६. छक्कपुग्गलपञ्ञत्ति

२०२. तत्र य्वायं पुग्गलो पुब्बे अननुस्सुतेसु धम्मेसु सामं सच्चानि अभिसम्बुज्झति, तत्थ च सब्बञ्ञुतं पापुणाति बलेसु च वसीभावं, सम्मासम्बुद्धो तेन दट्ठब्बो.

तत्र य्वायं पुग्गलो पुब्बे अननुस्सुतेसु धम्मेसु सामं सच्चानि अभिसम्बुज्झति, न च तत्थ सब्बञ्ञुतं पापुणाति न च बलेसु वसीभावं, पच्चेकसम्बुद्धो तेन दट्ठब्बो.

तत्र य्वायं पुग्गलो पुब्बे अननुस्सुतेसु धम्मेसु सामं सच्चानि अनभिसम्बुज्झति, दिट्ठेव धम्मे दुक्खस्सन्तकरो होति [दुक्खस्सन्तं करोति (सी.) एवमुपरिपि], सावकपारमिञ्च पापुणाति, सारिपुत्तमोग्गल्लाना तेन दट्ठब्बा.

तत्र य्वायं पुग्गलो पुब्बे अननुस्सुतेसु धम्मेसु सामं सच्चानि अनभिसम्बुज्झति, दिट्ठेव धम्मे दुक्खस्सन्तकरो होति, न च सावकपारमिं पापुणाति, अवसेसा अरहन्ता तेन दट्ठब्बा.

तत्र य्वायं पुग्गलो पुब्बे अननुस्सुतेसु धम्मेसु सामं सच्चानि अनभिसम्बुज्झति, न च दिट्ठेव धम्मे दुक्खस्सन्तकरो होति, अनागामी होति अनागन्ता इत्थत्तं, अनागामी तेन दट्ठब्बो.

तत्र य्वायं पुग्गलो पुब्बे अननुस्सुतेसु धम्मेसु सामं सच्चानि अनभिसम्बुज्झति, न च दिट्ठेव धम्मे दुक्खस्सन्तकरो होति, आगन्ता इत्थत्तं, सोतापन्नसकदागामिनो तेन दट्ठब्बा.

छक्कनिद्देसो.