७. पञ्हावारो

पच्चयचतुक्कं

आरम्मणपच्चयादि

११०. पीतिसहगतो नहेतु धम्मो पीतिसहगतस्स नहेतुस्स धम्मस्स आरम्मणपच्चयेन पच्चयो. पीतिसहगतो नहेतु धम्मो सुखसहगतस्स नहेतुस्स धम्मस्स आरम्मणपच्चयेन पच्चयो. पीतिसहगतो नहेतु धम्मो उपेक्खासहगतस्स नहेतुस्स धम्मस्स आरम्मणपच्चयेन पच्चयो. पीतिसहगतो नहेतु धम्मो पीतिसहगतस्स नहेतुस्स च सुखसहगतस्स नहेतुस्स च धम्मस्स आरम्मणपच्चयेन पच्चयो. (४)

सुखसहगतो नहेतु धम्मो सुखसहगतस्स नहेतुस्स धम्मस्स आरम्मणपच्चयेन पच्चयो. सुखसहगतो नहेतु धम्मो पीतिसहगतस्स नहेतुस्स धम्मस्स आरम्मणपच्चयेन पच्चयो. सुखसहगतो नहेतु धम्मो उपेक्खासहगतस्स नहेतुस्स धम्मस्स आरम्मणपच्चयेन पच्चयो. सुखसहगतो नहेतु धम्मो पीतिसहगतस्स नहेतुस्स च सुखसहगतस्स नहेतुस्स च धम्मस्स आरम्मणपच्चयेन पच्चयो. (४)

उपेक्खासहगतो नहेतु धम्मो उपेक्खासहगतस्स नहेतुस्स धम्मस्स आरम्मणपच्चयेन पच्चयो. उपेक्खासहगतो नहेतु धम्मो पीतिसहगतस्स नहेतुस्स धम्मस्स आरम्मणपच्चयेन पच्चयो. उपेक्खासहगतो नहेतु धम्मो सुखसहगतस्स नहेतुस्स धम्मस्स आरम्मणपच्चयेन पच्चयो. उपेक्खासहगतो नहेतु धम्मो पीतिसहगतस्स नहेतुस्स च सुखसहगतस्स नहेतुस्स च धम्मस्स आरम्मणपच्चयेन पच्चयो. (४)

पीतिसहगतो नहेतु च सुखसहगतो नहेतु च धम्मा पीतिसहगतस्स नहेतुस्स धम्मस्स आरम्मणपच्चयेन पच्चयो… चत्तारि.

१११. पीतिसहगतो नहेतु धम्मो पीतिसहगतस्स नहेतुस्स धम्मस्स अधिपतिपच्चयेन पच्चयो… चत्तारि.

सुखसहगतो नहेतु धम्मो सुखसहगतस्स नहेतुस्स धम्मस्स अधिपतिपच्चयेन पच्चयो… चत्तारि.

उपेक्खासहगतो नहेतु धम्मो उपेक्खासहगतस्स नहेतुस्स धम्मस्स अधिपतिपच्चयेन पच्चयो… चत्तारि.

पीतिसहगतो नहेतु च सुखसहगतो नहेतु च धम्मा पीतिसहगतस्स नहेतुस्स धम्मस्स अधिपतिपच्चयेन पच्चयो… चत्तारि.

११२. पीतिसहगतो नहेतु धम्मो पीतिसहगतस्स नहेतुस्स धम्मस्स अनन्तरपच्चयेन पच्चयो…पे… उपनिस्सयपच्चयेन पच्चयो… चत्तारि.

सुखसहगतो नहेतु धम्मो सुखसहगतस्स नहेतुस्स धम्मस्स उपनिस्सयपच्चयेन पच्चयो… चत्तारि.

उपेक्खासहगतो नहेतु धम्मो उपेक्खासहगतस्स नहेतुस्स धम्मस्स उपनिस्सयपच्चयेन पच्चयो… चत्तारि.

पीतिसहगतो नहेतु च सुखसहगतो नहेतु च धम्मा पीतिसहगतस्स नहेतुस्स धम्मस्स उपनिस्सयपच्चयेन पच्चयो… चत्तारि (संखित्तं).

११३. आरम्मणे सोळस, अधिपतिया सोळस, सहजाते दस, अञ्ञमञ्ञे दस, निस्सये दस, उपनिस्सये सोळस, आहारे दस…पे… अविगते दस (संखित्तं).

नहेतुया सोळस, नआरम्मणे सोळस, नअधिपतिया सोळस (संखित्तं).

आरम्मणपच्चया नहेतुया सोळस (संखित्तं).

नहेतुपच्चया आरम्मणे सोळस (संखित्तं).

(यथा कुसलत्तिके पञ्हावारं, एवं वित्थारेतब्बं.)