१. विभङ्गवारो

हेतुपच्चयो

३३०. नियतो धम्मो नियतस्स धम्मस्स हेतुपच्चयेन पच्चयो… चत्तारि (निय्यानिकदुकसदिसा निन्नानाकरणा).

आरम्मणपच्चयो

३३१. नियतो धम्मो अनियतस्स धम्मस्स आरम्मणपच्चयेन पच्चयो – अरिया मग्गा वुट्ठहित्वा मग्गं पच्चवेक्खन्ति, नियते पहीने किलेसे पच्चवेक्खन्ति, पुब्बे समुदाचिण्णे…पे… नियते खन्धे अनिच्चतो…पे… विपस्सति, चेतोपरियञाणेन नियतचित्तसमङ्गिस्स चित्तं जानाति, नियता खन्धा चेतोपरियञाणस्स, पुब्बेनिवासानुस्सतिञाणस्स यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

अनियतो धम्मो अनियतस्स धम्मस्स आरम्मणपच्चयेन पच्चयो – दानं दत्वा सीलं…पे… उपोसथकम्मं…पे… पुब्बे सुचिण्णानि…पे… झाना वुट्ठहित्वा झानं पच्चवेक्खति अस्सादेति अभिनन्दति, तं आरब्भ अनियतो रागो उप्पज्जति, दिट्ठि…पे… विचिकिच्छा…पे… उद्धच्चं…पे… अनियतं दोमनस्सं उप्पज्जति, अरिया फलं पच्चवेक्खन्ति, निब्बानं पच्चवेक्खन्ति, निब्बानं गोत्रभुस्स, वोदानस्स, फलस्स, आवज्जनाय आरम्मणपच्चयेन पच्चयो; अरिया अनियते पहीने किलेसे पच्चवेक्खन्ति, विक्खम्भिते किलेसे…पे… पुब्बे समुदाचिण्णे…पे… चक्खुं…पे… वत्थुं अनियते खन्धे अनिच्चतो…पे… विपस्सति अस्सादेति अभिनन्दति, तं आरब्भ अनियतो रागो…पे… दोमनस्सं उप्पज्जति, दिब्बेन चक्खुना रूपं पस्सति…पे… आवज्जनाय आरम्मणपच्चयेन पच्चयो. अनियतो धम्मो नियतस्स धम्मस्स आरम्मणपच्चयेन पच्चयो; निब्बानं मग्गस्स आरम्मणपच्चयेन पच्चयो; रूपजीवितिन्द्रियं मातुघातिकम्मस्स… पितुघातिकम्मस्स… अरहन्तघातिकम्मस्स… रुहिरुप्पादकम्मस्स आरम्मणपच्चयेन पच्चयो; यं वत्थुं आमसन्तस्स मिच्छत्तनियता खन्धा उप्पज्जन्ति, तं वत्थु मिच्छत्तनियतानं खन्धानं आरम्मणपच्चयेन पच्चयो. (२)

अधिपतिपच्चयो

३३२. नियतो धम्मो नियतस्स धम्मस्स अधिपतिपच्चयेन पच्चयो. सहजाताधिपति – नियताधिपति सम्पयुत्तकानं खन्धानं अधिपतिपच्चयेन पच्चयो. नियतो धम्मो अनियतस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – अरिया मग्गा वुट्ठहित्वा मग्गं गरुं कत्वा पच्चवेक्खन्ति. सहजाताधिपति – नियताधिपति चित्तसमुट्ठानानं रूपानं अधिपतिपच्चयेन पच्चयो. नियतो धम्मो नियतस्स च अनियतस्स च धम्मस्स अधिपतिपच्चयेन पच्चयो. सहजाताधिपति – नियताधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (३)

