धम्मपच्चनीयानुलोमे दुकतिकपट्ठानं

१-१. हेतुदुक-कुसलत्तिकं

१. नहेतुं नकुसलं धम्मं पच्चया हेतु कुसलो धम्मो उप्पज्जति हेतुपच्चया. नहेतुं नकुसलं धम्मं पच्चया नहेतु कुसलो धम्मो उप्पज्जति हेतुपच्चया. नहेतुं नकुसलं धम्मं पच्चया हेतु कुसलो च नहेतु कुसलो च धम्मा उप्पज्जन्ति हेतुपच्चया. हेतुया तीणि.

नहेतुं नअकुसलं धम्मं पच्चया हेतु अकुसलो धम्मो उप्पज्जति हेतुपच्चया… हेतुया तीणि.

२. नहेतुं नअब्याकतं धम्मं पटिच्च नहेतु अब्याकतो धम्मो उप्पज्जति हेतुपच्चया. ननहेतुं नअब्याकतं धम्मं पटिच्च नहेतु अब्याकतो धम्मो उप्पज्जति हेतुपच्चया. नहेतुं नअब्याकतञ्च ननहेतुं नअब्याकतञ्च धम्मं पटिच्च नहेतु अब्याकतो धम्मो उप्पज्जति हेतुपच्चया. हेतुया तीणि.

२-४-१. सहेतुकादिदुकानि-कुसलत्तिकं

३. नसहेतुकं नकुसलं धम्मं पच्चया सहेतुको कुसलो धम्मो उप्पज्जति हेतुपच्चया. हेतुया एकं.

नसहेतुकं नअकुसलं धम्मं पच्चया सहेतुको अकुसलो धम्मो उप्पज्जति हेतुपच्चया. हेतुया एकं.

४. नसहेतुकं नअब्याकतं धम्मं पटिच्च अहेतुको अब्याकतो धम्मो उप्पज्जति हेतुपच्चया. नअहेतुकं नअब्याकतं धम्मं पटिच्च अहेतुको अब्याकतो धम्मो उप्पज्जति हेतुपच्चया. नसहेतुकं नअब्याकतञ्च नअहेतुकं नअब्याकतञ्च धम्मं पटिच्च अहेतुको अब्याकतो धम्मो उप्पज्जति हेतुपच्चया… हेतुया तीणि.

५. नहेतुसम्पयुत्तं नकुसलं धम्मं पच्चया….

६. नहेतु चेव नअहेतुको च नकुसलो धम्मो हेतुस्स चेव सहेतुकस्स च कुसलस्स धम्मस्स आरम्मणपच्चयेन पच्चयो. नहेतु चेव नअहेतुको च नकुसलो धम्मो सहेतुकस्स चेव न च हेतुस्स कुसलस्स धम्मस्स आरम्मणपच्चयेन पच्चयो. नहेतु चेव नअहेतुको च नकुसलो धम्मो हेतुस्स चेव सहेतुकस्स कुसलस्स च सहेतुकस्स चेव न च हेतुस्स कुसलस्स च धम्मस्स आरम्मणपच्चयेन पच्चयो. तीणि.

नअहेतुको चेव नन च हेतु नकुसलो धम्मो हेतुस्स चेव सहेतुकस्स च कुसलस्स धम्मस्स आरम्मणपच्चयेन पच्चयो… तीणि.

नहेतु चेव नअहेतुको नकुसलो च नअहेतुको चेव ननहेतु नकुसलो च धम्मा हेतुस्स चेव सहेतुकस्स च कुसलस्स धम्मस्स आरम्मणपच्चयेन पच्चयो… तीणि. (सब्बत्थ नव पञ्हा.)

७. नहेतु चेव नअहेतुको च नअकुसलो धम्मो हेतुस्स चेव सहेतुकस्स च अकुसलस्स धम्मस्स आरम्मणपच्चयेन पच्चयो (संखित्तं, नव पञ्हा).

नहेतु चेव नअहेतुको च नअब्याकतो धम्मो हेतुस्स चेव सहेतुकस्स च अब्याकतस्स धम्मस्स आरम्मणपच्चयेन पच्चयो… तीणि. (नव पञ्हा.)

