७. पञ्हावारो

पच्चयचतुक्कं

२१०. पच्चुप्पन्नो हेतु धम्मो पच्चुप्पन्नस्स हेतुस्स धम्मस्स हेतुपच्चयेन पच्चयो. (१)

अतीतो हेतु धम्मो पच्चुप्पन्नस्स हेतुस्स धम्मस्स आरम्मणपच्चयेन पच्चयो. अनागतो हेतु धम्मो पच्चुप्पन्नस्स हेतुस्स धम्मस्स आरम्मणपच्चयेन पच्चयो. (२) (संखित्तं.)

२११. हेतुया एकं, आरम्मणे द्वे, अधिपतिया तीणि…पे… सहजाते एकं, अञ्ञमञ्ञे एकं, निस्सये एकं, उपनिस्सये द्वे…पे… विपाके एकं, इन्द्रिये एकं, मग्गे एकं, सम्पयुत्ते एकं, अत्थिया एकं…पे… अविगते एकं (संखित्तं).

नहेतुया द्वे, नआरम्मणे द्वे (संखित्तं).

हेतुपच्चया नआरम्मणे एकं (संखित्तं).

नहेतुपच्चया आरम्मणे द्वे (संखित्तं).

नहेतुपदं

आरम्मणपच्चयो

२१२. अतीतो नहेतु धम्मो पच्चुप्पन्नस्स नहेतुस्स धम्मस्स आरम्मणपच्चयेन पच्चयो. (१)

अनागतो नहेतु धम्मो पच्चुप्पन्नस्स नहेतुस्स धम्मस्स आरम्मणपच्चयेन पच्चयो. (१)

पच्चुप्पन्नो नहेतु धम्मो पच्चुप्पन्नस्स नहेतुस्स धम्मस्स आरम्मणपच्चयेन पच्चयो. (१) (संखित्तं.)

२१३. आरम्मणे तीणि, अधिपतिया तीणि…पे… सहजाते एकं, अञ्ञमञ्ञे एकं, निस्सये एकं, उपनिस्सये तीणि…पे… आसेवने एकं, कम्मे द्वे, विपाके एकं…पे… इन्द्रिये एकं, मग्गे एकं, सम्पयुत्ते एकं, अत्थिया एकं…पे… अविगते एकं (संखित्तं).

नहेतुया तीणि, नआरम्मणे तीणि (संखित्तं).

आरम्मणपच्चया नहेतुया तीणि (संखित्तं).

नहेतुपच्चया आरम्मणे तीणि (संखित्तं).