२२-२. सनिदस्सनत्तिक-सहेतुकदुकं

९०. अनिदस्सनअप्पटिघं सहेतुकं धम्मं पटिच्च नअनिदस्सनअप्पटिघो नसहेतुको धम्मो उप्पज्जति हेतुपच्चया. अनिदस्सनअप्पटिघं सहेतुकं धम्मं पटिच्च नसनिदस्सनसप्पटिघो नसहेतुको धम्मो उप्पज्जति हेतुपच्चया…पे… अनिदस्सनअप्पटिघं सहेतुकं धम्मं पटिच्च नसनिदस्सनसप्पटिघो नसहेतुको च नअनिदस्सनसप्पटिघो नसहेतुको च धम्मा उप्पज्जन्ति हेतुपच्चया… हेतुया छ.

अनिदस्सनअप्पटिघं अहेतुकं धम्मं पटिच्च नसनिदस्सनसप्पटिघो नअहेतुको धम्मो उप्पज्जति हेतुपच्चया. (संखित्तं.) हेतुया तीणि.