५-१. हेतुहेतुसम्पयुत्तदुक-कुसलत्तिकं

८. नहेतु चेव नहेतुविप्पयुत्तो च नकुसलो धम्मो हेतुस्स चेव हेतुसम्पयुत्तस्स च कुसलस्स धम्मस्स आरम्मणपच्चयेन पच्चयो (संखित्तं, नव पञ्हा कातब्बा).

नहेतु चेव नहेतुविप्पयुत्तो च नअकुसलो धम्मो हेतुस्स चेव हेतुसम्पयुत्तस्स च अकुसलस्स धम्मस्स आरम्मणपच्चयेन पच्चयो (संखित्तं, नव पञ्हा कातब्बा).

नहेतु चेव नहेतुविप्पयुत्तो च नअब्याकतो धम्मो हेतुस्स चेव हेतुसम्पयुत्तस्स च अब्याकतस्स धम्मस्स आरम्मणपच्चयेन पच्चयो… तीणि. (नव पञ्हा कातब्बा.)

६-१. नहेतुसहेतुकदुक-कुसलत्तिकं

९. नहेतुं नसहेतुकं नकुसलं धम्मं पच्चया नहेतु सहेतुको कुसलो धम्मो उप्पज्जति हेतुपच्चया. हेतुया एकं.

नहेतुं नसहेतुकं नअकुसलं धम्मं पच्चया नहेतु सहेतुको अकुसलो धम्मो उप्पज्जति हेतुपच्चया. हेतुया एकं.

नहेतुं नअहेतुकं नअब्याकतं धम्मं पटिच्च नहेतु अहेतुको अब्याकतो धम्मो उप्पज्जति हेतुपच्चया. हेतुया एकं.

७-१३-१. चूळन्तरदुकानि-कुसलत्तिकं

१०. नअप्पच्चयं नकुसलं धम्मं पच्चया सप्पच्चयो कुसलो धम्मो उप्पज्जति हेतुपच्चया. हेतुया एकं.

नअप्पच्चयं नअकुसलं धम्मं पच्चया सप्पच्चयो अकुसलो धम्मो उप्पज्जति हेतुपच्चया. हेतुया एकं.

नअप्पच्चयं नअब्याकतं धम्मं पटिच्च सप्पच्चयो अब्याकतो धम्मो उप्पज्जति हेतुपच्चया. हेतुया एकं.

११. नअसङ्खतं…पे… (सप्पच्चयदुकसदिसं).

१२. नसनिदस्सनं नकुसलं धम्मं पच्चया अनिदस्सनो कुसलो धम्मो उप्पज्जति हेतुपच्चया. हेतुया एकं.

नसनिदस्सनं नअकुसलं धम्मं पच्चया अनिदस्सनो अकुसलो धम्मो उप्पज्जति हेतुपच्चया. हेतुया एकं.

नसनिदस्सनं नअब्याकतं धम्मं पटिच्च सनिदस्सनो अब्याकतो धम्मो उप्पज्जति हेतुपच्चया. नसनिदस्सनं नअब्याकतं धम्मं पटिच्च अनिदस्सनो अब्याकतो धम्मो उप्पज्जति हेतुपच्चया. नसनिदस्सनं नअब्याकतं धम्मं पटिच्च सनिदस्सनो अब्याकतो च अनिदस्सनो अब्याकतो च धम्मा उप्पज्जन्ति हेतुपच्चया. (३) …हेतुया तीणि.

१३. नसप्पटिघं नकुसलं धम्मं पच्चया अप्पटिघो कुसलो धम्मो उप्पज्जति हेतुपच्चया.

१४. नअरूपिं नकुसलं धम्मं पच्चया अरूपी कुसलो धम्मो उप्पज्जति हेतुपच्चया. हेतुया एकं.

नअरूपिं नअकुसलं धम्मं पच्चया अरूपी अकुसलो धम्मो उप्पज्जति हेतुपच्चया. हेतुया एकं.

नरूपिं नअब्याकतं धम्मं पटिच्च रूपी अब्याकतो धम्मो उप्पज्जति हेतुपच्चया. हेतुया एकं.

१५. नलोकुत्तरं नकुसलं धम्मं पच्चया लोकियो कुसलो धम्मो उप्पज्जति हेतुपच्चया. नलोकुत्तरं नकुसलं धम्मं पच्चया लोकुत्तरो कुसलो धम्मो उप्पज्जति हेतुपच्चया. हेतुया द्वे.

