१-७. पटिच्चवारादि

पच्चयचतुक्कं

हेतुपच्चयो

१५. परामासविप्पयुत्तं कुसलं धम्मं पटिच्च परामासविप्पयुत्तो कुसलो धम्मो उप्पज्जति हेतुपच्चया (संखित्तं).

१६. हेतुया एकं, आरम्मणे एकं…पे… अविगते एकं (संखित्तं).

(सहजातवारेपि …पे… पञ्हावारेपि सब्बत्थ एकं.)

१७. परामाससम्पयुत्तं अकुसलं धम्मं पटिच्च परामाससम्पयुत्तो अकुसलो धम्मो उप्पज्जति हेतुपच्चया. (१)

परामासविप्पयुत्तं अकुसलं धम्मं पटिच्च परामासविप्पयुत्तो अकुसलो धम्मो उप्पज्जति हेतुपच्चया. (१) (संखित्तं.)

१८. हेतुया द्वे, आरम्मणे द्वे (सब्बत्थ द्वे)…पे… अविगते द्वे (संखित्तं).

नहेतुया एकं, नअधिपतिया द्वे (सब्बत्थ द्वे)…पे… नविप्पयुत्ते द्वे (संखित्तं). (सहजातवारोपि…पे… सम्पयुत्तवारोपि वित्थारेतब्बा.)

१९. परामाससम्पयुत्तो अकुसलो धम्मो परामाससम्पयुत्तस्स अकुसलस्स धम्मस्स हेतुपच्चयेन पच्चयो. (१)

परामासविप्पयुत्तो अकुसलो धम्मो परामासविप्पयुत्तस्स अकुसलस्स धम्मस्स हेतुपच्चयेन पच्चयो. (१) (संखित्तं.)

२०. हेतुया द्वे, आरम्मणे चत्तारि, अधिपतिया चत्तारि (मज्झिमे च अन्ते च आरम्मणाधिपति), अनन्तरे द्वे…पे… सहजाते द्वे…पे… उपनिस्सये चत्तारि, आसेवने द्वे, कम्मे द्वे, आहारे द्वे…पे… मग्गे द्वे…पे… अविगते द्वे (संखित्तं).

२१. परामासविप्पयुत्तं अब्याकतं धम्मं पटिच्च परामासविप्पयुत्तो अब्याकतो धम्मो उप्पज्जति हेतुपच्चया (संखित्तं).

२२. हेतुया एकं, आरम्मणे एकं…पे… अविगते एकं (संखित्तं).

(सहजातवारेपि…पे… पञ्हावारेपि सब्बत्थ एकं.)