१-६. पटिच्चवारादि

पच्चयचतुक्कं

हेतुपच्चयो

४२१. हेतु पणीतं धम्मं पटिच्च हेतु पणीतो धम्मो उप्पज्जति हेतुपच्चया… तीणि.

नहेतुं पणीतं धम्मं पटिच्च नहेतु पणीतो धम्मो उप्पज्जति हेतुपच्चया… तीणि.

हेतुं पणीतञ्च नहेतुं पणीतञ्च धम्मं पटिच्च हेतु पणीतो धम्मो उप्पज्जति हेतुपच्चया… तीणि (संखित्तं).

४२२. हेतुया नव, आरम्मणे नव, अधिपतिया नव…पे… कम्मे नव, विपाके नव, आहारे नव…पे… अविगते नव (संखित्तं).

नअधिपतिपच्चयो

४२३. हेतुं पणीतं धम्मं पटिच्च हेतु पणीतो धम्मो उप्पज्जति नअधिपतिपच्चया (संखित्तं).

४२४. नअधिपतिया छ, नपुरेजाते नव, नपच्छाजाते नव, नआसेवने नव, नकम्मे तीणि, नविपाके नव, नविप्पयुत्ते नव (संखित्तं).

हेतुपच्चया नअधिपतिया छ (संखित्तं).

नअधिपतिपच्चया हेतुया छ (संखित्तं).

(सहजातवारोपि पच्चयवारोपि निस्सयवारोपि संसट्ठवारोपि सम्पयुत्तवारोपि पटिच्चवारसदिसा वित्थारेतब्बा.)