३३३. अनियतो धम्मो अनियतस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं दत्वा सीलं…पे… उपोसथकम्मं कत्वा तं गरुं कत्वा पच्चवेक्खति अस्सादेति अभिनन्दति, तं गरुं कत्वा अनियतो रागो उप्पज्जति… दिट्ठि उप्पज्जति; पुब्बे…पे… झाना…पे… अरिया फलं गरुं कत्वा पच्चवेक्खन्ति, निब्बानं गरुं कत्वा पच्चवेक्खन्ति, निब्बानं गोत्रभुस्स, वोदानस्स, फलस्स अधिपतिपच्चयेन पच्चयो; चक्खुं…पे… वत्थुं अनियते खन्धे गरुं कत्वा अस्सादेति अभिनन्दति, तं गरुं कत्वा अनियतो रागो उप्पज्जति, दिट्ठि उप्पज्जति. सहजाताधिपति – अनियताधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. अनियतो धम्मो नियतस्स धम्मस्स अधिपतिपच्चयेन पच्चयो. आरम्मणाधिपति – निब्बानं मग्गस्स अधिपतिपच्चयेन पच्चयो. (२)

अनन्तरपच्चयादि

३३४. नियतो धम्मो अनियतस्स धम्मस्स अनन्तरपच्चयेन पच्चयो – मग्गो फलस्स अनन्तरपच्चयेन पच्चयो, नियता खन्धा वुट्ठानस्स अनन्तरपच्चयेन पच्चयो. (१)

अनियतो धम्मो अनियतस्स धम्मस्स अनन्तरपच्चयेन पच्चयो – पुरिमा पुरिमा अनियता खन्धा पच्छिमानं पच्छिमानं अनियतानं खन्धानं अनन्तरपच्चयेन पच्चयो; अनुलोमं गोत्रभुस्स… अनुलोमं वोदानस्स… फलं फलस्स… अनुलोमं फलसमापत्तिया… निरोधा वुट्ठहन्तस्स नेवसञ्ञानासञ्ञायतनं फलसमापत्तिया अनन्तरपच्चयेन पच्चयो. अनियतो धम्मो नियतस्स धम्मस्स अनन्तरपच्चयेन पच्चयो – अनियतं दोमनस्सं नियतस्स दोमनस्सस्स, अनियता मिच्छादिट्ठि नियतमिच्छादिट्ठिया अनन्तरपच्चयेन पच्चयो; गोत्रभु मग्गस्स… वोदानं मग्गस्स अनन्तरपच्चयेन पच्चयो. (२)

समनन्तरपच्चयेन पच्चयो… सहजातपच्चयेन पच्चयो… पञ्च… अञ्ञमञ्ञपच्चयेन पच्चयो… द्वे… निस्सयपच्चयेन पच्चयो… सत्त.

उपनिस्सयपच्चयो

३३५. नियतो धम्मो नियतस्स धम्मस्स उपनिस्सयपच्चयेन पच्चयो. पकतूपनिस्सयो – मातुघातिकम्मं मातुघातिकम्मस्स… पितुघातिकम्मस्स… अरहन्तघातिकम्मस्स… रुहिरुप्पादकम्मस्स… सङ्घभेदकम्मस्स, नियतमिच्छादिट्ठिया उपनिस्सयपच्चयेन पच्चयो (चक्कं). पठमो मग्गो दुतियस्स मग्गस्स…पे… ततियो मग्गो चतुत्थस्स मग्गस्स उपनिस्सयपच्चयेन पच्चयो. नियतो धम्मो अनियतस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – मातरं जीविता वोरोपेत्वा…पे… सङ्घं भिन्दित्वा तस्स पटिघातत्थाय दानं देति, सीलं समादियति, उपोसथकम्मं करोति, अरिया मग्गं उपनिस्साय अनुप्पन्नं समापत्तिं उप्पादेन्ति, उप्पन्नं समापज्जन्ति…पे… ठानाठानकोसल्लस्स उपनिस्सयपच्चयेन पच्चयो; मग्गो फलसमापत्तिया उपनिस्सयपच्चयेन पच्चयो. (२)

