१३. केनचिविञ्ञेय्यदुकं

१-७. पटिच्चवारादि

२७. नकेनचि विञ्ञेय्यं धम्मं पटिच्च नकेनचि विञ्ञेय्यो धम्मो उप्पज्जति हेतुपच्चया. नकेनचि विञ्ञेय्यं धम्मं पटिच्च ननकेनचि विञ्ञेय्यो धम्मो उप्पज्जति हेतुपच्चया. नकेनचि विञ्ञेय्यं धम्मं पटिच्च नकेनचि विञ्ञेय्यो च ननकेनचि विञ्ञेय्यो च धम्मा उप्पज्जन्ति हेतुपच्चया. (३)

ननकेनचि विञ्ञेय्यं धम्मं पटिच्च ननकेनचि विञ्ञेय्यो धम्मो उप्पज्जति हेतुपच्चया… तीणि.

नकेनचि विञ्ञेय्यञ्च ननकेनचि विञ्ञेय्यञ्च धम्मं पटिच्च नकेनचि विञ्ञेय्यो धम्मो उप्पज्जति हेतुपच्चया… तीणि. (संखित्तं.)

हेतुया नव…पे… अविगते नव. (सब्बत्थ वित्थारो.)

चूळन्तरदुकं निट्ठितं.