१-६. पटिच्चवारादि

पच्चयचतुक्कं

हेतुपच्चयो

१७७. हेतुं अनुपादिन्नअनुपादानियं धम्मं पटिच्च हेतु अनुपादिन्नअनुपादानियो धम्मो उप्पज्जति हेतुपच्चया… तीणि.

नहेतुं अनुपादिन्नअनुपादानियं धम्मं पटिच्च नहेतु अनुपादिन्नअनुपादानियो धम्मो उप्पज्जति हेतुपच्चया… तीणि.

हेतुं अनुपादिन्नअनुपादानियञ्च नहेतुं अनुपादिन्नअनुपादानियञ्च धम्मं पटिच्च हेतु अनुपादिन्नअनुपादानियो धम्मो उप्पज्जति हेतुपच्चया… तीणि (संखित्तं).

१७८. हेतुया नव, आरम्मणे नव, अधिपतिया नव, अनन्तरे नव, समनन्तरे नव, सहजाते नव, अञ्ञमञ्ञे नव, निस्सये नव, उपनिस्सये नव, पुरेजाते नव, आसेवने नव, कम्मे नव, विपाके नव, आहारे नव, इन्द्रिये नव, झाने नव, मग्गे नव, सम्पयुत्ते नव, विप्पयुत्ते नव, अत्थिया नव, नत्थिया नव, विगते नव, अविगते नव.

नअधिपतिपच्चयो

१७९. हेतुं अनुपादिन्नअनुपादानियं धम्मं पटिच्च हेतु अनुपादिन्नअनुपादानियो धम्मो उप्पज्जति नअधिपतिपच्चया. हेतुं अनुपादिन्नअनुपादानियं धम्मं पटिच्च नहेतु अनुपादिन्नअनुपादानियो धम्मो उप्पज्जति नअधिपतिपच्चया. (२)

नहेतुं अनुपादिन्नअनुपादानियं धम्मं पटिच्च नहेतु अनुपादिन्नअनुपादानियो धम्मो उप्पज्जति नअधिपतिपच्चया. नहेतुं अनुपादिन्नअनुपादानियं धम्मं पटिच्च हेतु अनुपादिन्नअनुपादानियो धम्मो उप्पज्जति नअधिपतिपच्चया. (२)

हेतुं अनुपादिन्नअनुपादानियञ्च नहेतुं अनुपादिन्नअनुपादानियञ्च धम्मं पटिच्च हेतु अनुपादिन्नअनुपादानियो धम्मो उप्पज्जति नअधिपतिपच्चया. हेतुं अनुपादिन्नअनुपादानियञ्च नहेतुं अनुपादिन्नअनुपादानियञ्च धम्मं पटिच्च नहेतु अनुपादिन्नअनुपादानियो धम्मो उप्पज्जति नअधिपतिपच्चया. (२) (संखित्तं.)

१८०. नअधिपतिया छ, नपुरेजाते नव, नपच्छाजाते नव, नआसेवने नव, नकम्मे तीणि, नविपाके नव, नविप्पयुत्ते नव (संखित्तं).

हेतुपच्चया नअधिपतिया छ (संखित्तं).

नअधिपतिपच्चया हेतुया छ (संखित्तं).

(सहजातवारोपि पच्चयवारोपि निस्सयवारोपि संसट्ठवारोपि सम्पयुत्तवारोपि पटिच्चवारसदिसा वित्थारेतब्बा.)