१७-२२. आसवसासवदुकादि-सनिदस्सनत्तिकं

९७. नआसवञ्चेव नअनासवञ्च नसनिदस्सनसप्पटिघं धम्मं पटिच्च सासवो चेव नो च आसवो सनिदस्सनसप्पटिघो धम्मो उप्पज्जति हेतुपच्चया.

नअनासवञ्चेव ननो च आसवं नसनिदस्सनसप्पटिघं धम्मं पटिच्च सासवो चेव नो च आसवो सनिदस्सनसप्पटिघो धम्मो उप्पज्जति हेतुपच्चया… गणितकेन तीणि.

(नआसवञ्चेव नअनासवं नअनिदस्सनसप्पटिघमूलेपि पुरिमनयेन तीणियेव.)

नआसवञ्चेव नअनासवञ्च नअनिदस्सनअप्पटिघं धम्मं पटिच्च सासवो चेव नो च आसवो अनिदस्सनअप्पटिघो धम्मो उप्पज्जति हेतुपच्चया. हेतुया एकं.

(आसवआसवसम्पयुत्तदुके पञ्हा न लब्भति.)