अनुत्तरपदं

हेतु-अनन्तरपच्चया

९०. नसरणं नअनुत्तरं धम्मं पच्चया अरणो अनुत्तरो धम्मो उप्पज्जति हेतुपच्चया. हेतुया एकं…पे… अविगते एकं.

९१. नसरणो नअनुत्तरो धम्मो अरणस्स अनुत्तरस्स धम्मस्स अनन्तरपच्चयेन पच्चयो. अनन्तरे एकं, समनन्तरे एकं, उपनिस्सये द्वे, पुरेजाते एकं, आसेवने एकं, विप्पयुत्ते एकं, अत्थिया एकं, नत्थिया एकं, विगते एकं, अविगते एकं.

पच्चनीयुद्धारो

९२. नसरणो नअनुत्तरो धम्मो अरणस्स अनुत्तरस्स धम्मस्स उपनिस्सयपच्चयेन पच्चयो… पुरेजातपच्चयेन पच्चयो.

नअरणो नअनुत्तरो धम्मो अरणस्स अनुत्तरस्स धम्मस्स उपनिस्सयपच्चयेन पच्चयो. नहेतुया द्वे, नआरम्मणे द्वे…पे… नउपनिस्सये एकं, नपुरेजाते द्वे…पे… नोअविगते द्वे.

उपनिस्सयपच्चया नहेतुया द्वे. (संखित्तं.)

नहेतुपच्चया उपनिस्सये द्वे, पुरेजाते एकं…पे… अत्थिया एकं…पे… अविगते एकं. (संखित्तं.)

(यथा कुसलत्तिके पञ्हावारं एवं वित्थारेतब्बं.)

अनुलोमदुकतिकपट्ठानतो पट्ठाय याव परियोसाना तिंसमत्तेहि भाणवारेहि पट्ठानं.

धम्मपच्चनीयानुलोमे दुकदुकपट्ठानं निट्ठितं.

पच्चनीयानुलोमपट्ठानं निट्ठितं.

पट्ठानपकरणं निट्ठितं.