नलोकुत्तरं नअकुसलं धम्मं पच्चया लोकियो अकुसलो धम्मो उप्पज्जति हेतुपच्चया. हेतुया एकं.

नलोकियं नअब्याकतं धम्मं पटिच्च लोकियो अब्याकतो धम्मो उप्पज्जति हेतुपच्चया. नलोकुत्तरं नअब्याकतं धम्मं पटिच्च लोकियो अब्याकतो धम्मो उप्पज्जति हेतुपच्चया. हेतुया द्वे.

१६. नकेनचि विञ्ञेय्यं नकुसलं धम्मं पच्चया केनचि विञ्ञेय्यो कुसलो धम्मो उप्पज्जति हेतुपच्चया… तीणि.

नकेनचि नविञ्ञेय्यं नकुसलं धम्मं पच्चया केनचि नविञ्ञेय्यो कुसलो धम्मो उप्पज्जति हेतुपच्चया… तीणि.

नकेनचि विञ्ञेय्यं नकुसलञ्च नकेनचि नविञ्ञेय्यं नकुसलञ्च धम्मं पच्चया केनचि विञ्ञेय्यो कुसलो धम्मो उप्पज्जति हेतुपच्चया… तीणि. (सब्बत्थ नव.)

नकेनचि विञ्ञेय्यं नअकुसलं धम्मं पच्चया केनचि विञ्ञेय्यो अकुसलो धम्मो उप्पज्जति हेतुपच्चया. नकेनचि नविञ्ञेय्यं नअकुसलं धम्मं पच्चया केनचि नविञ्ञेय्यो अकुसलो धम्मो उप्पज्जति हेतुपच्चया… हेतुया नव.

नकेनचि विञ्ञेय्यं नअब्याकतं धम्मं पटिच्च केनचि विञ्ञेय्यो अब्याकतो धम्मो उप्पज्जति हेतुपच्चया… हेतुया नव.

१४-१. आसवदुक-कुसलत्तिकं

१७. नआसवं नकुसलं धम्मं पच्चया नोआसवो कुसलो धम्मो उप्पज्जति हेतुपच्चया. हेतुया एकं.

नआसवं नअकुसलं धम्मं पच्चया आसवो अकुसलो धम्मो उप्पज्जति हेतुपच्चया… हेतुया तीणि.

नआसवं नअब्याकतं धम्मं पटिच्च नोआसवो अब्याकतो धम्मो उप्पज्जति हेतुपच्चया. ननोआसवं नअब्याकतं धम्मं पटिच्च नोआसवो अब्याकतो धम्मो उप्पज्जति हेतुपच्चया. (दुकमूलकं एकं.)… हेतुया तीणि.

१५-१. सासवदुक-कुसलत्तिकं

१८. नअनासवं नकुसलं धम्मं पच्चया अनासवो कुसलो धम्मो उप्पज्जति हेतुपच्चया. नअनासवं नकुसलं धम्मं पच्चया सासवो कुसलो धम्मो उप्पज्जति हेतुपच्चया. हेतुया द्वे.

नअनासवं नअकुसलं धम्मं पच्चया सासवो अकुसलो धम्मो उप्पज्जति हेतुपच्चया. हेतुया एकं.

१६-१. आसवसम्पयुत्तदुक-कुसलत्तिकं

१९. नआसवसम्पयुत्तं नकुसलं धम्मं पच्चया आसवविप्पयुत्तो कुसलो धम्मो उप्पज्जति हेतुपच्चया. हेतुया एकं.

नआसवसम्पयुत्तं नअकुसलं धम्मं पच्चया आसवसम्पयुत्तो अकुसलो धम्मो उप्पज्जति हेतुपच्चया… हेतुया तीणि.

नआसवसम्पयुत्तं नअब्याकतं धम्मं पटिच्च आसवविप्पयुत्तो अब्याकतो धम्मो उप्पज्जति हेतुपच्चया… हेतुया तीणि.

