१-७. पटिच्चवारादि

९. नहेतुसम्पयुत्तं धम्मं पटिच्च नहेतुसम्पयुत्तो धम्मो उप्पज्जति हेतुपच्चया. नहेतुसम्पयुत्तं धम्मं पटिच्च नहेतुविप्पयुत्तो धम्मो उप्पज्जति हेतुपच्चया. नहेतुसम्पयुत्तं धम्मं पटिच्च नहेतुसम्पयुत्तो च नहेतुविप्पयुत्तो च धम्मा उप्पज्जन्ति हेतुपच्चया. (३)

नहेतुविप्पयुत्तं धम्मं पटिच्च नहेतुविप्पयुत्तो धम्मो उप्पज्जति हेतुपच्चया. नहेतुविप्पयुत्तं धम्मं पटिच्च नहेतुसम्पयुत्तो धम्मो उप्पज्जति हेतुपच्चया. नहेतुविप्पयुत्तं धम्मं पटिच्च नहेतुसम्पयुत्तो च नहेतुविप्पयुत्तो च धम्मा उप्पज्जन्ति हेतुपच्चया. (३)

नहेतुसम्पयुत्तञ्च नहेतुविप्पयुत्तञ्च धम्मं पटिच्च नहेतुसम्पयुत्तो धम्मो उप्पज्जति हेतुपच्चया… तीणि. (संखित्तं.)

१०. हेतुया नव, आरम्मणे छ…पे… अविगते नव. (सहजातवारेपि…पे… पञ्हावारेपि सब्बत्थ वित्थारेतब्बं.)