३३६. अनियतो धम्मो अनियतस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – अनियतं सद्धं उपनिस्साय दानं देति, सीलं…पे… उपोसथकम्मं करोति, झानं उप्पादेति, विपस्सनं…पे… अभिञ्ञं…पे… समापत्तिं उप्पादेति, मानं जप्पेति… दिट्ठिं गण्हाति; अनियतं सीलं…पे… पञ्ञं… रागं…पे… पत्थनं… कायिकं सुखं… कायिकं दुक्खं… उतुं… भोजनं… सेनासनं उपनिस्साय दानं देति…पे… समापत्तिं उप्पादेति, पाणं हनति…पे… निगमघातं करोति, अनियता सद्धा…पे… सेनासनं अनियताय सद्धाय…पे… पत्थनाय… कायिकस्स सुखस्स… कायिकस्स दुक्खस्स, फलसमापत्तिया उपनिस्सयपच्चयेन पच्चयो. (१)

अनियतो धम्मो नियतस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – अनियतं रागं उपनिस्साय मातरं जीविता वोरोपेति…पे… सङ्घं भिन्दति; अनियतं दोसं…पे… सेनासनं उपनिस्साय मातरं जीविता वोरोपेति…पे… सङ्घं भिन्दति; अनियतो रागो… दोसं…पे… सेनासनं मातुघातिकम्मस्स…पे… सङ्घभेदकम्मस्स उपनिस्सयपच्चयेन पच्चयो; पठमस्स मग्गस्स परिकम्मं पठमस्स मग्गस्स…पे… चतुत्थस्स मग्गस्स परिकम्मं चतुत्थस्स मग्गस्स उपनिस्सयपच्चयेन पच्चयो. (२)

पुरेजातपच्चयादि

३३७. अनियतो धम्मो अनियतस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं (संखित्तं). अनियतो धम्मो नियतस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – रूपजीवितिन्द्रियं मातुघातिकम्मस्स… पितुघातिकम्मस्स… अरहन्तघातिकम्मस्स… रुहिरुप्पादकम्मस्स पुरेजातपच्चयेन पच्चयो. वत्थुपुरेजातं – वत्थु नियतानं खन्धानं पुरेजातपच्चयेन पच्चयो. (२)

पच्छाजातपच्चयेन पच्चयो… द्वे… आसेवनपच्चयेन पच्चयो… द्वे.

कम्मपच्चयो

३३८. नियतो धम्मो नियतस्स धम्मस्स कम्मपच्चयेन पच्चयो – नियता चेतना सम्पयुत्तकानं खन्धानं कम्मपच्चयेन पच्चयो. नियतो धम्मो अनियतस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – नियता चेतना चित्तसमुट्ठानानं रूपानं कम्मपच्चयेन पच्चयो. नानाक्खणिका – नियता चेतना विपाकानं खन्धानं कटत्ता च रूपानं कम्मपच्चयेन पच्चयो. (मूलं कातब्बं.) नियता चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. (३)

अनियतो धम्मो अनियतस्स धम्मस्स कम्मपच्चयेन पच्चयो – सहजाता, नानाक्खणिका (संखित्तं).

विपाकपच्चयेन पच्चयो… एकं… आहारपच्चयेन पच्चयो… चत्तारि… इन्द्रियपच्चयेन पच्चयो… चत्तारि… झानपच्चयेन पच्चयो… चत्तारि… मग्गपच्चयेन पच्चयो… चत्तारि… सम्पयुत्तपच्चयेन पच्चयो… द्वे… विप्पयुत्तपच्चयेन पच्चयो… तीणि (अरूपदुकसदिसं)… अत्थिपच्चयेन पच्चयो… सत्त (अरूपावचरदुकसदिसं)… नत्थिपच्चयेन पच्चयो… विगतपच्चयेन पच्चयो… अविगतपच्चयेन पच्चयो… सत्त.