१७-१. आसवसासवदुक-कुसलत्तिकं

२०. नआसवञ्चेव नअनासवञ्च नकुसलं धम्मं पच्चया सासवो चेव नोआसवो च कुसलो धम्मो उप्पज्जति हेतुपच्चया. हेतुया एकं.

नआसवञ्चेव नअनासवञ्च नअकुसलं धम्मं पच्चया आसवो चेव सासवो च अकुसलो धम्मो उप्पज्जति हेतुपच्चया… हेतुया तीणि.

नआसवञ्चेव नअनासवञ्च नअब्याकतं धम्मं पटिच्च सासवो चेव नो च आसवो अब्याकतो धम्मो उप्पज्जति हेतुपच्चया… हेतुया तीणि.

(आसवआसवसम्पयुत्तदुकं नत्थि.)

१९-१. आसवविप्पयुत्तसासवदुक-कुसलत्तिकं

२१. आसवविप्पयुत्तं नअनासवं नकुसलं धम्मं पच्चया आसवविप्पयुत्तो अनासवो कुसलो धम्मो उप्पज्जति हेतुपच्चया. आसवविप्पयुत्तं नअनासवं नकुसलं धम्मं पच्चया आसवविप्पयुत्तो सासवो कुसलो धम्मो उप्पज्जति हेतुपच्चया. हेतुया द्वे.

आसवविप्पयुत्तं नअनासवं नअकुसलं धम्मं पच्चया आसवविप्पयुत्तो सासवो अकुसलो धम्मो उप्पज्जति हेतुपच्चया. हेतुया एकं.

आसवविप्पयुत्तं नसासवं नअब्याकतं धम्मं पटिच्च आसवविप्पयुत्तो सासवो अब्याकतो धम्मो उप्पज्जति हेतुपच्चया. आसवविप्पयुत्तं नअनासवं नअब्याकतं धम्मं पटिच्च आसवविप्पयुत्तो सासवो अब्याकतो धम्मो उप्पज्जति हेतुपच्चया. हेतुया द्वे.

२०-५४-१. सञ्ञोजनादिछगोच्छकानि-कुसलत्तिकं

२२. नसञ्ञोजनं नअकुसलं धम्मं पच्चया सञ्ञोजनो अकुसलो धम्मो उप्पज्जति हेतुपच्चया… हेतुया तीणि.

२३. नगन्थं नअकुसलं धम्मं पच्चया गन्थो अकुसलो धम्मो उप्पज्जति हेतुपच्चया… हेतुया तीणि.

२४. नओघं नअकुसलं धम्मं पच्चया ओघो अकुसलो धम्मो उप्पज्जति हेतुपच्चया… हेतुया तीणि.

२५. नयोगं नअकुसलं धम्मं पच्चया योगो अकुसलो धम्मो उप्पज्जति हेतुपच्चया… हेतुया तीणि.

२६. ननीवरणं नअकुसलं धम्मं पच्चया नीवरणो अकुसलो धम्मो उप्पज्जति हेतुपच्चया… हेतुया तीणि.

२७. नपरामासं नअकुसलं धम्मं पच्चया परामासो अकुसलो धम्मो उप्पज्जति हेतुपच्चया… हेतुया तीणि.

५५-६८-१. महन्तरदुकानि-कुसलत्तिकं

२८. नसारम्मणं नकुसलं धम्मं पच्चया सारम्मणो कुसलो धम्मो उप्पज्जति हेतुपच्चया. हेतुया एकं.

नसारम्मणं नअकुसलं धम्मं पच्चया सारम्मणो अकुसलो धम्मो उप्पज्जति हेतुपच्चया. हेतुया एकं.

नअनारम्मणं नअब्याकतं धम्मं पटिच्च अनारम्मणो अब्याकतो धम्मो उप्पज्जति हेतुपच्चया. हेतुया एकं.

२९. नोचित्तं नकुसलं धम्मं पच्चया चित्तो कुसलो धम्मो उप्पज्जति हेतुपच्चया… हेतुया तीणि. (नअकुसले तीणि. नअब्याकते तीणि. संखित्तं.)

३०. नचेतसिकं नकुसलं धम्मं पच्चया चेतसिको कुसलो धम्मो उप्पज्जति हेतुपच्चया… हेतुया तीणि.

