१-७. पटिच्चवारादि

हेतु-आरम्मणपच्चया

१२४. अतीतारम्मणं सरणं धम्मं पटिच्च अतीतारम्मणो सरणो धम्मो उप्पज्जति हेतुपच्चया. (१)

अनागतारम्मणं सरणं धम्मं पटिच्च अनागतारम्मणो सरणो धम्मो उप्पज्जति हेतुपच्चया. (१)

पच्चुप्पन्नारम्मणं सरणं धम्मं पटिच्च पच्चुप्पन्नारम्मणो सरणो धम्मो उप्पज्जति हेतुपच्चया. (१) (संखित्तं.)

हेतुया तीणि…पे… अविगते तीणि (संखित्तं).

(सहजातवारम्पि …पे… पञ्हावारम्पि सब्बत्थ वित्थारेतब्बं.)

१२५. अतीतारम्मणं अरणं धम्मं पटिच्च अतीतारम्मणो अरणो धम्मो उप्पज्जति हेतुपच्चया. (१)

अनागतारम्मणं अरणं धम्मं पटिच्च अनागतारम्मणो अरणो धम्मो उप्पज्जति हेतुपच्चया. (१)

पच्चुप्पन्नारम्मणं अरणं धम्मं पटिच्च पच्चुप्पन्नारम्मणो अरणो धम्मो उप्पज्जति हेतुपच्चया. (१) (संखित्तं.)

हेतुया तीणि…पे… अविगते तीणि (संखित्तं).

(सहजातवारम्पि…पे… सम्पयुत्तवारम्पि पटिच्चवारसदिसं.)

१२६. अतीतारम्मणो अरणो धम्मो अतीतारम्मणस्स अरणस्स धम्मस्स हेतुपच्चयेन पच्चयो. (१)

अनागतारम्मणो अरणो धम्मो अनागतारम्मणस्स अरणस्स धम्मस्स हेतुपच्चयेन पच्चयो. (१)

पच्चुप्पन्नारम्मणो अरणो धम्मो पच्चुप्पन्नारम्मणस्स अरणस्स धम्मस्स हेतुपच्चयेन पच्चयो. (१)

अतीतारम्मणो अरणो धम्मो अतीतारम्मणस्स अरणस्स धम्मस्स आरम्मणपच्चयेन पच्चयो. (संखित्तं.)

१२७. हेतुया तीणि, आरम्मणे नव…पे… अविगते तीणि (संखित्तं. यथा कुसलत्तिके पञ्हावारं, एवं वित्थारेतब्बं).