६. नहेतुसहेतुकदुकं

१-७. पटिच्चवारादि

१३. नहेतुं नसहेतुकं धम्मं पटिच्च नहेतु नसहेतुको धम्मो उप्पज्जति हेतुपच्चया – एकं महाभूतं पटिच्च तयो महाभूता…पे…. नहेतुं नसहेतुकं धम्मं पटिच्च नहेतु नअहेतुको धम्मो उप्पज्जति हेतुपच्चया – पटिसन्धिक्खणे वत्थुं पटिच्च नहेतुसहेतुका खन्धा. नहेतुं नसहेतुकं धम्मं पटिच्च नहेतु नसहेतुको च नहेतु नअहेतुको च धम्मा उप्पज्जन्ति हेतुपच्चया. (३)

नहेतुं नअहेतुकं धम्मं पटिच्च नहेतु नअहेतुको धम्मो उप्पज्जति हेतुपच्चया. नहेतुं नअहेतुकं धम्मं पटिच्च नहेतु नसहेतुको धम्मो उप्पज्जति हेतुपच्चया. नहेतुं नअहेतुकं धम्मं पटिच्च नहेतु नसहेतुको च नहेतु नअहेतुको च धम्मा उप्पज्जन्ति हेतुपच्चया. (३)

नहेतुं नसहेतुकञ्च नहेतुं नअहेतुकञ्च धम्मं पटिच्च नहेतु नसहेतुको धम्मो उप्पज्जति हेतुपच्चया. नहेतुं नसहेतुकञ्च नहेतुं नअहेतुकञ्च धम्मं पटिच्च नहेतु नअहेतुको धम्मो उप्पज्जति हेतुपच्चया. नहेतुं नसहेतुकञ्च नहेतुं नअहेतुकञ्च धम्मं पटिच्च नहेतु नसहेतुको च नहेतु नअहेतुको च धम्मा उप्पज्जन्ति हेतुपच्चया. (३) (संखित्तं.)

१४. हेतुया नव, आरम्मणे चत्तारि…पे… अविगते नव.

(सहजातवारम्पि…पे… सम्पयुत्तवारम्पि पटिच्चवारसदिसं.)

आरम्मणपच्चयो

१५. नहेतु नसहेतुको धम्मो नहेतुस्स नसहेतुकस्स धम्मस्स आरम्मणपच्चयेन पच्चयो. नहेतु नसहेतुको धम्मो नहेतुस्स नअहेतुकस्स धम्मस्स आरम्मणपच्चयेन पच्चयो. (२)

नहेतु नअहेतुको धम्मो नहेतुस्स नअहेतुकस्स धम्मस्स आरम्मणपच्चयेन पच्चयो. नहेतु नअहेतुको धम्मो नहेतुस्स नसहेतुकस्स धम्मस्स आरम्मणपच्चयेन पच्चयो. (२) (संखित्तं.)

१६. आरम्मणे चत्तारि…पे… अविगते सत्त.

हेतुगोच्छकं निट्ठितं.