३१. नचित्तसम्पयुत्तं नकुसलं धम्मं पच्चया चित्तसम्पयुत्तो कुसलो धम्मो उप्पज्जति हेतुपच्चया. हेतुया एकं.

३२. नचित्तसंसट्ठं नकुसलं धम्मं पच्चया चित्तसंसट्ठो कुसलो धम्मो उप्पज्जति हेतुपच्चया. हेतुया एकं.

३३. नचित्तसमुट्ठानं नकुसलं धम्मं पच्चया चित्तसमुट्ठानो कुसलो धम्मो उप्पज्जति हेतुपच्चया… हेतुया तीणि.

३४. नचित्तसहभुं नकुसलं धम्मं पच्चया चित्तसहभू कुसलो धम्मो उप्पज्जति हेतुपच्चया… हेतुया तीणि.

३५. नचित्तानुपरिवत्तिं नकुसलं धम्मं पच्चया चित्तानुपरिवत्ती कुसलो धम्मो उप्पज्जति हेतुपच्चया… हेतुया तीणि.

३६. नचित्तसंसट्ठसमुट्ठानं नकुसलं धम्मं पच्चया चित्तसंसट्ठसमुट्ठानो कुसलो धम्मो उप्पज्जति हेतुपच्चया… हेतुया तीणि.

३७. नचित्तसंसट्ठसमुट्ठानसहभुं नकुसलं धम्मं पच्चया चित्तसंसट्ठसमुट्ठानसहभू कुसलो धम्मो उप्पज्जति हेतुपच्चया… हेतुया तीणि.

३८. नचित्तसंसट्ठसमुट्ठानानुपरिवत्तिं नकुसलं धम्मं पच्चया चित्तसंसट्ठसमुट्ठानानुपरिवत्ती कुसलो धम्मो उप्पज्जति हेतुपच्चया… हेतुया तीणि.

३९. नअज्झत्तिकं नकुसलं धम्मं पच्चया अज्झत्तिको कुसलो धम्मो उप्पज्जति हेतुपच्चया… हेतुया तीणि.

४०. ननोउपादा नकुसलं धम्मं पच्चया नोउपादा कुसलो धम्मो उप्पज्जति हेतुपच्चया. हेतुया एकं.

४१. नअनुपादिन्नं नकुसलं धम्मं पच्चया अनुपादिन्नो कुसलो धम्मो उप्पज्जति हेतुपच्चया. हेतुया एकं.

६९-७४-१. उपादानदुकादि-कुसलत्तिकं

४२. नउपादानं नअकुसलं धम्मं पच्चया उपादानो अकुसलो धम्मो उप्पज्जति हेतुपच्चया… हेतुया तीणि.

७५-८२-१. किलेसदुकादि-कुसलत्तिकं

४३. नकिलेसं नअकुसलं धम्मं पच्चया किलेसो अकुसलो धम्मो उप्पज्जति हेतुपच्चया… हेतुया तीणि.

८३-१००-१. पिट्ठिदुकानि-कुसलत्तिकं

४४. नदस्सनेन पहातब्बं नकुसलं धम्मं पच्चया नदस्सनेन पहातब्बो कुसलो धम्मो उप्पज्जति हेतुपच्चया. हेतुया एकं.

नदस्सनेन पहातब्बं नअकुसलं धम्मं पच्चया दस्सनेन पहातब्बो अकुसलो धम्मो उप्पज्जति हेतुपच्चया. नदस्सनेन पहातब्बं नअकुसलं धम्मं पच्चया नदस्सनेन पहातब्बो अकुसलो धम्मो उप्पज्जति हेतुपच्चया. हेतुया द्वे.

नदस्सनेन पहातब्बं नअब्याकतं धम्मं पटिच्च नदस्सनेन पहातब्बो अब्याकतो धम्मो उप्पज्जति हेतुपच्चया. ननदस्सनेन पहातब्बं नअब्याकतं धम्मं पटिच्च नदस्सनेन पहातब्बो अब्याकतो धम्मो उप्पज्जति हेतुपच्चया. हेतुया द्वे.

४५. नभावनाय पहातब्बं नकुसलं धम्मं पच्चया नभावनाय पहातब्बो कुसलो धम्मो उप्पज्जति हेतुपच्चया. हेतुया एकं.

