१. विभङ्गवारो

हेतुपच्चयो

१०२. सवितक्कं धम्मं पटिच्च सवितक्को धम्मो उप्पज्जति हेतुपच्चया – सवितक्कं एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे…पे…. सवितक्कं धम्मं पटिच्च अवितक्को धम्मो उप्पज्जति हेतुपच्चया – सवितक्के खन्धे पटिच्च वितक्को चित्तसमुट्ठानञ्च रूपं; पटिसन्धिक्खणे…पे…. सवितक्कं धम्मं पटिच्च सवितक्को च अवितक्को च धम्मा उप्पज्जन्ति हेतुपच्चया – सवितक्कं एकं खन्धं पटिच्च तयो खन्धा वितक्को च चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे…. (३)

१०३. अवितक्कं धम्मं पटिच्च अवितक्को धम्मो उप्पज्जति हेतुपच्चया – अवितक्कं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… वितक्कं पटिच्च चित्तसमुट्ठानं रूपं; पटिसन्धिक्खणे अवितक्कं एकं खन्धं पटिच्च तयो खन्धा कटत्ता च रूपं…पे… द्वे खन्धे…पे… वितक्कं पटिच्च कटत्तारूपं, खन्धे पटिच्च वत्थु, वत्थुं पटिच्च खन्धा, वितक्कं पटिच्च वत्थु, वत्थुं पटिच्च वितक्को, एकं महाभूतं…पे…. (१)

अवितक्कं धम्मं पटिच्च सवितक्को धम्मो उप्पज्जति हेतुपच्चया – वितक्कं पटिच्च सम्पयुत्तका खन्धा; पटिसन्धिक्खणे वितक्कं पटिच्च सम्पयुत्तका खन्धा, पटिसन्धिक्खणे वत्थुं पटिच्च सवितक्का खन्धा. (२)

अवितक्कं धम्मं पटिच्च सवितक्को च अवितक्को च धम्मा उप्पज्जन्ति हेतुपच्चया – वितक्कं पटिच्च सम्पयुत्तका खन्धा चित्तसमुट्ठानञ्च रूपं, वितक्कं पटिच्च सवितक्का खन्धा, महाभूते पटिच्च चित्तसमुट्ठानं रूपं; पटिसन्धिक्खणे वितक्कं पटिच्च सम्पयुत्तका खन्धा कटत्ता च रूपं, पटिसन्धिक्खणे वितक्कं पटिच्च सवितक्का खन्धा, महाभूते पटिच्च कटत्तारूपं, पटिसन्धिक्खणे वत्थुं पटिच्च सवितक्का खन्धा, महाभूते पटिच्च कटत्तारूपं, पटिसन्धिक्खणे वत्थुं पटिच्च वितक्को सम्पयुत्तका च खन्धा. (३)

१०४. सवितक्कञ्च अवितक्कञ्च धम्मं पटिच्च सवितक्को धम्मो उप्पज्जति हेतुपच्चया – सवितक्कं एकं खन्धञ्च वितक्कञ्च पटिच्च तयो खन्धा…पे… द्वे खन्धे …पे… पटिसन्धिक्खणे सवितक्कं एकं खन्धञ्च वितक्कञ्च पटिच्च तयो खन्धा…पे… द्वे खन्धे…पे… पटिसन्धिक्खणे सवितक्कं एकं खन्धञ्च वत्थुञ्च पटिच्च तयो खन्धा…पे… द्वे खन्धे…पे…. (१)

सवितक्कञ्च अवितक्कञ्च धम्मं पटिच्च अवितक्को धम्मो उप्पज्जति हेतुपच्चया – सवितक्के खन्धे च वितक्कञ्च महाभूते च पटिच्च चित्तसमुट्ठानं रूपं; पटिसन्धिक्खणे सवितक्के खन्धे च वितक्कञ्च महाभूते च पटिच्च कटत्तारूपं, पटिसन्धिक्खणे सवितक्के खन्धे च वत्थुञ्च पटिच्च वितक्को. (२)

सवितक्कञ्च अवितक्कञ्च धम्मं पटिच्च सवितक्को च अवितक्को च धम्मा उप्पज्जन्ति हेतुपच्चया – सवितक्कं एकं खन्धञ्च वितक्कञ्च पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… सवितक्कं एकं खन्धञ्च वितक्कञ्च पटिच्च तयो खन्धा…पे… द्वे खन्धे…पे… सवितक्के खन्धे च वितक्कञ्च महाभूते च पटिच्च चित्तसमुट्ठानं रूपं; पटिसन्धिक्खणे सवितक्कं एकं खन्धञ्च वितक्कञ्च पटिच्च तयो खन्धा कटत्ता च रूपं…पे… द्वे खन्धे…पे… पटिसन्धिक्खणे सवितक्कं एकं खन्धञ्च वितक्कञ्च पटिच्च तयो खन्धा…पे… द्वे खन्धे…पे… सवितक्के खन्धे च वितक्कञ्च महाभूते च पटिच्च कटत्तारूपं, पटिसन्धिक्खणे सवितक्कं एकं खन्धञ्च वत्थुञ्च पटिच्च तयो खन्धा वितक्को च…पे… द्वे खन्धे…पे…. (३) (संखित्तं.)