१. पच्चयानुलोमं

२. सङ्ख्यावारो

३३९. हेतुया चत्तारि, आरम्मणे तीणि, अधिपतिया पञ्च, अनन्तरे तीणि, समनन्तरे तीणि, सहजाते पञ्च, अञ्ञमञ्ञे द्वे, निस्सये सत्त, उपनिस्सये चत्तारि, पुरेजाते द्वे, पच्छाजाते द्वे, आसेवने द्वे, कम्मे चत्तारि, विपाके एकं, आहारे चत्तारि, इन्द्रिये झाने चत्तारि, मग्गे चत्तारि, सम्पयुत्ते द्वे, विप्पयुत्ते तीणि, अत्थिया सत्त, नत्थिया तीणि, विगते तीणि, अविगते सत्त.

२. पच्चनीयुद्धारो

३४०. नियतो धम्मो नियतस्स धम्मस्स सहजातपच्चयेन पच्चयो… उपनिस्सयपच्चयेन पच्चयो. नियतो धम्मो अनियतस्स धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो… पच्छाजातपच्चयेन पच्चयो… कम्मपच्चयेन पच्चयो. नियतो धम्मो नियतस्स च अनियतस्स च धम्मस्स सहजातपच्चयेन पच्चयो. (३)

३४१. अनियतो धम्मो अनियतस्स धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो… पुरेजातपच्चयेन पच्चयो… पच्छाजातपच्चयेन पच्चयो… कम्मपच्चयेन पच्चयो… आहारपच्चयेन पच्चयो… इन्द्रियपच्चयेन पच्चयो. अनियतो धम्मो नियतस्स धम्मस्स आरम्मणपच्चयेन पच्चयो… उपनिस्सयपच्चयेन पच्चयो… पुरेजातपच्चयेन पच्चयो. (२)

नियतो च अनियतो च धम्मा नियतस्स धम्मस्स सहजातं, पुरेजातं. नियतो च अनियतो च धम्मा अनियतस्स धम्मस्स सहजातं, पच्छाजातं, आहारं, इन्द्रियं. (२)