४६. नदस्सनेन पहातब्बहेतुकं नकुसलं धम्मं पच्चया नदस्सनेन पहातब्बहेतुको कुसलो धम्मो उप्पज्जति हेतुपच्चया. हेतुया एकं.

४७. नभावनाय पहातब्बहेतुकं नकुसलं धम्मं पच्चया नभावनाय पहातब्बहेतुको कुसलो धम्मो उप्पज्जति हेतुपच्चया. हेतुया एकं.

४८. नसवितक्कं नकुसलं धम्मं पच्चया सवितक्को कुसलो धम्मो उप्पज्जति हेतुपच्चया… हेतुया तीणि.

४९. नसविचारं नकुसलं धम्मं पच्चया सविचारो कुसलो धम्मो उप्पज्जति हेतुपच्चया… हेतुया तीणि.

५०. नसप्पीतिकं नकुसलं धम्मं पच्चया सप्पीतिको कुसलो धम्मो उप्पज्जति हेतुपच्चया… हेतुया तीणि.

५१. नपीतिसहगतं नकुसलं धम्मं पच्चया पीतिसहगतो कुसलो धम्मो उप्पज्जति हेतुपच्चया… हेतुया तीणि.

५२. नसुखसहगतं नकुसलं धम्मं पच्चया सुखसहगतो कुसलो धम्मो उप्पज्जति हेतुपच्चया… हेतुया तीणि.

५३. नउपेक्खासहगतं नकुसलं धम्मं पच्चया उपेक्खासहगतो कुसलो धम्मो उप्पज्जति हेतुपच्चया… हेतुया तीणि.

५४. ननकामावचरं नकुसलं धम्मं पच्चया नकामावचरो कुसलो धम्मो उप्पज्जति हेतुपच्चया. ननकामावचरं नकुसलं धम्मं पच्चया कामावचरो कुसलो धम्मो उप्पज्जति हेतुपच्चया. हेतुया द्वे.

५५. नरूपावचरं नकुसलं धम्मं पच्चया रूपावचरो कुसलो धम्मो उप्पज्जति हेतुपच्चया. नरूपावचरं नकुसलं धम्मं पच्चया नरूपावचरो कुसलो धम्मो उप्पज्जति हेतुपच्चया. हेतुया द्वे.

५६. नअरूपावचरं नकुसलं धम्मं पच्चया अरूपावचरो कुसलो धम्मो उप्पज्जति हेतुपच्चया. नअरूपावचरं नकुसलं धम्मं पच्चया नअरूपावचरो कुसलो धम्मो उप्पज्जति हेतुपच्चया. हेतुया द्वे.

५७. नअपरियापन्नं नकुसलं धम्मं पच्चया अपरियापन्नो कुसलो धम्मो उप्पज्जति हेतुपच्चया. नअपरियापन्नं नकुसलं धम्मं पच्चया परियापन्नो कुसलो धम्मो उप्पज्जति हेतुपच्चया. हेतुया द्वे.

५८. ननिय्यानिकं नकुसलं धम्मं पच्चया निय्यानिको कुसलो धम्मो उप्पज्जति हेतुपच्चया. ननिय्यानिकं नकुसलं धम्मं पच्चया नअनिय्यानिको कुसलो धम्मो उप्पज्जति हेतुपच्चया. हेतुया द्वे.

५९. ननियतं नकुसलं धम्मं पच्चया नियतो कुसलो धम्मो उप्पज्जति हेतुपच्चया. ननियतं नकुसलं धम्मं पच्चया अनियतो कुसलो धम्मो उप्पज्जति हेतुपच्चया. हेतुया द्वे.

६०. नअनुत्तरं नकुसलं धम्मं पच्चया अनुत्तरो कुसलो धम्मो उप्पज्जति हेतुपच्चया. नअनुत्तरं नकुसलं धम्मं पच्चया सउत्तरो कुसलो धम्मो उप्पज्जति हेतुपच्चया. हेतुया द्वे.

६१. नसरणं नकुसलं धम्मं पच्चया अरणो कुसलो धम्मो उप्पज्जति हेतुपच्चया. हेतुया एकं.

नसरणं नअकुसलं धम्मं पच्चया सरणो अकुसलो धम्मो उप्पज्जति हेतुपच्चया. हेतुया एकं.

