१-६. पटिच्चवारादि

पच्चयचतुक्कं

हेतुपच्चयो

५२५. हेतुं अज्झत्तारम्मणं धम्मं पटिच्च हेतु अज्झत्तारम्मणो धम्मो उप्पज्जति हेतुपच्चया… तीणि.

नहेतुं अज्झत्तारम्मणं धम्मं पटिच्च नहेतु अज्झत्तारम्मणो धम्मो उप्पज्जति हेतुपच्चया… तीणि.

हेतुं अज्झत्तारम्मणञ्च नहेतुं अज्झत्तारम्मणञ्च धम्मं पटिच्च हेतु अज्झत्तारम्मणो धम्मो उप्पज्जति हेतुपच्चया… तीणि (संखित्तं).

५२६. हेतुया नव, आरम्मणे नव, अधिपतिया नव…पे… अविगते नव (संखित्तं).

नहेतु-नअधिपतिपच्चया

५२७. नहेतुं अज्झत्तारम्मणं धम्मं पटिच्च नहेतु अज्झत्तारम्मणो धम्मो उप्पज्जति नहेतुपच्चया. नहेतुं अज्झत्तारम्मणं धम्मं पटिच्च हेतु अज्झत्तारम्मणो धम्मो उप्पज्जति नहेतुपच्चया. (२)

हेतुं अज्झत्तारम्मणं धम्मं पटिच्च हेतु अज्झत्तारम्मणो धम्मो उप्पज्जति नअधिपतिपच्चया (संखित्तं).

५२८. नहेतुया द्वे, नअधिपतिया नव, नपुरेजाते नव, नपच्छाजाते नव, नआसेवने नव, नकम्मे तीणि, नविपाके नव, नझाने एकं, नमग्गे एकं, नविप्पयुत्ते नव (संखित्तं).

हेतुपच्चया नअधिपतिया नव (संखित्तं).

नहेतुपच्चया आरम्मणे द्वे (संखित्तं).

(सहजातवारोपि पच्चयवारोपि निस्सयवारोपि संसट्ठवारोपि सम्पयुत्तवारोपि पटिच्चवारसदिसा वित्थारेतब्बा.)