२२-१९. सनिदस्सनत्तिक-आसवविप्पयुत्तसासवदुकं

१०६. अनिदस्सनअप्पटिघं आसवविप्पयुत्तं सासवं धम्मं पच्चया नसनिदस्सनसप्पटिघो आसवविप्पयुत्तो नसासवो धम्मो उप्पज्जति हेतुपच्चया. अनिदस्सनअप्पटिघं आसवविप्पयुत्तं सासवं धम्मं पच्चया नअनिदस्सनसप्पटिघो आसवविप्पयुत्तो नसासवो धम्मो उप्पज्जति हेतुपच्चया. अनिदस्सनअप्पटिघं आसवविप्पयुत्तं सासवं धम्मं पच्चया नसनिदस्सनसप्पटिघो आसवविप्पयुत्तो नसासवो च नअनिदस्सनसप्पटिघो आसवविप्पयुत्तो नसासवो च धम्मा उप्पज्जन्ति हेतुपच्चया. हेतुया तीणि.

अनिदस्सनअप्पटिघं आसवविप्पयुत्तं अनासवं धम्मं पटिच्च नअनिदस्सनअप्पटिघो आसवविप्पयुत्तो नअनासवो धम्मो उप्पज्जति हेतुपच्चया. अनिदस्सनअप्पटिघं आसवविप्पयुत्तं अनासवं धम्मं पटिच्च नसनिदस्सनसप्पटिघो आसवविप्पयुत्तो नअनासवो धम्मो उप्पज्जति हेतुपच्चया…पे… अनिदस्सनअप्पटिघं आसवविप्पयुत्तं अनासवं धम्मं पटिच्च नसनिदस्सनसप्पटिघो आसवविप्पयुत्तो नअनासवो च नअनिदस्सनसप्पटिघो आसवविप्पयुत्तो नअनासवो च धम्मा उप्पज्जन्ति हेतुपच्चया… हेतुया छ.