१९-१. आसवविप्पयुत्तसासवदुक-कुसलत्तिकं

कुसलपदं

हेतुपच्चयो

४८. आसवविप्पयुत्तं सासवं कुसलं धम्मं पटिच्च आसवविप्पयुत्तो सासवो कुसलो धम्मो उप्पज्जति हेतुपच्चया. आसवविप्पयुत्तं अनासवं कुसलं धम्मं पटिच्च आसवविप्पयुत्तो अनासवो कुसलो धम्मो उप्पज्जति हेतुपच्चया. (२) (संखित्तं.)

४९. हेतुया द्वे, आरम्मणे द्वे…पे… अविगते द्वे (संखित्तं).

(सहजातवारोपि…पे… पञ्हावारोपि वित्थारेतब्बो.)

अब्याकतपदं

हेतुपच्चयो

५०. आसवविप्पयुत्तं सासवं अब्याकतं धम्मं पटिच्च आसवविप्पयुत्तो सासवो अब्याकतो धम्मो उप्पज्जति हेतुपच्चया. (१)

आसवविप्पयुत्तं अनासवं अब्याकतं धम्मं पटिच्च आसवविप्पयुत्तो अनासवो अब्याकतो धम्मो उप्पज्जति हेतुपच्चया. आसवविप्पयुत्तं अनासवं अब्याकतं धम्मं पटिच्च आसवविप्पयुत्तो सासवो अब्याकतो धम्मो उप्पज्जति हेतुपच्चया. आसवविप्पयुत्तं अनासवं अब्याकतं धम्मं पटिच्च आसवविप्पयुत्तो सासवो अब्याकतो च आसवविप्पयुत्तो अनासवो अब्याकतो च धम्मा उप्पज्जन्ति हेतुपच्चया. (३)

आसवविप्पयुत्तं सासवं अब्याकतञ्च आसवविप्पयुत्तं अनासवं अब्याकतञ्च धम्मं पटिच्च आसवविप्पयुत्तो सासवो अब्याकतो धम्मो उप्पज्जति हेतुपच्चया. (१) (संखित्तं.)

५१. हेतुया पञ्च, आरम्मणे द्वे, अधिपतिया पञ्च…पे… आसेवने एकं, कम्मे पञ्च, विपाके पञ्च…पे… अविगते पञ्च (संखित्तं).

पच्चनीयं

नहेतुपच्चयो

५२. आसवविप्पयुत्तं सासवं अब्याकतं धम्मं पटिच्च आसवविप्पयुत्तो सासवो अब्याकतो धम्मो उप्पज्जति नहेतुपच्चया (संखित्तं).

५३. नहेतुया एकं, नआरम्मणे तीणि, नअधिपतिया द्वे …पे… नपुरेजाते चत्तारि, नपच्छाजाते नआसेवने पञ्च, नकम्मे नविपाके…पे… नमग्गे एकं…पे… नविप्पयुत्ते द्वे…पे… नोविगते तीणि (संखित्तं).

(सहजातवारोपि पच्चयवारोपि निस्सयवारोपि संसट्ठवारोपि सम्पयुत्तवारोपि पटिच्चवारसदिसा वित्थारेतब्बा.)