नसरणं नअब्याकतं धम्मं पटिच्च अरणो अब्याकतो धम्मो उप्पज्जति हेतुपच्चया. नअरणं नअब्याकतं धम्मं पटिच्च अरणो अब्याकतो धम्मो उप्पज्जति हेतुपच्चया. हेतुया द्वे.

१-२. हेतुदुक-वेदनात्तिकं

६२. नहेतुं नसुखाय वेदनाय सम्पयुत्तं धम्मं पटिच्च हेतु सुखाय वेदनाय सम्पयुत्तो धम्मो उप्पज्जति हेतुपच्चया. नहेतुं नसुखाय वेदनाय सम्पयुत्तं धम्मं पटिच्च नहेतु सुखाय वेदनाय सम्पयुत्तो धम्मो उप्पज्जति हेतुपच्चया. नहेतुं नसुखाय वेदनाय सम्पयुत्तं धम्मं पटिच्च हेतु सुखाय वेदनाय सम्पयुत्तो च नहेतु सुखाय वेदनाय सम्पयुत्तो च धम्मा उप्पज्जन्ति हेतुपच्चया. हेतुया तीणि. नहेतु नदुक्खाय वेदनाय सम्पयुत्तमूलं तीणियेव.

नहेतुं नअदुक्खमसुखाय वेदनाय सम्पयुत्तं धम्मं पटिच्च हेतु अदुक्खमसुखाय वेदनाय सम्पयुत्तो धम्मो उप्पज्जति हेतुपच्चया… हेतुया तीणि.

१-३. हेतुदुक-विपाकत्तिकं

६३. नहेतुं नविपाकं धम्मं पटिच्च हेतु विपाको धम्मो उप्पज्जति हेतुपच्चया… हेतुया तीणि.

नहेतुं नविपाकधम्मधम्मं पच्चया हेतु विपाकधम्मधम्मो उप्पज्जति हेतुपच्चया… हेतुया तीणि.

नहेतुं ननेवविपाकनविपाकधम्मधम्मं पटिच्च नहेतु नेवविपाकनविपाकधम्मधम्मो उप्पज्जति हेतुपच्चया… हेतुया तीणि.

१-४. हेतुदुक-उपादिन्नत्तिकं

६४. नहेतु नउपादिन्नुपादानियो धम्मो हेतुस्स उपादिन्नुपादानियस्स धम्मस्स आरम्मणपच्चयेन पच्चयो. नहेतु नउपादिन्नुपादानियो धम्मो नहेतुस्स उपादिन्नुपादानियस्स धम्मस्स आरम्मणपच्चयेन पच्चयो. नहेतु नउपादिन्नुपादानियो धम्मो हेतुस्स उपादिन्नुपादानियस्स च नहेतुस्स उपादिन्नुपादानियस्स च धम्मस्स आरम्मणपच्चयेन पच्चयो. (३)

ननहेतु नउपादिन्नुपादानियो धम्मो नहेतुस्स उपादिन्नुपादानियस्स धम्मस्स आरम्मणपच्चयेन पच्चयो… तीणि.

नहेतु नउपादिन्नुपादानियो च ननहेतु नउपादिन्नुपादानियो च धम्मा हेतुस्स उपादिन्नुपादानियस्स धम्मस्स आरम्मणपच्चयेन पच्चयो… तीणि. (नव पञ्हा संखित्तं.)

नहेतुं नअनुपादिन्नुपादानियं धम्मं पच्चया हेतु अनुपादिन्नुपादानियो धम्मो उप्पज्जति हेतुपच्चया… हेतुया तीणि.

नहेतुं नअनुपादिन्नअनुपादानियं धम्मं पच्चया हेतु अनुपादिन्नअनुपादानियो धम्मो उप्पज्जति हेतुपच्चया… हेतुया तीणि.

१-५. हेतुदुक-संकिलिट्ठत्तिकं

६५. नहेतुं नसंकिलिट्ठसंकिलेसिकं धम्मं पच्चया हेतु संकिलिट्ठसंकिलेसिको धम्मो उप्पज्जति हेतुपच्चया… हेतुया तीणि.

