१-७. पटिच्चवारादि

पच्चयचतुक्कं

हेतुपच्चयो

८७. सवितक्कसविचारं सरणं धम्मं पटिच्च सवितक्कसविचारो सरणो धम्मो उप्पज्जति हेतुपच्चया. सवितक्कसविचारं सरणं धम्मं पटिच्च अवितक्कविचारमत्तो सरणो धम्मो उप्पज्जति हेतुपच्चया. सवितक्कसविचारं सरणं धम्मं पटिच्च सवितक्कसविचारो सरणो च अवितक्कविचारमत्तो सरणो च धम्मा उप्पज्जन्ति हेतुपच्चया. (३)

अवितक्कविचारमत्तं सरणं धम्मं पटिच्च सवितक्कसविचारो सरणो धम्मो उप्पज्जति हेतुपच्चया. (१)

सवितक्कसविचारं सरणञ्च अवितक्कविचारमत्तं सरणञ्च धम्मं पटिच्च सवितक्कसविचारो सरणो धम्मो उप्पज्जति हेतुपच्चया. (१) (संखित्तं.)

८८. हेतुया पञ्च…पे… अविगते पञ्च (संखित्तं).

(सहजातवारेपि…पे… पञ्हावारेपि सब्बत्थ वित्थारो.)

८९. सवितक्कसविचारं अरणं धम्मं पटिच्च सवितक्कसविचारो अरणो धम्मो उप्पज्जति हेतुपच्चया… सत्त.

अवितक्कविचारमत्तं अरणं धम्मं पटिच्च अवितक्कविचारमत्तो अरणो धम्मो उप्पज्जति हेतुपच्चया … पञ्च.

अवितक्कअविचारं अरणं धम्मं पटिच्च अवितक्कअविचारो अरणो धम्मो उप्पज्जति हेतुपच्चया (संखित्तं).

९०. हेतुया सत्ततिंस…पे… अविगते सत्ततिंस (संखित्तं). (सहजातवारम्पि…पे… पञ्हावारम्पि वित्थारेतब्बं).