१-७. पटिच्चवारादि

२७५. कुसलं हेतुसम्पयुत्तञ्चेव न च हेतुं धम्मं पटिच्च कुसलो हेतुसम्पयुत्तो चेव न च हेतु धम्मो उप्पज्जति हेतुपच्चया. (१)

अकुसलं हेतुसम्पयुत्तञ्चेव न च हेतुं धम्मं पटिच्च अकुसलो हेतुसम्पयुत्तो चेव न च हेतु धम्मो उप्पज्जति हेतुपच्चया. (१)

अब्याकतं हेतुसम्पयुत्तञ्चेव न च हेतुं धम्मं पटिच्च अब्याकतो हेतुसम्पयुत्तो चेव न च हेतु धम्मो उप्पज्जति हेतुपच्चया (संखित्तं).

२७६. हेतुया तीणि, आरम्मणे तीणि…पे… अविगते तीणि.

नअधिपतिया तीणि (संखित्तं).

(सहजातवारम्पि…पे… सम्पयुत्तवारम्पि पटिच्चवारसदिसं.)

२७७. कुसलो हेतुसम्पयुत्तो चेव न च हेतु धम्मो कुसलस्स हेतुसम्पयुत्तस्स चेव न च हेतुस्स धम्मस्स आरम्मणपच्चयेन पच्चयो… तीणि.

अकुसलो हेतुसम्पयुत्तो चेव न च हेतु धम्मो अकुसलस्स हेतुसम्पयुत्तस्स चेव न च हेतुस्स धम्मस्स आरम्मणपच्चयेन पच्चयो… तीणि.

अब्याकतो हेतुसम्पयुत्तो चेव न च हेतु धम्मो अब्याकतस्स हेतुसम्पयुत्तस्स चेव न च हेतुस्स धम्मस्स आरम्मणपच्चयेन पच्चयो… तीणि (संखित्तं).

२७८. आरम्मणे नव, अधिपतिया सत्त, अनन्तरे पञ्च…पे… सहजाते तीणि…पे… उपनिस्सये नव…पे… अविगते तीणि (संखित्तं).

नहेतुया नव, नआरम्मणे नव (संखित्तं).

आरम्मणपच्चया नहेतुया नव (संखित्तं).

नहेतुपच्चया आरम्मणे नव (संखित्तं).

(यथा कुसलत्तिके पञ्हावारं, एवं वित्थारेतब्बं.)