता. द्वे खन्धा न सुखसहगता. तयो खन्धा सिया सुखसहगता, सिया न सुखसहगता. द्वे खन्धा न उपेक्खासहगता. तयो खन्धा सिया उपेक्खासहगता, सिया न उपेक्खासहगता.

रूपक्खन्धो कामावचरो. चत्तारो खन्धा सिया कामावचरा, सिया न कामावचरा. रूपक्खन्धो न रूपावचरो. चत्तारो खन्धा सिया रूपावचरा, सिया न रूपावचरा. रूपक्खन्धो न अरूपावचरो. चत्तारो खन्धा सिया अरूपावचरा, सिया न अरूपावचरा. रूपक्खन्धो परियापन्नो. चत्तारो खन्धा सिया परियापन्ना, सिया अपरियापन्ना. रूपक्खन्धो अनिय्यानिको. चत्तारो खन्धा सिया निय्यानिका, सिया अनिय्यानिका. रूपक्खन्धो अनियतो. चत्तारो खन्धा सिया नियता, सिया अनियता. रूपक्खन्धो सउत्तरो. चत्तारो खन्धा सिया सउत्तरा, सिया अनुत्तरा. रूपक्खन्धो अरणो. चत्तारो खन्धा सिया सरणा, सिया अरणाति.

पञ्हापुच्छकं.

खन्धविभङ्गो निट्ठितो.