नहेतुं नअसंकिलिट्ठसंकिलेसिकं धम्मं पटिच्च नहेतु असंकिलिट्ठसंकिलेसिको धम्मो उप्पज्जति हेतुपच्चया… हेतुया तीणि.

नहेतुं नअसंकिलिट्ठअसंकिलेसिकं धम्मं पच्चया हेतु असंकिलिट्ठअसंकिलेसिको धम्मो उप्पज्जति हेतुपच्चया… हेतुया तीणि.

१-६. हेतुदुक-वितक्कत्तिकं

६६. नहेतुं नसवितक्कसविचारं धम्मं पटिच्च हेतु सवितक्कसविचारो धम्मो उप्पज्जति हेतुपच्चया… हेतुया तीणि.

नहेतुं नअवितक्कविचारमत्तं धम्मं पटिच्च हेतु अवितक्कविचारमत्तो धम्मो उप्पज्जति हेतुपच्चया… हेतुया तीणि.

नहेतुं नअवितक्कअविचारं धम्मं पटिच्च नहेतु अवितक्कअविचारो धम्मो उप्पज्जति हेतुपच्चया… हेतुया तीणि.

१-७. हेतुदुक-पीतित्तिकं

६७. नहेतुं नपीतिसहगतं धम्मं पटिच्च हेतु पीतिसहगतो धम्मो उप्पज्जति हेतुपच्चया… हेतुया तीणि.

नहेतुं नसुखसहगतं धम्मं पटिच्च हेतु सुखसहगतो धम्मो उप्पज्जति हेतुपच्चया… हेतुया तीणि.

नहेतुं नउपेक्खासहगतं धम्मं पटिच्च हेतु उपेक्खासहगतो धम्मो उप्पज्जति हेतुपच्चया… हेतुया तीणि.

१-८. हेतुदुक-दस्सनत्तिकं

६८. नहेतुं नदस्सनेन पहातब्बं धम्मं पच्चया हेतु दस्सनेन पहातब्बो धम्मो उप्पज्जति हेतुपच्चया… हेतुया तीणि.

नहेतुं नभावनाय पहातब्बं धम्मं पच्चया हेतु भावनाय पहातब्बो धम्मो उप्पज्जति हेतुपच्चया… हेतुया तीणि.

६९. नहेतुं ननेवदस्सनेन नभावनाय पहातब्बं धम्मं पटिच्च नहेतु नेवदस्सनेन नभावनाय पहातब्बो धम्मो उप्पज्जति हेतुपच्चया. ननहेतुं ननेवदस्सनेन नभावनाय पहातब्बं धम्मं पटिच्च नहेतु नेवदस्सनेन नभावनाय पहातब्बो धम्मो उप्पज्जति हेतुपच्चया. (दुकमूलं एकं संखित्तं, सब्बत्थ तीणि.)

१-९. हेतुदुक-दस्सनहेतुत्तिकं

७०. ननहेतुं नदस्सनेन पहातब्बहेतुकं धम्मं पटिच्च नहेतु दस्सनेन पहातब्बहेतुको धम्मो उप्पज्जति हेतुपच्चया. हेतुया एकं.

ननहेतुं नभावनाय पहातब्बहेतुकं धम्मं पटिच्च नहेतु भावनाय पहातब्बहेतुको धम्मो उप्पज्जति हेतुपच्चया. हेतुया एकं.

७१. नहेतुं ननेवदस्सनेन नभावनाय पहातब्बहेतुकं धम्मं पटिच्च नहेतु नेवदस्सनेन नभावनाय पहातब्बहेतुको धम्मो उप्पज्जति हेतुपच्चया. ननहेतुं ननेवदस्सनेन नभावनाय पहातब्बहेतुकं धम्मं पटिच्च नहेतु नेवदस्सनेन नभावनाय पहातब्बहेतुको धम्मो उप्पज्जति हेतुपच्चया… गणितकेन तीणि.

१-१०. हेतुदुक-आचयगामित्तिकं

७२. नहेतुं नआचयगामिं धम्मं पच्चया हेतु आचयगामी धम्मो उप्पज्जति हेतुपच्चया… हेतुया तीणि.

नहेतुं नअपचयगामिं धम्मं पच्चया हेतु अपचयगामी धम्मो उप्पज्जति हेतुपच्चया… हेतुया तीणि.