१-७. पटिच्चवारादि

पच्चयचतुक्कं

६५. सुखाय वेदनाय सम्पयुत्तं सरणं धम्मं पटिच्च सुखाय वेदनाय सम्पयुत्तो सरणो धम्मो उप्पज्जति हेतुपच्चया. (१)

दुक्खाय वेदनाय सम्पयुत्तं सरणं धम्मं पटिच्च दुक्खाय वेदनाय सम्पयुत्तो सरणो धम्मो उप्पज्जति हेतुपच्चया. (१)

अदुक्खमसुखाय वेदनाय सम्पयुत्तं सरणं धम्मं पटिच्च अदुक्खमसुखाय वेदनाय सम्पयुत्तो सरणो धम्मो उप्पज्जति हेतुपच्चया. (१) (संखित्तं.)

६६. हेतुया तीणि…पे… अविगते तीणि (संखित्तं).

(सहजातवारम्पि…पे… सम्पयुत्तवारम्पि पटिच्चवारसदिसं.)

६७. सुखाय वेदनाय सम्पयुत्तो सरणो धम्मो सुखाय वेदनाय सम्पयुत्तस्स सरणस्स धम्मस्स हेतुपच्चयेन पच्चयो. (१)

दुक्खाय वेदनाय सम्पयुत्तो सरणो धम्मो दुक्खाय वेदनाय सम्पयुत्तस्स सरणस्स धम्मस्स हेतुपच्चयेन पच्चयो. (१)

अदुक्खमसुखाय वेदनाय सम्पयुत्तो सरणो धम्मो अदुक्खमसुखाय वेदनाय सम्पयुत्तस्स सरणस्स धम्मस्स हेतुपच्चयेन पच्चयो. (१) (संखित्तं.)

६८. हेतुया तीणि, आरम्मणे नव…पे… अविगते तीणि (संखित्तं. यथा कुसलत्तिके पञ्हावारं, एवं वित्थारेतब्बं).

अरणपदं

हेतुपच्चयो

६९. सुखाय वेदनाय सम्पयुत्तं अरणं धम्मं पटिच्च सुखाय वेदनाय सम्पयुत्तो अरणो धम्मो उप्पज्जति हेतुपच्चया.

अदुक्खमसुखाय वेदनाय सम्पयुत्तं अरणं धम्मं पटिच्च अदुक्खमसुखाय वेदनाय सम्पयुत्तो अरणो धम्मो उप्पज्जति हेतुपच्चया (संखित्तं).

हेतुया द्वे, आरम्मणे तीणि…पे… अविगते तीणि (संखित्तं).

(सहजातवारम्पि…पे… सम्पयुत्तवारम्पि पटिच्चवारसदिसं).

७०. सुखाय वेदनाय सम्पयुत्तो अरणो धम्मो सुखाय वेदनाय सम्पयुत्तस्स अरणस्स धम्मस्स हेतुपच्चयेन पच्चयो. (१)

अदुक्खमसुखाय वेदनाय सम्पयुत्तो अरणो धम्मो अदुक्खमसुखाय वेदनाय सम्पयुत्तस्स अरणस्स धम्मस्स हेतुपच्चयेन पच्चयो. (१) (संखित्तं.)

७१. हेतुया द्वे, आरम्मणे छ…पे… अविगते तीणि (संखित्तं).

(यथा कुसलत्तिके पञ्हावारं, एवं वित्थारेतब्बं.)