१-६. पटिच्चवारादि

पच्चयचतुक्कं

हेतुपच्चयो

३४६. हेतुं नेवसेक्खनासेक्खं धम्मं पटिच्च हेतु नेवसेक्खनासेक्खो धम्मो उप्पज्जति हेतुपच्चया… तीणि.

नहेतुं नेवसेक्खनासेक्खं धम्मं पटिच्च नहेतु नेवसेक्खनासेक्खो धम्मो उप्पज्जति हेतुपच्चया… तीणि.

हेतुं नेवसेक्खनासेक्खञ्च नहेतुं नेवसेक्खनासेक्खञ्च धम्मं पटिच्च हेतु नेवसेक्खनासेक्खो धम्मो उप्पज्जति हेतुपच्चया… तीणि (संखित्तं).

३४७. हेतुया नव, आरम्मणे नव, अधिपतिया नव, अनन्तरे नव, समनन्तरे नव, सहजाते नव, अञ्ञमञ्ञे नव, निस्सये नव, उपनिस्सये नव, पुरेजाते नव, आसेवने नव, कम्मे नव, विपाके नव…पे… अविगते नव (संखित्तं).

नहेतु-नआरम्मणपच्चयादि

३४८. नहेतुं नेवसेक्खनासेक्खं धम्मं पटिच्च नहेतु नेवसेक्खनासेक्खो धम्मो उप्पज्जति नहेतुपच्चया. नहेतुं नेवसेक्खनासेक्खं धम्मं पटिच्च हेतु नेवसेक्खनासेक्खो धम्मो उप्पज्जति नहेतुपच्चया. (२)

हेतुं नेवसेक्खनासेक्खं धम्मं पटिच्च नहेतु नेवसेक्खनासेक्खो धम्मो उप्पज्जति नआरम्मणपच्चया. (१)

नहेतुं नेवसेक्खनासेक्खं धम्मं पटिच्च नहेतु नेवसेक्खनासेक्खो धम्मो उप्पज्जति नआरम्मणपच्चया. (१)

हेतुं नेवसेक्खनासेक्खञ्च नहेतुं नेवसेक्खनासेक्खञ्च धम्मं पटिच्च नहेतु नेवसेक्खनासेक्खो धम्मो उप्पज्जति नआरम्मणपच्चया. (१)

३४९. हेतुं नेवसेक्खनासेक्खं धम्मं पटिच्च हेतु नेवसेक्खनासेक्खो धम्मो उप्पज्जति नअधिपतिपच्चया…पे….

हेतुं नेवसेक्खनासेक्खं धम्मं पटिच्च हेतु नेवसेक्खनासेक्खो धम्मो उप्पज्जति नपुरेजातपच्चया… तीणि (संखित्तं).

३५०. नहेतुया द्वे, नआरम्मणे तीणि, नअधिपतिया नव, नअनन्तरे तीणि, नसमनन्तरे तीणि, नअञ्ञमञ्ञे तीणि, नउपनिस्सये तीणि, नपुरेजाते नव, नपच्छाजाते नव, नआसेवने नव, नकम्मे तीणि, नविपाके नव, नआहारे एकं, नइन्द्रिये एकं, नझाने एकं, नमग्गे एकं, नसम्पयुत्ते तीणि, नविप्पयुत्ते नव, नोनत्थिया तीणि, नोविगते तीणि (संखित्तं).

हेतुपच्चया नआरम्मणे तीणि (संखित्तं).

नहेतुपच्चया आरम्मणे द्वे (संखित्तं).

(सहजातवारोपि पच्चयवारोपि निस्सयवारोपि संसट्ठवारोपि सम्पयुत्तवारोपि पटिच्चवारसदिसा वित्थारेतब्बा.)