१-७. पटिच्चवारादि

पच्चयचतुक्कं

हेतुपच्चयो

५. नसहेतुकं धम्मं पटिच्च नसहेतुको धम्मो उप्पज्जति हेतुपच्चया – विचिकिच्छासहगतं उद्धच्चसहगतं मोहं पटिच्च चित्तसमुट्ठानं रूपं, एकं महाभूतं पटिच्च तयो महाभूता…पे… द्वे महाभूते पटिच्च द्वे महाभूता, महाभूते पटिच्च चित्तसमुट्ठानं रूपं कटत्तारूपं उपादारूपं. नसहेतुकं धम्मं पटिच्च नअहेतुको धम्मो उप्पज्जति हेतुपच्चया – विचिकिच्छासहगतं उद्धच्चसहगतं मोहं पटिच्च सम्पयुत्तका खन्धा; पटिसन्धिक्खणे वत्थुं पटिच्च सहेतुका खन्धा. नसहेतुकं धम्मं पटिच्च नसहेतुको च नअहेतुको च धम्मा उप्पज्जन्ति हेतुपच्चया. (३)

नअहेतुकं धम्मं पटिच्च नअहेतुको धम्मो उप्पज्जति हेतुपच्चया… तीणि.

नसहेतुकञ्च नअहेतुकञ्च धम्मं पटिच्च नसहेतुको धम्मो उप्पज्जति हेतुपच्चया. नसहेतुकञ्च नअहेतुकञ्च धम्मं पटिच्च नअहेतुको धम्मो उप्पज्जति हेतुपच्चया. नसहेतुकञ्च नअहेतुकञ्च धम्मं पटिच्च नसहेतुको च नअहेतुको च धम्मा उप्पज्जन्ति हेतुपच्चया. (३) (संखित्तं.)

६. हेतुया नव, आरम्मणे छ…पे… अविगते नव.

(सहजातवारम्पि…पे… सम्पयुत्तवारम्पि पटिच्चवारसदिसं एवं वित्थारेतब्बं.)

हेतु-आरम्मणपच्चया

७. नसहेतुको धम्मो नसहेतुकस्स धम्मस्स हेतुपच्चयेन पच्चयो. नसहेतुको धम्मो नअहेतुकस्स धम्मस्स हेतुपच्चयेन पच्चयो. नसहेतुको धम्मो नसहेतुकस्स च नअहेतुकस्स च धम्मस्स हेतुपच्चयेन पच्चयो. (३)

नअहेतुको धम्मो नअहेतुकस्स धम्मस्स हेतुपच्चयेन पच्चयो… तीणि.

नसहेतुको धम्मो नसहेतुकस्स धम्मस्स आरम्मणपच्चयेन पच्चयो (संखित्तं.)

८. हेतुया छ, आरम्मणे नव…पे… अविगते नव.

(यथा कुसलत्तिके पञ्हावारं, एवं वित्थारेतब्बं.)